မတ်မလီု၊ ဂျူလာၚ် ၉
ဗော်ဒဳမဝ်ကရေတ်တေတ်ဂကူသေံ ကေုာံ ကောန်ဍုၚ်အရၚ်ဂမၠိုၚ် SNDP မၞိဟ်တီဂၠိုၚ် နဒဒှ်ဗော်ကၠဗုဂှ်ဝွံ ဆက်ပံက်အာရုၚ် ပ္ဍဲတွဵုရးဍုၚ်မန် ၇ ပွိုၚ်ဍုၚ်ဏောၚ် လ္ပာ်ဗော်ဗဟဵု ကဵုသမ္တီလလောၚ်ပ္တိတ်လဝ်ရ။
ဗော်ကၠဗုဝွံ အပ္ဍဲဂိတုဂျောန် သတ္တာဟလက္ကရဴအိုတ်ဏံ ပံက်လဝ်ရုၚ် ပ္ဍဲတွဵုရးဍုၚ်မန် ပ္ဍဲပွိုၚ်ဍုၚ်မတ်မလီု၊ ပွိုၚ်ဍုၚ်သဓီု ကေုာံ ပွိုၚ်ဍုၚ်ကျာ်ထဝ်တံရ။
ဗော်ကၠဗု မဂွံလဝ်အခေါၚ်ဒက်ပတန်ဗော် နဒဒှ်ဗော်စန်ဒက်အာ ကဆံၚ်အလုံဍုၚ်ဂှ် စဵုကဵုအခိၚ်လၟုဟ် အလုံဍုၚ်မွဲဂှ် ပံက်လဝ်ရုၚ် ပ္ဍဲကဵု ၁၃၃ ပွိုၚ်ဍုၚ်ရ။
ဗော်ကၠဗု မပြံၚ်လှာဲလဝ်ယၟု ဗော်ဒဳမဝ်ကရေတ်ဂကူသေံ ကေုာံ ကောန်ဍုၚ်အရၚ် SNDP နူကဵုဗော်ဒဳမဝ်ကရေတ်တေတ်ဂကူသေံဂှ်ဝွံ သွက်ဂွံလုပ်ပြိုၚ်အာ ပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဏံဂှ် ဆက်ပံက်ဒၟံၚ်ရုၚ် အလုံဍုၚ်မွဲရ။
ဗော်ကၠဗုဝွံ ပ္ဍဲပေါဲရုဲမာဲ သၞာံ ၂၀၁၅ ကဵု သၞာံ ၂၀၂၂ ဗော် NLD မလုပ်ပြိုၚ်လဝ်ဂှ် ဗော်ညးတအ် ဂွံလဝ်ဒၞါဲညးစၞးကၠတ်ထဝ် မွဲဒၞါဲဓဝ်ရ။
ဆ္ဂး ဗော်ကၠဗုဝွံ ပ္ဍဲပေါဲရုဲမာဲ ၂၀၁၀ နူကဵုအလဵုအသဳပၞာန် သ္ကိုပ်သ္ကကၠောန်ဗဒှ်လဝ်ဂှ် ညးစၞးကၠတ်ထဝ် ၅၈ တၠ ဂွံလဝ်ဇၞးတုဲ ဂွံလဝ်ဒၞါဲ ဝန်ဇၞော် ကေုာံ ဒုဝန်ဇၞော် တြဴတၠရ။
ပရိုၚ်−သြၚ်လောန်တိုၚ်(မ်)
ဗီုရုပ်−SNDP