မတ်မလီု၊ ဂျူလာၚ် ၁၇
လ္တူဍုၚ်မတ်မလီု ဍုၚ်ဇၞော်တွဵုရးဍုၚ်မန် မၜိုဟ်သြိုဟ်ညိၚ်ဝတ်ဒၟံၚ်ဂှ် ကံၚ်ဇြဳပၞာန် ထ္ၜးဟိုတ်ကဵုဂီုကၠီုတုဲ ပြဟ်ပတိုန် အခိၚ်ကၟာတ်ဒဒန်လုပ်တိတ်ဍုၚ်ဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ နကဵုဟိုတ်ပရေၚ်ဂီုကၠီုဂှ် ပြဟ်ပတိုန်အခိၚ်ကၟာတ်ဒဒန်တုဲ ဒဒန်လုပ်တိတ်ဍုၚ်မတ်မလီု ဒဒန်သၚ်လောန် (မတ်မလီု) ကဵု ဒဒန်အတ္တရာန် (မတ်မလီု) တံ ပါလုပ်ရ။
ကၠာတေံ ကံၚ်ဇြဳပၞာန်တအ် ကဵုကၠုၚ်လဝ်အခေါၚ်တတ်ကၠောံအာကၠုၚ် ဒဒန်သၚ်လောန်ကဵု ဒဒန်အတ္တရာန် နူဂယး ၅ နာဍဳ စဵုကဵု ဗ္တံ ၉ နာဍဳတုဲ ပပ္တံနူဂိတုဂျူလာၚ် ၁၆ ဏံတုဲ ကဵုလဝ်အခေါၚ်တတ်ကၠောံအာကၠုၚ် နူဂယး ၆ နာဍဳ စဵုကဵုဗ္တံ ၈ နာဍဳရ။
ညးဒေသလ္တူဍုၚ်မတ်မလီုမွဲတၠဂှ်တှ်ေ ထ္ၜးဟိုတ်ကဵုပရေၚ်ဂီုကၠီုတုဲ ယှအ်ဖျေံလဝ်အခိၚ်ပံက်ဒဒန်တအ်ဂှ်ရ သွက်တၠဖျာ ပယျာံဂယးပြဟ်တံကီု သွက်ညးအာတရဴတံကီုဂှ် အခက်အခုဲနွံကၠုၚ်မာန်ရောၚ် ဟီုလဝ် လညာတ်ညးရ။
“ အဓိကဂှ်တှ်ေ တၠဖျာတအ် အာကၠုၚ်ဝါတ်ကျာတ်အာဏောၚ်။ ဆ္ဂးလေဝ် ဒၟါနူပရေၚ်ဂီုကၠီုဒဒန်ဂးတုဲ ပိုယ်တအ်လေဝ် မုဟီုဂွံဟွံသေၚ်။ တၚ်အခက်အခုဲဂှ်တှ်ေ ရဲသွံဖျာပယျာံဂယးတအ် ဒှ်ဒဒိုက်ဂၠိုၚ်ညိဏောၚ်။ ပယျာံသဝ်တ္ၚဲ ကၟာတ်ပြဟ်အာညိတုဲ ကွဳစက်အာတရဴတအ်ဂှ်တှ်ေ ဒှ်ကၠုၚ်အခက်အခုဲ နွံဏောၚ်” သာ်ဝွံ သ္ဂးရ။
ဟိုတ်နူကံၚ်ဇြဳပၞာန် ယှအ်ဖျေံအခိၚ်ပံက်ဒဒန် ပွိုၚ်ၜါနာဍဳတုဲ ကဆံၚ်မၞိဟ်သ္ဇိုၚ် မ္ဒးအာကလောန် စဴကလောန်တအ်ကီု၊ ညးသွံဖျာ၊ ညးကၠောန်ကလောန်အခိၚ်ဗ္တံတအ်ကီု၊ စနူကဵုညးဍုၚ်ကွာန်အာတရဴတံဒှ်တမ် ဒှ်ကၠုၚ်အခက်အခုဲမာန်ရ။
ထ္ၜးဟိုတ်ကဵုပရေၚ်ဂီုကၠီုတုဲ ကံၚ်ဇြဳပၞာန် ယှအ်ဖျေံအခိၚ်ပံက်ဒဒန်လုပ်တိတ်ဍုၚ်၊ ပတေၚ်ပရေၚ်ဂီုကၠီုတုဲ စၟဳတ်ဒၟံၚ် ပ္ဍဲဒဒန်တအ်ဂှ်ကီုလေဝ် မၞိဟ်မကၠတ်ပၠံၚ်ၜးကွဳလိုန်ဓာတ်တုဲ ဂြိပ်အာဍုၚ်တၞဟ်ဟ်တံဂှ်တှ်ေ ရပ်ဂွံလဝ် ဟွံမွဲရ။
ဟိုတ်နူကံၚ်ဇြဳပၞာန် ဖအောန်ဖျေံလဝ် အခိၚ်ပံက်ဒဒန်လုပ်တိတ်ဍုၚ်ဂှ်တုဲ အပ္ဍဲဒေသဂှ် ဇီုကပိုက်ကၠုၚ်ကဵု ပရေၚ်ကပေါတ်ဗၞိက်ဂြိပ်တအ်ဂှ်တုဲ ပရေၚ်အာကၠုၚ်တရဴတအ်လေဝ် အခိၚ်လအ်ကၠုၚ်မာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ