ဒပ်မန်၊ ကရေၚ် ကေုာံ ကရေၚ်ဍာဲ တုပ်စိုတ် သွက်ဂွံပံၚ်တောဲနဒဒှ်မဟာမိတ်ပရေၚ်ပၞာန်

မတ်မလီု၊ ဂျူလာၚ် ၁၆

ဂကောံမၞုံဒေသသ္ကုတ်သၠုၚ်ကျာဍုၚ်ဗၟာ ဂကောံကရေၚ်ဍာဲ၊ ကရေၚ် ကေုာံ မန် ထ္ပက်လဝ်စၟတ်တဲ သွက်ဂွံပံၚ်တောဲလုပ်အာပေါဲဗ္တိုက် နဒဒှ်မဟာမိတ်ပရေၚ်ပၞာန်ရောၚ် နာဲဇဲယ ဥက္ကဌကဝ်မတဳက္ဍိုက်ပ်ပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ AD/ ဒပ်မန်ရာမည ဟီုရ။

ဂလာန်မဟီုလဝ် ပ္ဍဲဂိတုဂျောန် ၂၄ တုဲကၠုၚ်တေံ ပ္ဍဲအသေအဟာန်ဖျေံဘာ ကွတ်ဗ္တောန်သ္ဇိုၚ်ပၞာန် လၟေၚ် ၄ နူကဵုဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD/ ဒပ်မန်ရာမည မပံက်လဝ်ဂှ် လလောၚ်ပ္တိတ်လဝ် ပ္ဍဲဂိတုဂျူလာၚ် ၁၃ ဏံ ဗွဲမလုပ်သၞောဝ်ရ။

စပ်ကဵုပရေၚ်ဒက်ပ္တန်လဝ်ဒပ်မန်ရာမည နူကဵုဒပ်ပၞာန်ဗၠးၜးကောန်ဂကူမန် MNLA-AD ကဵု ဒပ်ပၞာန်ဗၠးၜးဍုၚ်မန် MLA တအ် ပံၚ်တောဲလဝ်ဂှ်တုဲ နူကဵုဒပ်တအာၚ် TNLA သ္ပလဝ်စၟတ်သမ္တီရောၚ် နာဲဇဲယ သ္ဂးရ။

ဆ္ဂး ယၟုဂကောံပၠန်ဂတးရပ်လွဟ်ကောန်ဍုၚ်အရၚ် နူကရေၚ်ဍာဲကဵု ကရေၚ်တအ်ဂှ်တှ်ေ ဟွံဟီုပတိတ်လဝ်ရ။

ပ္ဍဲကဵုဂကောံကရေၚ်ဍာဲ မပၠန်ဂတးဒၟံၚ် သၞောတ်တၠအဝဵုပၞာန်ဂှ် ဗော်တောတက်ကောန်ကရေၚ်ဍာဲ KNPP ကဵု ဒပ်စဵုဒၞါကောန်ဂကူကရေၚ်ဍာဲ KNDF တအ် ပါလုပ်တုဲ ပ္ဍဲဂကောံကရေၚ်ဂှ်တှ်ေ ဗော်သွးကောန်ဂကူကရေၚ် KNU အာမံၚ်က္ဍိုပ်ရ။

နာဲဇဲယ ဟီုကၠုၚ်လဝ် ဒဒှ်ရဒပ်ရပ်လွဟ်မန်မွဲ မလုပ်မံၚ်ပေါဲဗ္တိုက်ပၠန်ဂတးဂှ် တုပ်လဝ်စိုတ် ဗွဲအပြောံ သွက်ဂွံပံၚ်တောဲပါလုပ်အာ ပ္ဍဲဒပ်မန်ရာမညဂှ်တုဲ ယၟုဂကောံဂှ်တှ်ေ ညး ဟွံဂွံဟီုပ္တိတ်လဝ်ရ။

ဂကောံပၠန်ဂတးရပ်လွဟ်မန် သှ်ေဒၟံၚ်တအ်ဂှ်လေဝ် ဂွံပံၚ်တောဲပါလုပ်အာ ပ္ဍဲဒပ်မန်ရာမည ဂွံလုပ်အာပေါဲဗ္တိုက်မွဲစွံဂှ် ညးတအ်ပံက်လဝ်တြၚ်တုဲ ဆက်သဳကၠဳဒၟံၚ်နွံရောၚ် ညးဟီုဏာလဝ် ပ္ဍဲအသေအဟာန်စှ်ေဘာဂှ်ရ။

တၞဟ်နသ္ဂောံဗ္တိုက်သရိုဟ်သၞောတ်တၠအဝဵုပၞာန်၊ ဍုၚ်မန်မဍိုက်ပေၚ်ကဵုအခေါၚ်တုပ်သၟဟ် ကေုာံ ကံကုသိုလ်ဇကု ဇကုဖန်ဖက်ကေတ် ဂွံမံက်ဂတဝ်ဂှ် ဒပ်ရပ်လွဟ်မန်ၜါ ဒက်ပ္တန်လဝ်ဒပ်မန်ရာမည RMA ပ္ဍဲဂိတုမေ ၄ တုဲကၠုၚ်တေံရ။

အခိၚ်လၟုဟ် ပ္ဍဲကဵုဂကောံရပ်လွဟ်မန်ဂမၠိုၚ် ဒပ်စဵုဒၞါဍုၚ်မန် MSDF ၊ ဒပ်ပၠန်ဂတးဍုၚ်မန် MSRF ကေုာံ ဒပ်မန်ရာမည RMA တအ် နွံတုဲ အပ္ဍဲဒေသဂှ်တှ်ေ ဂကောံ PDF ကေုာံ ဂကောံပၠန်ဂတးတၞဟ်ဟ်လေဝ် နွံကီုရ။

ပရိုၚ်−သြၚ်လောန်တိုၚ်(မ်)

ဗီုရုပ်− NMSP-AD/ RMA