ပ္ဍဲဍာ်ဗု ကရောၚ်ပၞာန်ကံၚ်ဇြဳပၞာန် ဒးဒုၚ်ဗ္တိုက်ကဵုဒရုၚ်တုဲ မွဲတၠ ချိုတ်အာ

ဍာ်ဗု၊ ဂျူလာၚ် ၁၃
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲဒေသနဗုလာ ပွိုၚ်ဍုၚ်ဍာ်ဗု ရးတၞၚ်သဳဂှ် ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်တုဲ မွဲတၠ ဇီုကပိုက်ကလိဂွံလဝ်ဝပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုဂျူလာၚ် စၟတ်တ္ၚဲ ၁၀ ပယျာံဂယးပြဟ်ဂှ်တုဲ ကောန်ဒပ်ကံၚ်ဇြဳပၞာန် ဇြဟတ်ဗွဲမဂၠိုၚ်ဂၠေၚ် လုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်ကွာန်(မူးဒူး) မၞုံအပ္ဍဲဒေသပရေၚ်ပိုန်ဒြပ်တၟေၚ်ထဝါဲ ပွိုၚ်ဍုၚ်ဍာ်ဗုရ။
ကြဴနူဂှ်တုဲ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဝိုက်ဂှ် ဂကောံဇြဟတ်ပၠန်ဂတးဂမၠိုၚ် လုပ်စိုပ်ထောံလဝ်မခတိုဟ်နကဵုဒရုၚ် ကုကရောၚ်ပၞာန်ဒပ်ကံၚ်ဇြဳပၞာန် မဖျေံဒပ်မံၚ်ဒၟံၚ် အပ္ဍဲကွာန်(မူးဒူး) ဂှ်ရောၚ် သ္ဂးရ။
အပ္ဍဲကဵုပရေၚ်ဂကောံဇြဟတ်ပၠန်ဂတးတအ် ထောံမခတိုဟ်နကဵုဒရုၚ်ဂှ် ကောန်ဒပ်ကံၚ်ဇြဳပၞာန်မွဲတၠ ချိုတ်အာလဝ်တုဲ မွဲတၠ ကလိဂွံလဝ်ဝပ်ရောၚ် မၞိဟ်တြုံဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဒးဒုၚ်ဗ္တိုက်ဒၟံၚ်ကဵုဒရုၚ်ဂှ်ဝွံ ဆုတ်ကလေၚ်အာ ပ္ဍဲဗ္ဒိုပ်ယာယဳ မၞုံအပ္ဍဲပွဳဗွိုၚ်သၞေဟ်ဍာ်ဒမျိုဟ် နူကဵုဒေသပရေၚ်ပိုန်ဒြပ်တၟေၚ်ထဝါဲဂှ်ရောၚ် သ္ဂးလဝ်ရ။
ဂိတုဂျောန်တုဲကၠုၚ်တေံဂှ်လေဝ် ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲပွဳဗွိုၚ်သၞေဟ်ဍာ်ဒမျိုဟ် ဒေသပရေၚ်ပိုန်ဒြပ်တၟေၚ်ထဝါဲ ပွိုၚ်ဍုၚ်ဍာ်ဗုဂှ် ဒးဒုၚ်ဗ္တိုက်လဝ်တုဲ ပရေၚ်ဇီုကပိုက်ချိုတ်ဂျိုၚ်နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media