မတ်မလီု၊ ဂျူလာၚ် ၁၃
အပ္ဍဲဂိတုဂျောန်ပွိုၚ်မွဲဂိတုတုဲကၠုၚ်တေံ နဗ္ၜတ်အလုံဍုၚ်မွဲဂှ် ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ် ၁၂၀ ပြၚ်ဝွံ ဖျေံကၠုၚ်လွဟ် ဇရေၚ်ဂကောံဒပ်ပၠန်ဂတးတအ်ရောၚ် ဂွံတီကေတ် နူကဵုဂကောံပျဳတုပါန်တိုၚ်ရ။
ပ္ဍဲကဵုညးမလုပ်စိုပ်ဖျေံကၠုၚ်လွဟ်ဂမၠိုၚ် ကောန်ဒပ်ကံၚ်ဇြဳပၞာန် ၁၁၀ တၠ ပါလုပ်တုဲ ပ္ဍဲကဵုဏံ ကောန်ဒပ်ယိုက်လျိုၚ်ပၞာန်ဂှ် ၅၂ တၠ၊ ကောန်ဒပ်ဗၠာဲသၟိၚ် မသုန်တၠ ကေုာံ ကောန်ဂကောံပျဳတုသေတ် တြဴတၠ၊ အပံၚ်ဖအိုတ် ၁၂၁ တၠ ဖျေံကၠုၚ်လွဟ်ရ။
ရံၚ်ကဵုရးဒေသ ကေုာံ တွဵုရးမ္ဂး ပ္ဍဲတွဵုရးရခေၚ်ဂှ် ၅၀ တၠ၊ ပ္ဍဲရးတၞၚ်သဳဂှ် ၂၀ တၠ၊ ပ္ဍဲရးဗဂေါဂှ် ၁၂ တၠ၊ ပ္ဍဲရးမာန္တလေဝ်ဂှ် ၁၀ တၠ လုပ်ဖျေံကၠုၚ်လွဟ်ဂၠိုၚ်အိုတ်ရ။
သ္အာၚ်နူဂှ်ပၠန် မၞိဟ်ဖျေံကၠုၚ်လွဟ် ၅၀ တၠ နွံတုဲ ပ္ဍဲကဵုဏံ ကောန်ဒပ်ကံၚ်ဇြဳပၞာန်သီုဖအိုတ်ဝွံ ဒှ်ညးဖျေံလဝ်လွဟ် ဇရေၚ်ဂကောံပၠန်ဂတး ပ္ဍဲပေါဲဗ္တိုက်အပ္ဍဲတွဵုရးကရေၚ်တအ်ဂှ်ရောၚ် သ္ဂးရ။
မၞိဟ်ဒးဒုၚ်ရပ်လဝ် နဒဒှ်ဂၠုဲပၞာန်ဂှ် ၁၀၉ တၠနွံတုဲ ပ္ဍဲရးမာန္တလေဝ်ဂှ် ဒ္စါံတၠ၊ ပ္ဍဲရးသက်ကိုၚ်ဂှ် ၂၇ တၠ၊ ပ္ဍဲရးမာန္တလေဝ်ဂှ် ၂၅ တၠ၊ တွဵုရးကရေၚ်ဂှ် ပန်တၠ၊ ရးမဂွဵုဂှ် ၄၅ တၠ ပါလုပ်ရ။
အတိုၚ်စၟတ်သမ္တီ ဂကောံပျဳတုပါန်တိုၚ် ကံက်ကပှ်ဂွံလဝ်ဂှ်မ္ဂး သၞာံ ၂၀၂၅ နူဂိတုဂျာန္နဝါရဳ စဵုကဵုဂိတုဂျောန်ဂှ် ညးမဖျေံကၠုၚ်လွဟ် ကေုာံ ညးရပ်ဂွံ နဒဒှ်ဂၠုဲပၞာန်ဂှ် နွံကၠုၚ်စဵုကဵု ၁၄၉၂ တၠရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− PDF
