ပ္ဍဲတွဵုရးဍုၚ်မန် သ္ကိုပ်အုပ်ဓုပ် ကဵုကောန်ပၞာန်တၟိဟွံမာန်တအ် ဒးဒေါအ်ဇူနူတာလျိုၚ်

မတ်မလီု၊ ဂျူလာၚ် ၈

ပ္ဍဲတွဵုရးဍုၚ်မန် သ္ကိုပ်အုပ်ဓုပ်ကွာန်အရာပ် ပကောံကဵုကောန်ပၞာန်တၟိဟွံမာန် သွက်တန်ဗ္တောန်ကွတ်ပၞာန် ကံၚ်ဇြဳပၞာန် မပံက်ဒၟံၚ်လၟေၚ်ဂိတုတံဂှ်တုဲ ဒးဒေါအ်ဇူနူတာလျိုၚ်ဂှ် ညးမစုက်လုက်ကဵုကံၚ်ဇြဳပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဟိုတ်နူပၞာန်ပၠန်ဂတး အလုံဍုၚ်မွဲတုဲ ကံၚ်ဇြဳပၞာန် နွံပၟိက်ကၠုၚ်ဇြဟတ်ဒပ် ဂၠိုၚ်ကၠုၚ်ဂှ် ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ ဂှ် ဂယိုၚ်ပ္တိုန်လဝ် သၞောဝ်ယိုက်လျိုၚ်ပၞာန်တုဲ ပ္ဍဲတွဵုရးဍုၚ်မန်ဂှ် ပံက်ကၠုၚ်ဒၟံၚ်တန်ဗ္တောန်ကွတ်ပၞာန် လၟေၚ်ဂိတုရ။

ကၠာတေံ သွက်တန်ဗ္တောန်ကွတ်ပၞာန်ဂှ် လိၚ်စုတ် ကောန်ကလောန်ဆုဲပြံၚ်ဒေသဂမၠိုၚ် ကေုာံ ညးဒိုက်ဝါတ် အပ္ဍဲဒေသတအ်ဂှ် ဂွံတုဲ ဗွဲကြဴဏံ ဟိုတ်နူပလံၚ်ဏာဒၟံၚ် ကောန်ဒပ်စှ်ေနူတန်ဗ္တောန်ကွတ်ပၞာန်တအ် မုက်ပၞာန်တေံဂှ်တုဲ ဒှ်ကၠုၚ်အခက်အခုဲ ပ္ဍဲအရာလိၚ်မၞိဟ်တံဂှ်ရ။

ဗွဲကြဴဏံ လိၚ်စုတ်မၞိဟ်စၞးဟွံလောဲတုဲ ကံၚ်ဇြဳပၞာန် စကာကၠုၚ်သ္ကိုပ်အုပ်ဓုပ်ကွာန်အရာပ်ဂမၠိုၚ် ကဵုပကောံကောန်ဒပ်တၟိ သွက်တန်ဗ္တောန်ကွတ်ပၞာန်တအ်ဂှ် ဗွဲအဓမ္မတုဲ သ္ကိုပ်အုပ်ဓုပ် ပကောံဟွံမာန်တအ်ဂှ်တှ်ေ ဒးဒုၚ်ပတိတ်နူဒၞါဲတုဲ ကဵုဒေါအ်ဇူကၠုၚ်လဝ်ရ။

ညးမစုက်လုက်ကဵုကံၚ်ဇြဳပၞာန်မွဲတၠဂှ်တှ်ေ ဒဒှ်မပတိတ်ဒၟံၚ်သ္ကိုပ်အုပ်ဓုပ် ပကောံကောန်ဒပ်ဟွံဂွံ သွက်တန်ဗ္တောန်ကွတ်ပၞာန်တံဂှ်တှ်ေ ဂွံဆဵုကေတ် လ္ပာ်ကွာန်ရးတအ်ဂှ် ဂၠိုၚ်ရောၚ် ဟီုရ။

“ ပတိတ်ဒၟံၚ် သ္ကိုပ်အုပ်ဓုပ်တအ်ဂှ် လ္ပာ်ကွာန်ရး ဒှ်ဂၠိုၚ်ဒၟံၚ်။ ဒးပလံၚ်ကဵုဒၟံၚ် သွက်တန်ဗ္တောန်ကွတ်ပၞာန်ဂှ် လၟေၚ်ၚ်ရောၚ် ဟီုရ။ ဍေံတံ ဟီုကၠုၚ် မွဲမွဲလၟေၚ် မၞိဟ်မွဲတှ်ေမွဲ ၜါတှ်ေၜါ။ လ္ၚဵုဂှ်ပၠန် မၞိဟ်ညးတအ် ကော်လဝ်တုဲတုဲတအ်ဂှ် စုတ်ကဵုဏာ။ လ္ၚဵုဂှ်ပၠန် သောၚ်ကလးကၠုၚ် နကဵုနဲကဲသောၚ်ကလးဂွံ တၞဟ်ဟ်တံရ” သာ်ဝွံ သ္ဂးရ။

သ္အာၚ်နူဂှ်ပၠန် ကုသ္ကိုပ်အုပ်ဓုပ် ပကောံကောန်ပၞာန်ဟွံဂွံ သွက်တန်ဗ္တောန်ကွတ်ပၞာန်တအ်ဂှ် ကံၚ်ဇြဳပၞာန် ပတိတ်ထောံနူဒၞါဲတုဲ နကဵုသ္ကိုပ်အုပ်ဓုပ်လ္ၚဵုဂှ်ပၠန် ပလေဝ်ပလေတ်ကၠုၚ်ဒၟံၚ် သွက်ဂွံကော်အာ ညးဒေသတံဂှ်တုဲ သွက်ဂွံကံက်မာဲလေဝ် ကၠောန်ဒၟံၚ်နွံရောၚ် ညးဆက်ဟီုရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ လၟေၚ်ဂိတု ကော်ကၠုၚ်ဒၟံၚ်ကောံဓရီုသ္ကိုပ်အုပ်ဓုပ် ညးတအ် မခါန်ကၞက်ပ္တိုန်လဝ်ဂှ်တုဲ ကဵုပကောံမၞိဟ်တၟိ သွက်တန်ဗ္တောန်ကွတ်ပၞာန်ဂှ်ကီု၊ ညံၚ်လၟိဟ်မၞိဟ်ဂွံပေၚ် ကဵုကၠောန်ဒၟံၚ်တုဲ သွက်ဂွံဒစးဒုၚ်ပလေတ်ပလေတ်လဝ် သွက်တန်ဗ္တောန်ဗွဲကြဴဂမၠိုၚ်လေဝ် စၞောန်ကၠုၚ်လဝ်ရ။

ဟိုတ်နူတၚ်စၞောန်ကံၚ်ဇြဳပၞာန်ဏံတုဲ ရပ်ကၠုၚ်ဒၟံၚ် သၟတ်တိတ်မ္ၚးအခိၚ်ဗ္တံ၊ ဒၞါဲမကၟာတ်လဒဵုလဝ် မၞိဟ်တြုံၜါတၠ ဍိုက်ကွဳလိုန်ဓာတ်ဟွံဂွံတံဂှ် ယဝ်ဍိုက်မၞိဟ်ၜါမ္ဂး ရပ်ကၠုၚ်တုဲ ရပ်ဒက်ကၠုၚ်ဒၟံၚ် သီုကဵုမၞိဟ်ဍိုက်ကွဳလာၚ်ဇြေန်ဟွံမွဲတံဂှ်တုဲ ပကောံကၠုၚ်ဒၟံၚ်ကောန်ဒပ်တၟိရ။

အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန်ဂှ် ကံၚ်ဇြဳပၞာန် ပံက်ကၠုၚ်လဝ်တန်ဗ္တောန်ကွတ်ပၞာန် နူလၟေၚ် ၁ စဵုကဵုလၟေၚ် ၁၄ တုဲ ပကောံဂွံကၠုၚ်လဝ်ကောန်ပၞာန် စဵုကဵုပွဳပွူ ၂၃၀၀ ရ။

ပရိုၚ်−သြၚ်လောန်တိုၚ်(မ်)

ဗီုရုပ်−MOI