ကြုၚ်ဒဵု၊ ဂျူလာၚ် ၁၃
ဒၟါနူဒပ်ကံၚ်ဇြဳပၞာန် ပန်ကၠုၚ်ကဵုလွဟ်ဇၞော် ပ္ဍဲကွာန်(အောၚ်ဗလကုန်း) ပွိုၚ်ဍုၚ်ကြုၚ်ဒဵု တွဵုရးကရေၚ်ဂှ်တုဲ ညးဗြဴဒေသမွဲတၠ ဖေက်လကိုတ်တုဲ လမျီုဒးအိုတ်အာဂှ် KNU ဗဟဵု လလောၚ်ပ္တိတ်လဝ်ပရိုၚ်ရ။
တုဲကၠုၚ်ဂိတုဂျူလာၚ် ၉ အခိၚ်ဗ္တံ ၜိုတ် ၁၀ နာဍဳဂှ် နူတမ်ဒပ် ခမရ ၅၄၅ ဖျေံသ္ဇိုၚ်ကြုၚ်ဒဵု ပန်လဝ်လွဟ်ဇၞော် ၁၂၀ မမ တုဲ ညးဗြဴဒၟံၚ်ကွာန် (အောၚ်ဗလကုန်း) မွဲတၠ အာယုက်မၞုံ ၅၅ သၞာံဂှ် လကိုတ်ဗရုလွဟ်ဇၞော်ဏံတုဲ မ္ဒးချိုတ်အာလဝ်ရ။
သ္အာၚ်နူဂှ်ပၠန် တုဲကၠုၚ်ဂိတုဂျောန် ၉ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ဗတိုက်ကၠုၚ်ကဵုပၞာန်ကျာတုဲ ကောန်ကွာန်မွဲတၠ၊ အ္စာဗြဴဗ္တောန်လိက်မွဲတၠ ကေုာံ ကောန်ၚာ်သၟတ်ပိတၠ မတိုန်ဒၟံၚ်ဘာ ပ္ဍဲကွာန်ပါၚ်ယာပ် ပွိုၚ်ဍုၚ်ကြုၚ်ဒဵု အပံၚ်ဖအိုတ် ၅ တၠ ချိုတ်အာလဝ်တုဲ ၂၂ တၠ ဇီုကပိုက်ကလိဂွံလဝ်ဝပ်ရ။
ဒပ်ကံၚ်ဇြဳပၞာန်ဝွံ သွက်ဂွံကလေၚ်သီကေတ် ဂၠံၚ်ကြုၚ်ဒဵု−ကအ်ကြိက်မာန်ဂှ် ထ္ပက်လဝ်ကရောၚ်ပၞာန် ဂၠိုၚ်ၚ်ကဵုဝါတုဲ သၞာံဏံ ပပ္တံနူဂိတုဂျူလာၚ်တုဲ ဒှ်လဝ်ပေါဲဗ္တိုက်ဆေၚ်မုက် ကုဒပ်ပံၚ်ကောံပၠန်ဂတး သၟဝ်သ္ကိုပ်သ္က KNLA တအ် ဗွဲမသ္ကာတ်မြဟ်ရ။
ဒပ်ကံၚ်ဇြဳပၞာန်ဂှ်တှ်ေ နူကဵုဌာန်ဂအုပ် စကခ ၁၂ ဖျေံသ္ဇိုၚ်ဍုၚ်ကအ်ကြိက်ဂှ် ထ္ပက်ကၠုၚ်ဒၟံၚ်ကရောၚ်ပၞာန်မွဲတုဲ နူကဵုဍုၚ်ကြုၚ်ဒဵုဂှ်လေဝ် ထ္ပက်ကၠုၚ်ဒၟံၚ်ကရောၚ်ပၞာန်တုဲ စကာလွဟ်ဇၞော် သီုကဵုပၞာန်ကျာတုဲ ဘိုၚ်ပန်ကဵုဒၟံၚ်ရောၚ် တမ်ပရိုၚ်ဒေသဂမၠိုၚ် သ္ဂးအိုတ်ရ။
သွက်ဂွံထိၚ်သီကေတ် သ္ကုတ်ဂၠံၚ်ကအ်ကြိက်−ကြုၚ်ဒဵုဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ဂကောံကေဒဳဗဳအေ မဒှ်က္ဍိုပ်ပါ်တိတ် သၟဝ်သ္ကိုပ်သ္ကဗိုလ်ဘိဂှ်လေဝ် ဘိုၚ်ဗ္တိုက်ကဵုဒၟံၚ် လ္ပာ်ဒပ်ကံၚ်ဇြဳပၞာန်တုဲ ထပ်ပလံၚ်ဒၟံၚ်သီုကဵုဇြဟတ်ပၞာန်ဂမၠိုၚ်ရောၚ် တမ်ရိုဟ်ပရိုၚ်ဒေသဂမၠိုၚ် သ္ဂးအိုတ်ရ။
ပ္ဍဲဂၠံၚ်ကြုၚ်ဒဵု−ကအ်ကြိက်ဂှ် ဒှ်ဒၟံၚ်ပေါဲဗ္တိုက် သ္ကာတ်မြဟ်ဒၟံၚ်တုဲ ပ္ဍဲဗ္ဒိုပ်ဗျူဟာဝဝ်လေ သှ်ေဒၟံၚ်ဂှ်လေဝ် ပေါဲဗ္တိုက်ဆေၚ်မုက် ဆက်ဒှ်ဒၟံၚ်တုဲ ဒပ်ပံၚ်ကောံပၠန်ဂတးတအ် ဆက်ထောံမခတိုဟ်ဗ္တိုက်ဒၟံၚ် ကုန်ဗ္ဒိုပ်ဗျူဟာဝဝ်လေ နကဵုဒရုၚ်ရောၚ် ထ္မံက်ထ္ၜးလဝ် ပ္ဍဲပရိုၚ်သေံဂမၠိုၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU
