တဳဟဳရာန်၊ ဂျူလာၚ် ၁၅
ယဝ်ဒုၚ်ကဵုလျိုၚ် ဟွံထပ်ဗ္တိုက်ညးတအ်ရမ္ဂး ကလေၚ်စအာပေါဲသဳကၠဳနျူကလဳယျာ ကုအမေရိကာန်ဏောၚ် ဝန်ဇၞော်ကာဍုၚ်သ္အာၚ် အဳရာန် ဟီုရ။
သွက်ဂွံသဳကၠဳ စပ်ကဵုကိုန်စဳမာန်နျူကလဳယျာညးတအ်ဂှ် ဆန္ဒနွံဒၟံၚ်လၟိုန်တုဲ အနာဂတ်ဂတတေံလေဝ် ဂွံသဳကၠဳအာဂှ် ၜိုန်ဒှ်ဒၟံၚ်ဒတုဲကီုလေဝ် ကၠာပေါဲသဳကၠဳနျူကလဳယျာဂမၠိုၚ် ဟွံဂွံစဂှ် တၚ်ဒုၚ်လျိုၚ် မဟွံပတဝ်က္ဍိုပ်ကဵုပေါဲပၞာန်ဂှ် ဒးကဵုထေက်ရောၚ် ဝန်ဇၞော်ကာဍုၚ်သ္အာၚ်အဳရာန် အာရက်ချဳ ဟီုလဝ် ကုကလုတ်ဖျေံသ္ဇိုၚ်တဳဟဳရာန်ရ။
ညံၚ်ရဴအေဿရေ ကေုာံ အမေရိကာန်တအ် ဗ္တိုက်လဝ်ရုၚ်စက်နျူကလဳယျာအဳရာန်ဂှ် ထပ်သ္ပအာဟွံသေၚ် ဂွံတၚ်ဒုၚ်လျိုၚ်သာ်ဏံကၠာမှ ကလေၚ်စအာပေါဲသဳကၠဳနျူကလဳယျာဏောၚ်ဂှ် ညးဟီုရ။
ဟိုတ်နူဗ္တိုက်ကၠုၚ်လဝ် ရုၚ်စက်နျူကလဳယျာအဳရာန်တံဂှ်တုဲ ဂွံဂွံသွဟ်မွဲ မဒုၚ်သ္ဇိုၚ်ကဵုပရေၚ်ပညဳပညပ်တအ်ဂှ် သာတုဲဝါတ်ဂါတ်ခက်ခုဲအာရောၚ် ဝန်ဇၞော် အာရက်ချဳ ဟီုရ။
ကြဴနူပရေၚ်ဗ္တိုက်ဏံတုဲဂှ် အဳရာန် ဒေါအ်လဝ်ပရေၚ်ပံၚ်တောဲ ကုအေဂျေန်ဇြဳဂၠိုက်ဂၠါဲစၟဳတ် IAEA နူကုလသမဂ္ဂဂှ်တုဲ သ္ကိုပ်ဂၠိုက်ဂၠါဲစၟဳတ်ဂမၠိုၚ် ကလေၚ်တိတ်အာ နူအဳရာန်ရ။
ဒုၚ်သ္ဇိုၚ်ကဵုလ္တူဒတုဲဖဵုအဳရာန်တုဲ အတိုၚ်သၞောဝ်အဳရာန်ဂှ် ချပ်အာသွက်ဂွံဒုၚ်တဲ တၚ်အာတ်မိက်အေဂျေန်ဇြဳဏံ သ္ဂောံစၟဳတ်ဂှ်ရောၚ် ဝန်ဇၞော်အာရက်ချဳ သ္ဂးရ။
ဟိုတ်နူအေဿရေ ကေုာံ အမေရိကာန် ဗ္တိုက်ကၠုၚ်ဂှ်တုဲ အန္တရာယ်ဂွံဗတိုဟ်ထ္ကးတအ်ဂှ် ဇၞော်မံၚ်ဖိုဟ်တုဲ ယဝ် IAEA စၟဳတ်မ္ဂးလေဝ် ကဵုက္ဍိုပ်တုဲချပ်အာ ပရေၚ်ဂီုကၠီုအဳရာန်ဏောၚ်ဂှ် ညးဟီုရ။
အဳရာန် အာတ်မိက်လဝ် အခေါၚ်သ္ဂောံဆက်သ္အးဇ္ၚးအာ ယူရေနဳယာန် အပ္ဍဲဍုၚ်တုဲ သမ္မတအမေရိကာန် ဒဝ်နေဝ်ထြာမ်ဂှ်တှ်ေ သ္အးဇ္ၚးယူရေနဳယာန်ဟွံဂွံရောၚ် ဟီုလဝ်ရ။
နကဵုအဳရာန် ယဝ်ထပ်ဘပဠကၠုၚ်မ္ဂး ထပ်ဗ္တိုက်အာဏောၚ် ဝန်ဇၞော်ကာစဵုဒၞါ အေဿရေ ဟီုရ။
အဳရာန် သ္အးဇ္ၚးဂွံလဝ် ယူရေနဳယာန် ၆၀ တၟံကၠံပြၚ်တုဲ သွက်ဂွံကၠောန်ပ္တိတ်လွဟ်ဂှ် ဒးသ္အးဇ္ၚး စဵုကဵု ၉၀ တၟံကၠံရ။
ဟိုတ်နူပရေၚ်အမေရိကာန်တအ် ဗတိုက်ကၠုၚ်ဂှ်တုဲ ရုၚ်စက်နျူကလဳယျာအဳရာန် လီုလာ်ဒးအာတၟာဂလိုၚ်တုဲ သွက်ဂွံစၟဳတ် ဗၞတ်ဗ္ၜတ်လီုလာ်အာဂှ် သၞာဲဒဴအဳရာန်ဂမၠိုၚ် အာဟွံစိုပ်ဒှ်မံၚ်ရောၚ် သမ္မတ မာသံက် ပဳဇက်ခဳယာန် ဟီုလဝ်ရ။
Ref: AP