ပရေၚ်ရုပ်သီကရောၚ်ပၞာန်ရာမညဂှ် ဂွံအဓိပ္ပာယ်သာ်လဵုရော

မတ်မလီု၊ ဂျူလာၚ် ၁၇

ကရောၚ်ပၞာန်ပံၚ်တောဲရာမည နူကဵုဒပ်ပၞာန်မန် မလုပ်မံၚ်ပေါဲဗ္တိုက်ရပ်လွဟ် ထပိုတ်ရိုဟ်ကၞက်သၞောတ်တၠအဝဵုပၞာန်တအ် ဒက်ပ္တန်လဝ်ဂှ် ရုပ်သီလဝ်ရောၚ် ညးမက္ဍိုက်ပ် ပ္ဍဲကရောၚ်ပၞာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဂကောံဒပ်ရပ်လွဟ် သ္ပသ္ဇိုၚ်ကဵုဂကူမန်တုဲ မပၠန်ဂတးဒၟံၚ်သၞောတ်တၠအဝဵုပၞာန်တအ် ဂွံပံၚ်တောဲလုပ်ပေါဲဗ္တိုက်မွဲစွံဂှ် ညးဍုၚ်ကွာန်မန်တအ် ဆန္ဒမၞုံဂှ်ရ ပ္ဍဲသၞာံဏံ ဂိတုဂျာန္နဝါရဳ ၁၉ ဂှ် ကရောၚ်ပၞာန်ရာမည စဒှ်ကၠုၚ်ရ။

ဆ္ဂး အခိၚ်ကာလဆက်စၠောအ်စမ်ၜတ်ကရောၚ်ပၞာန်ဏံပေၚ်ဂှ် ဟိုတ်ဒၟါနူကိစ္စ မ္ဒးကလေၚ်သ္ၚဳဂၠိပ်တအ် နွံတုဲ ကလေၚ်ရုမ်သီအာ ဗွဲယာယဳရောၚ် ညးမပါလုပ်ဍိုက်မံၚ်ဍိုပ် ပ္ဍဲကရောၚ်ပၞာန်ပံၚ်တောဲရာမညဂှ် သ္ဂးရ။

နာဲဗညာမန် နူဗော်ဍုၚ်မန်တၟိ AD မပါလုပ်လဝ် ပ္ဍဲကရောၚ်ပၞာန်ပံၚ်တောဲရာမညဂှ်တှ်ေ ဟိုတ်နူကိစ္စမ္ဒးကလေၚ်ပလေဝ်တံဂှ်တုဲ ရုပ်သီလဝ်ကရောၚ်ပၞာန်ဂှ်ရောၚ် ဟီုလဝ်ရ။

“အခိၚ်ကာလစမ်ၜတ်ကရောၚ်ပၞာန် ပေၚ်အာဂှ်ရ သွက်ဂွံကလေၚ်သ္ၚဳဂၠိပ် သွက်ဂွံကလေၚ်ပလေဝ်ကရောၚ်ပၞာန်တအ်နွံဂှ်တုဲ ရုပ်သီထောံလဝ်ကရောၚ်ပၞာန်ဏံမွဲလစုတ်ရ” သာ်ဝွံ သ္ဂးရ။

ပ္ဍဲကရောၚ်ပၞာန်ပံၚ်တောဲရာမညဂှ် ဒပ်ပၞာန်ဗၠးၜးဍုၚ်မန် MLA ၊ ဒပ်ပၞာန်ဗၠးၜးကောန်ဂကူမန် MNLA-AD ၊ ဒပ်စဵုဒၞါဍုၚ်မန် MSDF ကေုာံ ဒပ်ပၠန်ဂတးဍုၚ်မန် MSRF တအ် ပါလုပ်ရ။

အခိၚ်ဒက်လဝ်ကရောၚ်ပၞာန်တေံ  ရန်တၟံ သွက်ဂွံသၠုၚ်ပ္တိုန်အသိၚ် ချဳဒရာၚ်ပရေၚ်ပၞာန် အပ္ဍဲတွဵုရးမန် ကေုာံ သွက်ဂွံထ္မံက်အာပရေၚ်ပၞာန်ပံၚ်တောဲတအ်တုဲ နူဏံမွဲကဆံၚ် ညံၚ်ဒပ်မန်မွဲ ဂွံမံက်ဂတဝ်ကၠုၚ်ရ။

ဆ္ဂး အတိုၚ်စၟတ်သမ္တီ ပေါဲဗ္တိုက်ဒှ်လဝ် ပွိုၚ် ၆ ဂိတုဂှ်မ္ဂး အပ္ဍဲတွဵုရးဍုၚ်မန်ဂှ် အသိၚ်ပေါဲဗ္တိုက်သၠုၚ်တိုန်ကၠုၚ် ဟွံမွဲတုဲ ကရောၚ်ပၞာန်ရာမညလေဝ် ဂွံဝေၚ်ကၠုၚ်လဝ်ပေါဲဗ္တိုက် ၜါဝါဟေၚ်ဂှ်ရ တၚ်ရန်တၟံပရေၚ်ပၞာန် ဟွံဍိုက်ပေၚ်ရောၚ် ဂကောံ RICE ထံက်ထ္ၜးလဝ်ရ။

နူအခိၚ်ဒက်ပ္တန်လဝ်ကရောၚ်ပၞာန် စဵုကဵုအခိၚ်ကလေၚ်ရုပ်သီဏံ စပ်ကဵုပရေၚ်ပၞာန် မချဳဒရာၚ်ရေၚ်တၠုၚ်ကၠုၚ်လဝ်တံဂှ်တုဲ တၚ်ဂွံဇြဟတ်၊ တၚ်ဍိုန်လျ နွံသာ်လဵုရော နူကဵုသြၚ်လောန်တိုၚ်(မ်) သၟာန်ကၠုၚ်ကီုလေဝ် ဟွံကလေၚ်သှ်ကဵုလဝ်ရ။

မွဲလ္ပာ်ဂှ်ပၠန် ဒပ်ပၞာန်ဗၠးၜးကောန်ဂကူမန် MNLA AD ဗော်ဍုၚ်မန်တၟိ AD ဂှ်ကဵု ဒပ်ပၞာန်ဗၠးၜးဍုၚ်မန် MLA တအ် ပံၚ်တောဲတုဲ ပ္ဍဲဂိတုမေ ၄ ဂှ် ဒက်ပ္တန်လဝ် ဒပ်မန်ရာမညရ။

ဒက်ပ္တန်ကၠုၚ်လဝ် ဒပ်မန်ရာမည RMA သၟဝ်က္ဍိုက်ပ်ပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD နကဵုတၚ်ရန်တၟံ သ္ဂောံဗ္တိုက်သရိုဟ်တၠအဝဵုပၞာန်၊ ဍုၚ်မန်မဍိုက်ပေၚ်ကဵုအခေါၚ်တုပ်သၟဟ် ကေုာံ ကံကုသိုလ်ဇကု ဇကုဖန်ဖက်ကေတ် ဂွံမံက်ဂတဝ်ကၠုၚ် မဒှ်ရ။

ဒံက်တာသဳရိမန်ဆာန် နူ MSDF မဒှ်ညးမၞုံအခေါၚ်ဟီုဂး ကရောၚ်ပၞာန်ပံၚ်တောဲရာမညဂှ် ပ္ဍဲကဵုကရောၚ်ပၞာန်ဂှ် သှ်ေဒၟံၚ်ပိဒပ်ရတုဲ သွက်ဂွံကလေၚ်ဒက်ပ္တန်အာ နကဵုဗီုပြၚ်တၟိမာန်ဂှ် ရုပ်သီလဝ်ဗွဲယာယဳရောၚ် ဟီုရ။

“အခိၚ်လၟုဟ် ကရောၚ်ပၞာန်ပံၚ်တောဲရာမည မပံၚ်တောဲဒက်ပ္တန်လဝ် နကဵုပန်ဒပ်ဂှ် ဒှ်အာဗီုပြၚ် ကရောၚ်ပၞာန်ဒက်လဝ် နကဵုပိဒပ်ရ။ ဟိုတ်ဂှ်ရ ကလေၚ်သ္ၚဳဂၠိပ်ကရောၚ်ပၞာန်ဂှ်တုဲ နဒဒှ်ဗီုပြၚ်ဒက်ပ္တန်တၟိမွဲ ဗီုလဵုဂွံကလေၚ်ဒက်ပ္တန်အာမာန်တုဲ ရုပ်သီလဝ် ယာယဳရ” သာ်ဝွံ သ္ဂးရ။

သ္အာၚ်နူဂှ်ပၠန် အာယုက်ကရောၚ်ပၞာန်ပံၚ်တောဲရာမညဂှ်လေဝ် စၟတ်လဝ် ပန်ဂိတုတုဲ ပ္ဍဲဂိတုမေကြပ်အိုတ်ဂှ် ကလေၚ်သ္ၚဳဂၠိပ်လဝ် တၚ်ဂွံဇြဟတ် တၚ်ဍိုန်လျ ကရောၚ်ပၞာန်ဂှ်တုဲ မ္ဒးရုပ်သီလဝ်ရောၚ် ညးဆက်ဟီုရ။

အခိၚ်လၟုဟ် နဗီုပြၚ်သာ်လဵု ဂွံကလေၚ်ဒက်ပ္တန်အာ ကရောၚ်ပၞာန်ပံၚ်တောဲရာမညဏံရောဟီုဂှ် ညးမဍိုက်ပ် ပ္ဍဲပရေၚ်မဒက်ပ္တန်လဝ်ကရောၚ်ပၞာန်ဏံ ဟွံကဵုလဝ်သွဟ် ချိုတ်တ်ပၠိုတ်တ်ရ။

ယဝ်ကလေၚ်ရံၚ် ကရောၚ်ပၞာန်ပံၚ်တောဲရာမညဏံမ္ဂး ရန်တၟံ သွက်ဂွံထ္မံက်ရုပ်ရဴ ညံၚ်ဒပ်မန်မွဲဂွံမံက်ကၠုၚ်တုဲ ဒပ်ပၠန်ဂတးမန်သီုဖအိုတ် မပါလုပ်ဂှ်ရ။

ဟိုတ်ဂှ်ရ ကဆံၚ်ပထမဂှ်တှ်ေ ဒပ်ရပ်လွဟ်မန် ၄ ဒပ်ဏံ တုပ်လဝ်စိုတ် သွက်ဂွံပံၚ်တောဲကၠောန်အာ ချဳဒရာၚ်ပရေၚ်ပၞာန်တုဲ ဒက်ပ္တန်လဝ် ကရောၚ်ပၞာန်ပံၚ်တောဲရာမညရ။

အခိၚ်လၟုဟ် ရုပ်သီထောံလဝ် ကရောၚ်ပၞာန်ပံၚ်တောဲရာမညဏံကီုလေဝ် ညံၚ်ဒပ်မန်မွဲဂွံမံက်ဂတဝ်ကၠုၚ်ဂှ် သီုညးဖအိုတ် ပတဝ်အာမံၚ်က္ဍိုပ်ဂၠံၚ်တၟိအိုတ်ကီုလေဝ် ဗီုပြၚ်ဂှ် ဟွံတုပ်ရ။

ပ္ဍဲကဵုကိစ္စဒပ်မန်မွဲဂှ် ဗော်ဍုၚ်မန်တၟိ AD ကဵု ဒပ်ပၞာန်ဗၠးၜးဍုၚ်မန်တအ် ပံၚ်ကောံတုဲ ဒပ်မန်ရာမည နွံဒၟံၚ်ဣရ သာ်ဝွံ နာဲဗညာမန် ဟီုရ။

“ ကိစ္စဒပ်မန်မွဲ ပိုယ်တအ်စၟဳကေတ်လဝ်ဂှ်တှ်ေ လၟုဟ် ဒက်ပတန်လဝ်ဒပ်မန်ရာမညတုဲရ။ ဗော်ဍုၚ်မန်တၟိ AD ကဵု ဒပ်ပၞာန်ဗၠးၜးဍုၚ်မန်တအ် ပံၚ်ကောံတုဲ ပိုယ်တအ် ဒက်ပ္တန်လဝ်ဒပ်မန်ရာမညတုဲရ။ လၟုဟ် ပ္ဍဲဒေသချဳဒရာၚ်ဒၟံၚ်ကရောၚ်ပၞာန်တအ်ဂှ်ရ ဒပ်မန်ရာမည ဆက်တုဲချဳဒရာၚ်ဒၟံၚ်ပရေၚ်ပၞာန်ရ” သာ်ဝွံ သ္ဂးရ။

ဆ္ဂး ဒပ်စဵုဒၞါဍုၚ်မန် MSDF ကဵု ဒပ်ပၠန်ဂတးဍုၚ်မန် MSRF  မပါလုပ်လဝ် ပ္ဍဲကရောၚ်ပၞာန်ပံၚ်တောဲဂှ် စဵုကဵုအခိၚ်လၟုဟ် ဟွံဂွံပါလုပ်ကၠုၚ် ပ္ဍဲဒပ်မန်ရာမည သၟဝ်က္ဍိုက်ပ်ပရေၚ်ဍုၚ်ကွာန်ပရေၚ်ပၞာန် ဗော်ဍုၚ်မန်တၟိ AD ဂှ်ဏီရ။

ဟိုတ်ဍေံဂှ်တှ်ေ ဒၟါနူပရေၚ်ပံၚ်တောဲသၟဝ်မွဲဂကောံဓဝ် ( Coming Under Model) ဂကောံဗော်ဍုၚ်မန်တၟိ AD  ကဵု ဟိုတ်နူပရေၚ်ပံၚ်တောဲကၠောန်အာမွဲစွံ (Coming Together Model)  ကံၚ်ဇြဳဖေဝ်ဒရာဍုၚ်မန်ရ။

ဒပ်ပၠန်ဂတးဍုၚ်မန် MSRF ဝွံ ဒှ်ဂကောံရပ်လွဟ် သၟဝ်ဌာနကာစဵုဒၞါ ကံၚ်ဇြဳဖေဝ်ဒရာဍုၚ်မန် MSFC မွဲတုဲ ဒပ်စဵုဒၞါဍုၚ်မန် MSDF လေဝ် ပါလုပ်ဒၟံၚ်ပ္ဍဲကံၚ်ဇြဳဂှ် တုပ်ပ်ရ။

ဒံက်တာသဳရိမန်ဆာန်ဟီုဂှ်တှ်ေ နူကဵုက္ဍိုပ်သ္ကိုပ် ဒပ်တံဏံသီုဖအိုတ် ပံၚ်ကောံတုဲ သၟဝ်ပရေၚ်က္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် ဒပ်ပၠတရဴပရေၚ်ဍုၚ်ကွာန်မွဲဂှ် ဒးစွံထေက်ရောၚ် ညးသောၚ်ကလးလဝ် လညာတ်ညးရ။

“ ဒပ်မန်မွဲဂှ်တှ်ေ လ္ပစွံ သၟဝ်ပၠတရဴပရေၚ်ဍုၚ်ကွာန် မွဲဗော်ဓဝ်ဂှ်တုဲ ကဆံၚ်ပထမဂှ်တှ်ေ နူကဵုက္ဍိုပ်သ္ကိုပ်ပရေၚ်ဍုၚ်ကွာန် နူသီုပန်ဒပ်ဏံ ပံၚ်ကောံတုဲ သၟဝ်ပၠတရဴပရေၚ်ဍုၚ်ကွာန် ပရေၚ်ပၞာန် Political Front မွဲမွဲဂှ် ဒးစွံထေက်ရောၚ် ညာတ်ကေတ်ရ” သာ်ဝွံ သ္ဂးရ။

ကမ္မတဳက္ဍိုက်ပ်ဒပ်မန်ရာမညဂှ် ဒှ်ယၟု ကမ္မတဳပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ရ။ ပ္ဍဲကဵုကမ္မတဳဏံ မဒက်ပ္တန်လဝ် နကဵုက္ဍိုပ်သ္ကိုပ်ၜါလ္ပာ်ဂှ်ကဵု ပ္ဍဲကမ္မတဳပၞာန်ဂှ် က္ဍိုပ်သ္ကိုပ်ဗော်ဍုၚ်မန်တၟိ AD ကေတ်လဝ်တာလျိုၚ် ဥက္ကဌ ကေုာံ သ္ကိုပ်က္ဍိုက်ပ်ပၞာန်ရ။

ညးလ္ၚတ်ဂမၠိုၚ်ဂှ်တှ်ေ အခိၚ်အခါသာ်ဏံဂှ် ဒပ်မန်ရပ်လွဟ်သီုဖအိုတ် မပၠန်ဂတးဒၟံၚ် သၞောတ်တၠအဝဵုပၞာန် ဂွံဒက်ပတန် နဒဒှ်ဒပ်မန်မွဲဂှ် ဒးဒက်ပ္တန်ဓဝ်ပတှ်ေကၠာဏောၚ်တုဲ ဂွံရေၚ်တၠုၚ်ပရေၚ်ပၞာန်မာန်ဂှ်လေဝ် ပၟိက်ဇၞော်ရောၚ် ထံက်ထ္ၜးလဝ်ရ။

ဥက္ကဌ ကမ္မတဳက္ဍိုက်ပ်ပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ AD/ ဒပ်မန်ရာမည နာဲဇဲယဂှ်တှ်ေ ဂကောံရပ်လွဟ်မန်သှ်ေဒၟံၚ်တအ် ဂွံပံၚ်တောဲပါလုပ် ပ္ဍဲဒပ်မန်ရာမညတုဲ သွက်ဂွံလုပ်အာပေါဲဗ္တိုက်မွဲစွံဂှ် ပံက်လဝ်တြၚ်ရောၚ် ဟီုလဝ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်−ကရောၚ်ပၞာန်ရာမည