ဝါယှေန်တာန်၊ ဂျူလာၚ် ၁၆
သမ္မတအမေရိကာန် ဒဝ်နေဝ်ထြာမ် ထ္မံက်ထ္ၜးအစဳဇန် မပလံၚ်အာလွဟ်လက်နက် ဇရေၚ်ယူကရုၚ် နူကဵုဂကောံနေတဝ်မွဲကဆံၚ်တုဲ ယဝ်ရရုယှာ ဟွံပတုဲကၠေံပေါဲပၞာန်ယူကရုၚ် အပ္ဍဲပွိုၚ် ၅၀ တ္ၚဲမ္ဂး ရုယှာ ထပ်တုဲဒးဆေၚ်အာမုက် ကုပရေၚ်ကၟာတ်လဒဵုတပ်ဒဏ် စပ်ကဵုပရေၚ်ပိုန်ဒြပ်တံဂှ်ရောၚ် ပ္ဍဲဂိတုဂျူလာၚ် ၁၄ တေံ ဟီုလဝ်ရ။
ၜိုန်ရပတိတ်ကၠုၚ်ဒၟံၚ်ဇြဟတ် သွက်ပရေၚ်ၜိုဟ်လလမ် ဗွဲမသၟဟ်အစောံကီုလေဝ် ဟိုတ်နူဟွံတောတက်ကၠုၚ်ဂှ်ရ စပ်ကဵုသမ္မတရုယှာ ဗလာဒဳမာပူတေန်တုဲ စိုတ်ဟွံမိပ်ဒှ်မံၚ်ရောၚ် ထြာမ် ဟီုကၠုၚ်ရ။
အပ္ဍဲပွိုၚ် ၅၀ တ္ၚဲ ယဝ်ဟွံဂွံတၚ်တုပ်စိုတ်မ္ဂး မ္ဒးကေတ်အာအရေဝ် မဇၞော်ကဵုဇြဟတ်တံဏောၚ်ဂှ် ထြာမ် ဟီုကၠုၚ်လဝ် အခိၚ်ဆဵုဂဗလဝ် ကုညးအုပ်ကာ ဂကောံနေတဝ် မက်ရူတဳ ပ္ဍဲရုၚ်မၞုံဗီုပြၚ်ခၟာဲအဒါဂှ်ရ။
အပ္ဍဲပွိုၚ် ၅၀ တ္ၚဲ ယဝ်ရုယှာ ဟွံဂွံတၚ်တုပ်စိုတ်မ္ဂး ကေတ်အာအရေဝ် သီုလ္တူညးမတောဲကၠောန်ဒၟံၚ်ပရေၚ်ပိုန်ဒြပ် ကုမဝ်သဂိုဝ်တံဂှ်ဏောၚ် ထြာမ် ဟီုလဝ်ရ။
ဂကောံနေတဝ် ရာန်ကေတ်လွဟ်အမေရိကာန် ပါလုပ်သီုကဵု သၞောတ်စဵုဒၞါကမ်လှောဝ် Patriot ၚုဟ်မးမၞုံဂၠိုၚ်ကဵုဗဳလျာန်ဒဝ်ဠာဂှ်တုဲ ပလံၚ်ဗစိုပ်ရီုဗၚ်ကဵုအာ ယူကရုၚ်ရ။
ပ္ဍဲကဵုဍုၚ်ရာန်ကေတ်လွဟ်အမေရိကာန် သွက်ဂွံရီုဗၚ်ယူကရုၚ်ဂှ် ဂျာမနဳ၊ ကနေဒါ၊ ဒေန်မက်၊ ဝှေန်လာန်၊ နေဝ်တာလာန်၊ နဝ်ဝေ၊ သွဳဒေန် ကေုာံ ဍုၚ်ဗျိတိၚ်တံ ပါလုပ်ရ။
အစဳဇန်ထြာမ် သ္ဂောံထံက်ပၚ်အာလွဟ်လက်နက် ယူကရုၚ်တံဂှ်ဝွံ တၞဟ်ခြာဒၟံၚ် နူကဵုလက်ထက်ဂျဵုဗိုၚ်ဒေန်တုဲ နကဵုအမေရိကာန် ကလိဂွံအာသြန်လုပ် နူကဵုပရေၚ်ထံက်ပၚ်လွဟ်လက်နက်ဏံ မဒှ်ရ။
ပ္ဍဲလက်ထက်ဗိုၚ်ဒေန်တေံ ထံက်ပၚ်ကဵုလဝ်လွဟ်လက်နက် ကုယူကရုၚ် မသက္ကုၚုဟ်တုဲ အခါလၟုဟ် ထြာမ် သွံတြးကၠုၚ်ဒၟံၚ်လွဟ်တံဏံရ။
Ref: AFP