ဘာအၚ်၊ ဂျူလာၚ် ၁၇
သၞောတ်တၠအဝဵုပၞာန် ညံၚ်အာယုက်ဂွံဂၠိၚ်အာဂှ် ကံၚ်ဇြဳပၞာန် ကၠောန်ထ္ၜးဒၟံၚ်ပရေၚ်ၜိုဟ်လလမ် ကုသၟာပရေၚ်ဍုၚ်ကွာန်ဗက်ဍာ်သာ မဟွံသ္ပစၞးညးဍုၚ်ကွာန်တအ်ဂှ်ကီု ပလေဝ်ပလေတ်ဒၟံၚ် သ္ဂောံကၠောန်ဗဒှ်ပေါဲရုဲမာဲကီုဂှ် ကၠောန်ကၠုၚ်မံၚ် ဃရက်ဃရက်ဂဗက်ဂဗက်ရောၚ် ဥက္ကဌ KNU ပဒိုဝ်သဝ်ဂွါထူဝေန် ဟီုလဝ်ရ။
ဥက္ကဌ ဗော်သွးကောန်ဂကူကရေၚ် KNU ပဒိုဝ်သဝ်ဂွါထူဝေန် ဟီုစုတ်လဝ် ပ္ဍဲလိက်သဝဏ် မပလံၚ်ဗစိုပ်လဝ် သွက်တ္ၚဲဒပ်စဵုဒၞါကောန်ဂကူကရေၚ် KNDO ပေၚ် ၇၆ သၞာံ ပ္ဍဲဂိတုဂျူလာၚ် စၟတ်တ္ၚဲ ၁၆ ရ။
ပ္ဍဲဒၞါဲဌာန်ဒေသကောန်ဂကူကရေၚ်တအ် မမံၚ်စံၚ်ဒၟံၚ်ဂှ်ကီု အလုံဍုၚ်မွဲကီုဂှ် ကံၚ်ဇြဳပၞာန် စွံပွန်ဗ္တိုက်ကၠုၚ်ဒၟံၚ်ညးဍုၚ်ကွာန်တအ် ညံၚ်ရဴသၞညးတအ်တုဲ ဗတိုက်ဂစိုတ်ဂယိုၚ်ကၠုၚ်ဒၟံၚ်ဂှ် အခိၚ်တ္ၚဲဏံ ဒးဆဵုညာတ်ဒၟံၚ် ဗွဲမအောန်စိုတ်ရောၚ် ဥက္ကဌ KNU သ္ဂးရ။
နကဵု KNDO သွက်ဂွံပံၚ်တောဲရေၚ်တၠုၚ်အာ ကုဂကောံပၠန်ဂတးကောန်ဂကူဘဝတုပ် မလုပ်မံၚ်ပေါဲဗ္တိုက် ဗ္တိုက်သရိုဟ်သၞောတ်တၠအဝဵုပၞာန်တအ်၊ ဂကောံဇြဟတ်ဒဳမဝ်ကရေဇြဳ၊ ဂကောံညးဗြဴဂမၠိုၚ်၊ ဂကောံသၟတ်ဂမၠိုၚ်ဂှ် ဒးလွဳပရာပတိတ်အာဇြဟတ်လၟိုန်ရောၚ် ပဒိုဝ်သဝ်ဂွါထူဝေန် ဖ္တိုက်ဖ္အောဝ်လဝ်ရ။
ကံၚ်ဇြဳပၞာန်ဝွံ ဂွံဆက်ကေမ်ၛာပ်အာအဝဵုညးတံမာန် တမ်ရိုဟ်ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ဘဏ္ဍာသီုဖအိုတ်ဂှ် က္ဍိုပ်သ္ကိုပ်ပၞာန်သီလဝ်အဝဵုဂမၠိုၚ် ကေုာံ ဂကောံဒုၚ်သြဇာညးတအ်ဂမၠိုၚ် ထိၚ်ဒက်လဝ်တုဲ ကုညးဍုၚ်ကွာန်မဒှ်အဝဲသၟတ်တအ်ဂှ် ပကောံကၠုၚ်ဒၟံၚ်ဗွဲအဓမ္မတုဲ ဗလးဏာဒၟံၚ် ပ္ဍဲမုက်ပၞာန်ဂှ် ဂွံဆဵုကေတ်ရောၚ် ပဒိုဝ်သဝ်ဂွါထူဝေန် သ္ဂးရ။
ညးမဒးယိုက်ဒၟံၚ်လျိုၚ်ပၞာန်ဗွဲအဓမ္မတအ် ပ္ဍဲမုက်ပၞာန်ဂှ် ၜိုန်ဒှ်သၞကီုလေဝ် ယဝ်မိက်ဂွံဖျေံလွဟ် ဒုၚ်ကျ ပံၚ်တောဲ ဇရေၚ်ညးတအ်မ္ဂး ဒးရေၚ်တၠုၚ်အာ အတိုၚ်လၟေၚ်ကမၠောန်မူဝါဒညးတံဏောၚ် ပဒိုဝ်သဝ်ဂွါထူဝေန် ဖတိုက်ဖ္အောဝ်လဝ်ရ။
သ္ကိုပ်ဗိုလ်ဇၞော် သဝ်ယှဳလေ နူကဵုဒပ်စဵုဒၞါကောန်ဂကူကရေၚ် KNDO ဂှ်လေဝ် နကဵုဒပ် KNDO သွက်ဂွံမၚ်မွဲစဵုဒၞါ ဂကူညးတအ်ဂှ် တာလျိုၚ်မၞုံတုဲ လျိုၚ်မ္ဒးဗတိုက်ပတိတ်အာသၞညးဍုၚ်ကွာန်ဂကူကရေၚ်တအ်ဂှ်လေဝ် ညးတအ် ဒးကေတ်အာလျိုၚ်ပေၚ်ၚ်ဏောၚ် ဟီုလဝ်ရ။
သ္အာၚ်နူဂှ်ပၠန် အခိၚ်တ္ၚဲဏံ ဂကူကရေၚ်ညးတအ် ပ္ဍဲပရေၚ်ညဳသာဂှ် ဇြဟတ်ဍိုန်ဒၟံၚ်ဏီတုဲ ဒးညဳသာသၟဟ်န်ဏောၚ်တုဲ ဂွံဂွံပရေၚ်အံၚ်ဇၞးဂှ် အလုံကောန်ဂကူကရေၚ်မွဲ သွက်ဂွံဘိုၚ်ရီုဗၚ်ကဵုအာဇြဟတ်ညးသ္ကအ်ဂှ် သ္ကိုပ်က္ဍိုက်ပ်ပၞာန် KNDO သ္ကိုပ်ဗိုလ်ဇၞော် သဝ်ယှဳလေ ဖတိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media