ပ္ဍဲကျောန်သု သ္ကိုပ်အုပ်ဓုပ်မွဲတၠ ဒးဒုၚ်ပန်ဂစိုတ်

ကျောန်သု၊ ဂျူလာၚ် ၈

ရးတၞၚ်သဳ ပွိုၚ်ဍုၚ်ကျောန်သု ပ္ဍဲကွာန်မေဝ်ဒဝ်ဂှ် အာစိုပ်ရပ်ဒက်လဝ် သ္ကိုပ်အုပ်ဓုပ်မွဲတၠ ကံၚ်ဇြဳပၞာန် မခါန်ကၞက်ပ္တိုန်လဝ်ဂှ်တုဲ ဟိုတ်နူညးကညာၚ်လက်ဒေါန် ဂြိပ်အာလဝ်တုဲ ပန်ပသောၚ်လဝ်ရောၚ် ဂွံတီကေတ် နူကဵုတမ်ဒပ်လၟိဟ် ၂ ခရိုၚ်ဗိက်ရ။

တုဲကၠုၚ်ဂိတုဂျူလာၚ် ၅ တေံ ဒပ်ပံၚ်ကောံစဵုဒၞါညးဍုၚ်ကွာန်တအ် အာစိုပ်ရပ်ဒက်လဝ် ဥူအံၚ်မျေတ် သ္ကိုပ်အုပ်ဓုပ်ကွာန်မေဝ်ဒဝ် အာယုက်မၞုံ ၅၀ သၞာံဂှ် ပ္ဍဲကဵုသ္ၚိညးတုဲ ညးဂြိပ်တိတ်အာလဝ်ရ။

ကြဴနူဂှ်တုဲ ဒပ်ပံၚ်ကောံစဵုဒၞါညးဍုၚ်ကွာန်တအ် ဆက်ဂၠိုက်ဂၠါဲ ဂွံဆဵုကေတ်လဝ် ဥူမျေတ်အံၚ် ကေုာံ ရဲအဖဝ်ညးဂမၠိုၚ်တုဲ ဟိုတ်နူကလေၚ်တဝ်စၞေဟ်ကၠုၚ် နကဵုလေံ ၜုန်တံဂှ်ရ ပန်ဘလဝ်နကဵုသေနာတ်တုဲ ရပ်ကော်ဏာလဝ် ဥူမျေတ်အံၚ်ရ။

အခိၚ်ရပ်ဂွံဂှ် ပ္ဍဲဇကုညးဂှ် ဂွံဆဵုကေတ် ဗဳယျာၜါဗူ၊ ဂဥုဲၜူမာဲ သုၚ်စောဲဟွံအိုတ်ဏီ ကေုာံ တၞးဒါန် (ခဲပြား) တအ်ဂှ်တုဲ မွဲဒမြိပ်ဂၠံၚ် ကညာၚ်လက်တုဲ ကြအ်ဒၟံၚ်ဂဥုဲ ဒှ်ဒၟံၚ်စိုတ်ပကတိဟွံသေၚ်ရောၚ် သ္ဂးရ။

ပ္ဍဲကဵုတ္ၚဲဂှ် အခိၚ်ဗ္တံ ၜိုတ် ၁၀ နာဍဳဝိုက်ဂှ်လေဝ် က္ၜၚ်ပၞာန်ကံၚ်ဇြဳပၞာန်မွဲဖ္ဍိုက် ပတဝ်က္ဍိုပ် ပန်ကၠုၚ် လ္ပာ်ဒၞါဲဒပ်ပၠန်ဂတးတအ်နွံ နကဵုသေနာတ်ပွိုက်ဖိုက်ဂှ်တုဲ ဆုဲလုပ်ကၠုၚ်ဂှ်ရ ဂကောံဒပ်ပၠန်ဂတးတအ် ကေတ်ဒၟံၚ်ဒၞါဲ ချဳဒရာၚ်ဒၟံၚ်ဂှ် ကေတ်အခေါၚ်ခိုဟ်တုဲ ကညာၚ်လက် ဂြိပ်တိတ်အာဂှ်ရ ဒးပန်ဂစိုတ်လဝ်ရောၚ် ညးဒုၚ်တာလျိုၚ်လလောၚ်ပရိုၚ် တမ်ဒပ်လၟိဟ် ၂ ခရိုၚ်ဗိက် ဟီုရ။

ဥူအံၚ်မျေတ်ဝွံ သွံရာန်ဒၟံၚ်ဂဥုဲၜူမာဲ ပ္ဍဲကွာန်မေဝ်ဒဝ်တုဲ အလဵုညးလေဝ် သုၚ်စောဲဒၟံၚ်တုဲ ဟိုတ်နူပကောံကၠုၚ်ဒၟံၚ်ကောန်ပၞာန် ဗွဲအဓမ္မ ကေုာံ ဟိုတ်နူဗက်ကံက်ဒၟံၚ်လှုဲတံဂှ်တုဲ ဒးရပ်လဝ်ရောၚ် သ္ဂးရ။

ဟိုတ်ဂှ်ရ နကဵုကောန်ရဲတဝ်ခွါ သၟဝ်တဲကံၚ်ဇြဳပၞာန်ဂမၠိုၚ် ဒေါအ်ကၠေံပြဝလၟုဟ်တံဂှ်တုဲ ယဝ်ရဆက်ကၠောန်မံၚ်မ္ဂး ကေတ်အာအရေဝ် ဗွဲမစိုပ်တရဴဏောၚ် ကဵုလဝ်သတိရ။

အပ္ဍဲဂိတုမေတုဲကၠုၚ်တေံဂှ်လေဝ် ပ္ဍဲရးတၞၚ်သဳဂှ် ဂကောံဇြဟတ်ပၠန်ဂတးရပ်လွဟ်တအ် ရပ်ဒက်ဂစိုတ်လဝ် နကဵုဟိုတ်ဖအိုတ်ကၠေံရဲကဵုပရိုၚ်တအ်ဂှ်တုဲ ကောန်အရာပ်ဒးဒုၚ်ဂစိုတ်လဝ် ၄ တၠ နွံရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi ရ။

ပရိုၚ်−သြၚ်လောန်တိုၚ်(မ်)

ဗီုရုပ်−CJ