မိတ္ထဳလာ၊ ဂျူလာၚ် ၁၂
ပ္ဍဲပေါဲရုဲမာဲ ကၠောန်ဗဒှ်အာ ပ္ဍဲကၞောတ်သၞာံဏံကဵု သၞာံတၟိမံက်တေံဂှ် ကော်ဘိက်အာ ဂကောံလ္ၚတ်နူဍုၚ်သ္အာၚ်တံဏောၚ် ဥက္ကဌကံၚ်ဇြဳပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။
ညးဟီုလဝ် ပ္ဍဲပေါဲဆဵုဂဗ လ္တူဍုၚ်မိတ္ထဳလာ ပ္ဍဲဂိတုဂျူလာၚ် စၟတ်တ္ၚဲ ၁၀ အခိၚ်ဆဵုဂဗကုညးတာလျိုၚ်ဌာနမဆေၚ်စပ် ကဆံၚ်ခရိုၚ်၊ ကဆံၚ်ပွိုၚ်ဍုၚ်၊ ညးဇၞော်လ္တူဍုၚ်တအ်ဂှ်ကဵု တၠကမၠောန် MSME အပ္ဍဲခရိုၚ်မိတ္ထဳလာ ရးမာန္လေဝ်ရ။
အခိၚ်ကၠောန်ဗဒှ်ပေါဲရုဲမာဲဂှ် ကော်ဘိက်အာ ဂကောံလ္ၚတ်ဍုၚ်သ္အာၚ်တံဏောၚ်တုဲ ဍုၚ်လ္ၚဵုတအ် ဂွံကၠုၚ်စိုပ် တုပ်လဝ်စိုတ်တုဲတုဲရောၚ် က္ဍိုပ်သ္ကိုပ်ပၞာန် ဟီုရ။
ဆ္ဂး ကော်ဘိက်အာဍုၚ်လဵုရော ဍုၚ်လဵုမွဲ တုပ်လဝ်စိုတ် ဂွံကၠုၚ်စိုပ်ရောဟီုဂှ် ဟွံဟီုဏာလဝ်ရ။
ဍုၚ်ကြုက်၊ ဍုၚ်ရုယှာ ကေုာံ ဍုၚ်ဗဴလာရုသ်တံဂှ်တှ်ေ ကဵုဇြဟတ် သ္ပစၟတ်သမ္တီ ကုပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဂှ်တုဲ အရီုဗၚ်နွံပၟိက်တအ်ဂှ်လေဝ် သွက်ဂွံကဵုအာ နွံဒၟံၚ်တုဲ ဗလးအာ သီုဂကောံလ္ၚတ်ဂမၠိုၚ်ဏောၚ် ဟီုပတိတ်လဝ်ရ။
အခိၚ်လၟုဟ် ပေါဲဗ္တိုက်ဒစဵုဒစးသၞောတ်တၠအဝဵုပၞာန်တအ် ဆက်နွံဒၟံၚ်တုဲ က္ဍိုပ်သ္ကိုပ်ပၞာန်ဂှ်တှ်ေ ကၞောတ်သၞာံဏံ ကၠောန်ဗဒှ်အာ ပေါဲရုဲမာဲဒဳမဝ်ကရေဇြဳဗော်ဇဳ ဗၠးၜးဗဗွဲဓဝ်ဏောၚ်ဂှ် သ္ဂးရ။
ညးဍုၚ်ကွာန် ကဵုမာဲဂွံသီုညးဖအိုတ် ဂွံကဵုမာဲမာန် ရေၚ်တၠုၚ်ဒၟံၚ်ကမၠောန်ဒစးဒုၚ်ပလေဝ်ပလေတ်တံဂှ်တုဲ ညံၚ်ဂွံဒှ်ပေါဲရုဲမာဲဗၠးၜးဗဗွဲဓဝ်၊ ညံၚ်စရၚ်မာဲ ဟွံဂွံဗၠေတ်ယောၚ်ယာ၊ ညံၚ်မမာဲဟွံဗဗွဲဓဝ် ဟွံဂွံဒှ်ဂှ် ပလေဝ်ပလေတ်ဒၟံၚ် ဗွဲမစှ်ေကဵုသၞောတ်ရောၚ် ဟီုရ။
ဟိုတ်ဂှ်ရ သွက်ဂွံကၠောန်ဗဒှ်ပေါဲရုဲမာဲ ဗွဲမအံၚ်ဇၞးမာန် ခရိုၚ်မိတ္ထဳလာလေဝ် မိက်ဂွံကဵုပံၚ်တောဲပါလုပ်ရောၚ် က္ဍိုပ်သ္ကိုပ်ပၞာန် အခိၚ်ဆဵုဂဗကဵုညးဒေသလ္တူဍုၚ်တအ်ဂှ် ဖတိုက်ဖ္အောဝ် ဟီုဏာလဝ်ရ။
ပေါဲရုဲမာဲ မရပ်စပ်အာစက်ကဵုမာဲ အဳလက်ထရဝ်နေတ်ဏံဂှ် ညးဍုၚ်ကွာန်တအ် စိုတ်လုပ်စအောန်ဒၟံၚ် ဗွဲမလောန်တုဲ လ္ပာ်ဂကောံဇြဟတ်ပၠန်ဂတးတအ်ဂှ်တှ်ေ ဗ္တိုက်သရိုဟ်ဒစဵုဒစးအာဏောၚ် ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI