နေဗျဳဒဝ်၊ ဂျူလာၚ် ၁၆
ကံၚ်ဇြဳပၞာန် စှ်ေလဝ်စိုတ် ယဝ်ကၠောန်ဗဒှ်ပေါဲရုဲမာဲမွဲမာန်မ္ဂး ညးတံလုပ်သၞောဝ်တုဲ ဂွံကၠုၚ်ပၞော်တိတ် သွက်အကြေပ်အဂြတ်နာနာ မဒးဆေၚ်မံၚ်မုက်ပ္ဍဲဍုၚ် မပ္တံကဵုပရေၚ်ပၞာန်၊ ပရေၚ်ဍုၚ်ကွာန်တအ်ဂှ်ရ။
ဟိုတ်ဂှ်ရ ပ္ဍဲကာလသီအဝဵုဏံ ကံၚ်ဇြဳပၞာန် ဒစးဒုၚ်ပလေဝ်ပလေတ်ကၠုၚ်လဝ် သွက်ဂွံရပ်စပ်အာစက်ကဵုမာဲ အဳလက်ထရဝ်နေတ် ပ္ဍဲကဵုပေါဲရုဲမာဲ မကၠောန်ဗဒှ်အာကဵုသ္ကုတ် သ္ပဟိုတ်နူကဵုအကာဲအရာဒှ်မံၚ်ပ္ဍဲကၟိန်ဍုၚ်ဏံဂှ်ရ။
ကၠောန်အာပေါဲရုဲမာဲ အလုံဍုၚ်မွဲ ပ္ဍဲ ၂၆၀ ပွိုၚ်ဍုၚ်ပြၚ် နကဵုသ္ကုတ်ဏောၚ်တုဲ ပ္ဍဲကဵုဗော်ပရေၚ်ဍုၚ်ကွာန် လုပ်ပြိုၚ်အာဂမၠိုၚ်ဂှ် ဗော်ကျခိုၚ်ယျေ မဒှ်ဗော်ဒပ်ပၞာန်ထံက်ဂလာန်ဂှ်တှ်ေ ဒှ်ဇြဟတ်ဇၞော်အိုတ်ရ။
ပ္ဍဲကဵုပေါဲရုဲမာဲ ကံၚ်ဇြဳပၞာန်ဍိုက်ပ်တုဲကၠောန်အာ ပ္ဍဲဍုၚ်ဗမာဏံဂှ် စကာစက်ကဵုမာဲအဳလက်ထရဝ်နေတ် အလန်ကၠာအိုတ်တုဲ ပြံၚ်လှာဲရပ်စပ်အာ သၞောတ်သ္ပစၞးခလပ်ဆ PR ကဵု သၞောတ်ညးဂွံမာဲဂၠိုၚ်ဂွံဇၞး FPTP တအ်ရ။
စပ်ကဵုပရေၚ်မရပ်စပ်အာသၞောတ်ၜါသာ်ဏံတုဲ ကၠတ်ထဝ်မဆေၚ်စပ်တအ် ရပ်စပ်အာသၞောတ်လဵု နဗီုပြၚ်လဵုရောဟီုဂှ် စဵုကဵုအခိၚ်လၟုဟ် လ္ပာ်ကံၚ်ဇြဳပၞာန် လလောၚ်ပ္တိတ်စၞောန်ပျးကၠုၚ်လဝ် သၞောဝ်ဥပဒေ နဲသၞောဝ်ဥပဒေ ဟွံမွဲဏီရ။
ဟိုတ်ဂှ်ရ စက်ကဵုမာဲအဳလက်ထရဝ်နေတ် ရပ်စပ်စကာအာသွက်ဂွံကဵုမာဲဂှ်ကဵု သၞောတ်သ္ပစၞးခလပ်ဆ PR တအ်ဂှ်လေဝ် ဒှ်ဒၟံၚ်အလန်ကိုပ်ကၠာအိုတ်တုဲ ပရေၚ်ဟွံဗဗွဲဓဝ်စပ်ကဵုနဲကွတ်ပညာ နူကဵုဗဟဵုမထိၚ်လဝ်ဂှ်လေဝ် ဒှ်ကၠုၚ်မာန်ရောၚ် ဒှ်ဒၟံၚ်သၠေဟ်ပၟာနွံရ။
ညံၚ်ဂွံဒှ်ပေါဲရုဲမာဲဗၠးၜးဗဗွဲဓဝ်၊ ညံၚ်စရၚ်မာဲဗၠေတ်မှာဟွံဂွံမွဲ၊ မမာဲဟွံဗဗွဲဓဝ် ညံၚ်ဟွံဂွံဒှ်ဂှ် ကံၚ်ဇြဳပၞာန် ဒစးဒုၚ်ပလေဝ်ပလေတ်ဒၟံၚ်ရောၚ် ဟီုကြီုဒၟံၚ်လၟိုန်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ဗော်ခါန်ကၞက်ပ္တိုန်က္ဍိုပ်သ္ကိုပ်ပၞာန် နဒဒှ်သမ္မတမာန်ဂှ်ရဟေၚ် ဂွံဇၞးဏောၚ်တုဲ စပ်ကဵုသွဟ်ပေါဲရုဲမာဲဂှ်တုဲ ညံၚ်ပရေၚ်မယောၚ်ယာဗၠေတ်မှာဂွံအောန်ဂှ် ညးတအ်ကၠောန်အာဏောၚ် သ္ၚဳဂၠိပ်လဝ်ရ။
“ဂကောံဗော် မခါန်ကၞက်ပ္တိုန်ညး သမ္မတမာန်ဂှ်ရဟေၚ် ဂွံဇၞးဏောၚ်။ တပ်တး ဟွံတပ်ဟးဂှ် ဟွံဒးဟီုမံၚ်ရ။ နကဵုစက်ဏောၚ်တှ်ေ ညးမွဲမှလေဝ် အာစၟဳတ်ဟွံဂွံပုဟ်လေဝ်။ ကၠောန်လဝ်ကဵုနဲကွတ်ပညာ ရုယှာတအ်၊ ကြုက်တအ်ဂှ်တုဲ သွဟ်ဍေံ ဍာံပြ သ္အးဇ္ၚးမံၚ်ဏောၚ် ပရေၚ်ဗၠေတ်မှာယောၚ်ယာလေဝ်အောန် နဗီုပြၚ်သာ်ဏံဂှ် လလောၚ်တြးအာဏောၚ် ဟီုဂွံရ” သာ်ဝွံ သ္ဂးရ။
ပ္ဍဲစက်ကဵုမာဲအဳလက်ထရဝ်နေတ်ဂှ်တှ်ေ စက်ထိၚ်၊ စက်ကဵုမာဲ၊ စက်ထ္ၜးကဵုဒးဗၠေတ်၊ ကဠာမာဲ ကေုာံ ဗီုပြၚ်စွံပတန်လဝ်ဗာတ္ထရဳ တအ်ဂှ် ကောန်ဂကောံကဝ်မယှေန်ပေါဲရုဲမာဲကၟိန်ဍုၚ် သောၚ်ကလးကဵုလဝ် ကောန်ဂကောံကံၚ်ဇြဳပၞာန်တံတုဲရ။
စပ်ကဵုသၞောတ်သ္ပစၞးခလပ်ဆ PR တုဲ သွက်ဂွံကၠောန်အာ စရၚ်ယၟုအလံၚ်ညးစၞးဂွံဒုၚ်ရုဲစှ် နကဵု Clost List PR ဂှ်နွံတုဲ သၞောတ်ဏံဂှ် ရပ်စပ်စကာအာ ပ္ဍဲကၠတ်ထဝ်ကောန်ဂကူကဵု ကၠတ်ထဝ်ရးဒေသ/ တွဵုရးဏောၚ်ဂှ် ဂွံတီကေတ် နူကဵုဗော်ပရေၚ်ဍုၚ်ကွာန်လ္ၚဵုရ။
မွဲလ္ပာ်ဂှ်ပၠန် သွဟ်ပေါဲရုဲမာဲဝွံ ဒးဒှ်သွဟ် ဒပ်ပၞာန်ဗၟာတုပ်စိုတ်မာန်ဂှ်ဏောၚ် ကဝ်မယှေန်ပေါဲရုဲမာဲ ကံၚ်ဇြဳပၞာန် ဟီုကၠုၚ်လဝ် ကုက္ဍိုပ်သ္ကိုပ်ဗော်ပရေၚ်ဍုၚ်ကွာန် ပတိုန်လဝ်စရၚ် လ္ၚဵုတအ် ဗွဲမလုပ်သၞောဝ်ရ။
ဥက္ကဌကံၚ်ဇြဳပၞာန် သ္ကိုပ်ပၞာန်ဇၞော် မေန်အံၚ်လှာၚ် သွက်ဂွံဂွံလၟိဟ် မမာဲထံက်ဂလာန် သွက်ဂွံဒှ်သမ္မတ မဂွံဒုၚ်ရုဲစှ်ဂှ် ပတိတ်ဒၟံၚ်ကသပ် သ္ဂောံကဵုသၞာဲဒဴဗိုလ်ပၞာန်ညးမတှ်ေဖျေံစိုတ်ဂမၠိုၚ် လုပ်ပြိုၚ်ပေါဲရုဲမာဲတုဲ သွက်ဂွံလုပ်စိုပ်ပ္ဍဲကၠတ်ထဝ်ဂှ်လေဝ် နွံဒၟံၚ်ပလန်ရ။
သ္အာၚ်နူဂှ်ပၠန် ပ္ဍဲအရာဒက်ပ္တန်လဝ် ဂကောံကဝ်မယှေန်ပေါဲရုဲမာဲ အဆံၚ်ၚ်ဂှ် ပ္ဍဲဂိတုဂျောန် ၁၉ တေံ ညး ကလေၚ်သ္ပဒတန်လဝ်သၞောဝ်ကဝ်မယှေန်ပေါဲရုဲမာဲကၟိန်ဍုၚ် မဒှ်သၞောဝ်ခါန်ကၞက်ပ္တိုန်သ္ဇိုၚ်ဝန်ကၟိန်ဍုၚ်ဂမၠိုၚ် နဒဒှ်ဥက္ကဌဂွံရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ အရာက္ဍိုပ်သ္ကိုပ်ပၞာန်ကၠာတေံ ကၠောန်ကၠုၚ်ဟွံမာန်ဂှ် နကဵုမေန်အံၚ်လှာၚ် ဟွံဒှ်ညံၚ်ဂွံဒှ် ကၠောန်အာဏောၚ်တုဲ ညံၚ်ဂွံဂွံသွဟ်အတိုၚ်ပၟိက်စိုတ်ညးတအ်ဂှ် ကၠောန်ကၠုၚ်ဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တၚ်ရန်တၟံမေန်အံၚ်လှာၚ်ဂှ်လေဝ် မိက်ဂွံဒှ်သမ္မတ မလုပ်သၞောဝ်မွဲ။ အခိၚ်လၟုဟ်ဂှ်တှ်ေ ဒှ်မံၚ်သမ္မတ ဟွံလုပ်သၞောဝ်။ ဆ္ဂး အရာကၠောန်ပေါဲရုဲမာဲတုဲဒှ်ကၠုၚ်ဂှ် ညးတေံ မိက်ဂွံအာ နကဵုအပြံၚ်အလှာဲပရေၚ်ဍုၚ်ကွာန်။ အရာက္ဍိုပ်သ္ကိုပ်ပၞာန် တာန်ယှိုဲတအ် ကၠောန်ကၠုၚ်ဟွံမာန် ကၠာတေံဂှ် ညးတေံ မိက်ဂွံကၠောန်မံၚ်။ နူတမ်ဝါဒိတေံ ညံၚ်ဂွံကၠောန်သာ်ဏံဂှ်လေဝ် ရဲနွံလ္ပာ်ညးတေံ ကဆော်ကၠုၚ်မံၚ်လၟိုန်ရ။ အေ ဂှ်တှ်ေ မမာဲဍာံ ဟွံဍာံဂှ်စွံလဝ်ကၠာ ဗီုဍေံတံမိက်ဂွံကၠောန်ဂှ်ရ ကၠောန်အာဏောၚ်” သာ်ဝွံ သ္ဂးရ။
အခိၚ်လၟုဟ်ဂှ်လေဝ် ပ္ဍဲပေါဲရုဲမာဲသ္ဂောံကၠောန်ဗဒှ်အာဏံဂှ် ဂွံရပ်စပ်စကာအာ စက်ကဵုမာဲအဳလက်ထရဝ်နေတ် ချိုတ်တ်ပၠိုတ်တ် ဗွဲမစိုန်သ္ကီုဂှ် စတုဲကဵုကၠုၚ်မံၚ်တန်ဗ္တောန် ကုသ္ဇိုၚ်ဝန်ပရေၚ်ပညာ အ္စာ၊ အ္စာဗြဴဂမၠိုၚ်ရ။
ပ္ဍဲလိက်ပရိုၚ်တြးဝါဒ ကၟိန်ဍုၚ်ပိုၚ်ဂှ်တှ်ေ ပ္ဍဲဂိတုဂျူလာၚ် ၁၄ တေံ ကၠောန်ဗဒှ်လဝ်အခန်ကၞာပံက်တန်ဗ္တောန် ဗီုပြၚ်ဂွံရပ်စပ်စကာ စက်ကဵုမာဲအဳလက်ထရဝ်နေတ်ဗၟာ MEVM ပ္ဍဲကဵုပွိုၚ်ဍုၚ် နူရးလ္ဂုၚ် ကေုာံ ရးဨရာဝတဳတံရောၚ် လလောၚ်ပ္တိတ်လဝ်ရ။
ပံက်အာတန်ဗ္တောန်ပွိုၚ် ၂၀ တ္ၚဲဏောၚ်တုဲ ဗ္တောန်ကဵုအာ သ္ဇိုၚ်ဝန်နူဌာနမဆေၚ်စပ်ဂမၠိုၚ်၊ အ္စာ အ္စာဗြဴ ယိုက်ဂၠေၚ်အာတာလျိုၚ် ပ္ဍဲရုၚ်မာဲတံဂှ်ဏောၚ်တုဲ ပ္ဍဲကဵုလၟေၚ်တန်ဗ္တောန်တံဂှ်လေဝ် ဆက်ပံက်အာ တန်ဗ္တောန်ပွိုၚ်ၜါတ္ၚဲတံဂှ်ဏောၚ် သ္ဂးလဝ်ရ။
ဗီုဒက်ပ္တန်ကၠောန်လဝ်စက်ကဵုမာဲ၊ ဗီုဂွံစၟဳစၟတ်စက်ကဵုမာဲ၊ ကၠာပေါဲရုဲမာဲဏံ သွက်ဂွံဒစးဒုၚ်ပလေဝ်ပလေတ် ကေုာံ စမ်ၜတ် စက်ကဵုမာဲ ပ္ဍဲရုၚ်မာဲ၊ ဗီုပြၚ်ဂွံရပ်စပ် ပ္ဍဲတ္ၚဲပေါဲရုဲမာဲ၊ ရိုဟ်လၟိဟ်မာဲ၊ ကမၠောန်မဒးရေၚ်တၠုၚ် ယဝ်ပၟိက်ကာမံက်တိုန်ဒှ်ကၠုၚ်တအ်၊ အကာဲအရာ မဒးရိုဟ်လၟိဟ်မာဲတအ်ဂှ် ဗ္တောန်အာကဵု သီုလိက် သီုနတဲဏောၚ် ထ္မံက်ထ္ၜးလဝ်ရ။
ပ္ဍဲသၞောဝ်သ္ဇိုၚ်ကဝ်မယှေန်ပေါဲရုဲမာဲကၟိန်ဍုၚ်ဂှ် ကၞောတ်သၞာံတုဲကၠုၚ်တေံ စုတ်လဝ်ဌာနစက်ကဵုမာဲအဳလက်ထရဝ်နေတ် EVM တုဲ သၠဲပတိတ် ကလေၚ်ဒက်ပ္တန်လဝ်ရောၚ် ဂွံတီကေတ် နူကဵုဌာနလလောၚ်ပရိုၚ်ဍုၚ်ဗၟာ မလလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၃၁ တေံရ။
ပရိုၚ်−သြၚ်လောန်တိုၚ်(မ်)
ဗီုရုပ်− MOI