ၜၚ်ကံက်၊ ဂျူလာၚ် ၁၇
သ္ကိုပ်ဝန်ဇၞော်သေံ ဗဴဓံၚ်ဓါန် ယှေန်နာဝါတ် ဒးဇူဒီုလဝ် နူကဵုကဆံၚ်သ္ကိုပ်ဝန်ဇၞော် ဟိုတ်နူတၚ်စောဲစပ် ဝးပ္ကဝ်ဒ္ဂေတ်ပဋိပတ် သ္ပဟိုတ်နူကဵုပရေၚ်ညးမတက်ကျာလဝ်ဖုၚ် ကဵုဟောန်သာန် က္ဍိုပ်သ္ကိုပ်တြေံ ကာမ္ဗောဒဳယျာဂှ်တုဲ ဂကောံဗ္တိုက်သရိုဟ် ပရေၚ်ဟွံဒ္ဂေတ်ဗက်ပဋိပတ်တအ် ဂၠိုက်ဂၠါဲစၟဳတ်အာညးဏောၚ်။
စပ်ကဵုကိစ္စဏံတုဲ နူကဵုရုၚ်သၞောဝ်ဓဝ်သၞောဝ်သ္ဇိုၚ် ကရေပ်ဓရတ်ကၠုၚ် အလဵုအသဳသ္ကိုပ်ဝန်ဇၞော် ဗဴဓံၚ်ဓါန် မဒးဒေါအ်ဇူလဝ်ဂှ် မွဲဝါပၠန်ရ။
ပရေၚ်တက်လဝ်ကျာဖုၚ် မမံက်ပြးကၠုၚ် ပ္ဍဲဂိတုဂျောန် ၁၅ ဂှ် သ္ကိုပ်ဝန်ဇၞော် ဗဴဓံၚ်ဓါန် ဗွဲမဇအ်သဝ် တက်ကျာဟီုဂးလဝ် ကုဟောန်သာန်တုဲ ပတိုန်လဝ်ဒုဟ် ကုသ္ကိုပ်က္ဍိုက်ပ်ပၞာန်သေံရ။
အပ္ဍဲဍုၚ်ဂှ်တှ်ေ ညး ဒးဆေၚ်လဝ်မုက်ကဵု ပရေၚ်ပါ်ပါဲဇၞော်ကဵုဇြဟတ် ဒဒှ်မသ္ကိုပ်ဝန်ဇၞော် ဗ္ဒေက်ဖျဝ်ကၠေံ ဂုန်သိက္ခာဍုၚ်သေံ ကေုာံ အဝဵုစၟိန်ပြမာန်ကၟိန်ဍုၚ်ရ။
နူကဵုဂကောံအလဵုအသဳပံၚ်ကောံဏံဂှ် ဗော်အဓိကမွဲ နုက်တိတ်အာတုဲ နကဵုအလဵုအသဳလၟုဟ် ဆၜိုတ်ဂွံထိၚ်လဝ်ဒၞါဲဂကောံမၞိဟ်ဂၠိုၚ်ဂှ်ဓဝ်ရ။
သွက်ဂွံဂၠိုက်ဂၠါဲစၟဳတ်အာ သ္ကိုပ်ဝန်ဇၞော်တြေံဂှ် ဒက်လဝ်ကဝ်မယှေန်တုဲကီုလေဝ် ဟွံဂွံသ္ဂုတ်သွာတ်အခိၚ်ဏီပုဟ်ဂှ် သၞာဲဒဴမွဲတၠ ဟီုရ။
ပ္ဍဲဌာန်ပရိုၚ်သေံဂမၠိုၚ်ဂှ်လေဝ် ထ္မံက်ထ္ၜးလဝ် ဒဒှ်ရသ္ဂုတ်သွာတ်လဝ် သွက်ဂွံဂၠိုက်ဂၠါဲစၟဳတ်အာ လ္တူဗဴဓံၚ်ဓါန်တုဲဣရ။
အမာတ်ကၠတ်ထဝ် ၃၆ တၠ စောဲစပ်လဝ် ဗဴဓံၚ်ဓါန် ဝးပ္ကဝ်ဒ္ဂေတ်ပဋိပတ်တုဲ နူရုၚ်သၞောဝ်ဓဝ်သၞောဝ်သ္ဇိုၚ် သွက်ဂွံသ္ဂုတ်သွာတ်ကဵုဂှ် အာတ်ပ္တိုန်လဝ်ရ။
ဗဴဓံၚ်ဓါန် ကလေၚ်ဒုၚ်လဝ်ဂုန် စပ်ကဵုပရေၚ်ကော်ကျာဒးဖုၚ်ဂှ်တုဲ ညး ဟီုကၠုၚ်လဝ် ဒဒှ်ရညးပ္တိတ်လဝ်ဇြဟတ် သွက်ဂွံသောၚ်ကလး ပြဒ္ဒညာမဒှ်ဒၟံၚ်ကုကာမ္ဗောဒဳယျာဂှ် ဗွဲမၜိုဟ်လလမ်ရ။
Ref: Reuters