ကျံက်ကျဳ၊ ဂျူလာၚ် ၈
ပ္ဍဲရးဗဂေါ ပ္ဍဲပွိုၚ်ဍုၚ်ကျံက်ကျဳဂှ် ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ထောံကၠုၚ်မခတိုဟ် နကဵုဒရုၚ်တုဲ ညးဍုၚ်ကွာန်ပါဲဘဲပၞာန် တြဴတၠ ပါလုပ်သီုကဵုကောန်ၚာ်အာယုက်မွဲသၞာံမွဲတၠဂှ် ချိုတ်အာလဝ်ရောၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုဂျူလာၚ် ၇ တေံရ။
တုဲကၠုၚ်ဂိတုဂျူလာၚ် ၅ အခိၚ်ဇိုၚ်သဝ်တ္ၚဲ ၜိုတ် ၆ နာဍဳ နူဒပ်ဖျေံသ္ဇိုၚ်(နတ်သံကွင်း) ပွိုၚ်ဍုၚ်ကျံက်ကျဳဂှ် ထောံဏာလဝ်လွဟ်ဇၞော် ၁၂၀ မမ နကဵုဒရုၚ် လ္တူဘာဗ္တောန်လိက်ကွာန်(ပေါက်) ဒၞါဲညးဍုၚ်ကွာန်ပါဲဘဲပၞာန်တအ် မပါဲဒလေတ်ဒၟံၚ်ဂှ်ရ။
ဟိုတ်နူလွဟ်ဇၞော်ဒပ်ကံၚ်ဇြဳပၞာန်ဂှ်တုဲ ကောန်ၚာ်အာယုက်မွဲသၞာံ ပါဲမံၚ်ဘဲပၞာန် ပ္ဍဲကွာန်(ပေါက်) ၊ သဝ်ကျဝ်နာၚ်ထူ၊ သဝ်ကံၚ်တ အာယုက် ၆ သၞာံ၊ မၞိဟ်ဇၞော်ဇၞော် တဳမံၚ်တာန်ဇြုၚ်၊ ညာကျဳမျေတ် သဝ်ကျဝ်နာၚ်ဝေန်၊ မနာန်ဥူတအ် ဒးချိုတ်အာလဝ် ပ္ဍဲဒၞါဲဒှ်ပရူဂှ်ရ။
သ္အာၚ်နူဂှ်ပၠန် ညးဗြဴမၞုံဂဝ်ဂၞဴ နဝ်တူရသေ ဒၟံၚ်ကွာန်(အလည်စု) ၊ ညာဝေန်သဵု ဒၟံၚ်ကွာန်(ဝါးပၚ်စု) ၊ နဝ်လှယမေန်ခိုၚ် ဒၟံၚ်ကွာန်(တောကြောၚ်ပေါက်) တအ် ပိတၠ ဇီုကပိုက်ကလိဂွံလဝ်ဝပ်ရ။
တုဲကၠုၚ်ဂိတုဂျူလာၚ် ၄ တုဲကၠုၚ်တေံဂှ်လေဝ် ဟိုတ်ဟွံမွဲမွဲသာ် ဒပ်ကံၚ်ဇြဳပၞာန် ရပ်ဒက်လဝ် သဝ်အေမေန်ထိုဲ ကောန်ကွာန်တလိုၚ်ခေန် ပ္ဍဲကဵုသၞေဟ်ကၚ်စၟဳတ်ဍုၚ်(ကျောက်တံခါး) ဂှ်ကီုလေဝ် ဒဵုကဵုအခိၚ်လၟုဟ် ကလေၚ်ဗလးကဵုလဝ် ဟွံမွဲဏီပုဟ်ဂှ် KNU ဗဟဵု ကဵုလဝ်သမ္တီရ။
ဒပ်ကံၚ်ဇြဳပၞာန်ဝွံ အရိုဟ်တ္ၚဲ ပန်ဒၟံၚ်လွဟ်ဇၞော် ပ္ဍဲကွာန်မၞုံတိဍာ်အုပ်ဓုပ် ဒပ်မဟာ ၃ ဗော်သွးကောန်ဂကူကရေၚ် KNU ဂှ်တုဲ စွံပွန်ပန်ကၠုၚ်ဒၟံၚ် သီုကဵုဒၞါဲညးဍုၚ်ကွာန်ပါဲဘဲပၞာန်တံရောၚ် KNU ဗဟဵု လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU