ဟိုတ်နူကြုက်၊ ကိုဝ်ရဳယျာသၟဝ်ကျာ ကေုာံ ရုယှာတအ်တုဲ ကြဴနူပၞာန်ဂၠးကဝ်ဒုတိယတုဲမ္ဂး ဒှ်ကၠုၚ်တၚ်ကော်ဆဴ ကုပရေၚ်ဂီုကၠီုဇၞော်အိုတ်ရောၚ် ဂျပါန် ဟီု

တိုဝ်ကျိုဝ်၊ ဂျူလာၚ် ၁၈

ပ္ဍဲအာယှဒိုဟ်ဗၟံက်ဏံ ဍုၚ်ကြုက်၊ ဍုၚ်ကိုဝ်ရဳယျာသၟဝ်ကျာ ကေုာံ ဍုၚ်ရုယှာ ပိဍုၚ်ဏံ မဒှ်ကၠုၚ်သၞမာန်ဂှ် ဟိုတ်နူသၠုၚ်ပတိုန်အသိၚ်တုဲ ချဳဒရာၚ်ကၠုၚ်ဒၟံၚ်ပရေၚ်ပၞာန်ဂှ်ရ ဂျပါန်ဝွံ ကြဴနူပၞာန်ဂၠးကဝ်ဒုတိယတုဲ ဒးဆေၚ်ဒၟံၚ်မုက်ကဵု အကာဲအရာပရေၚ်ဂီုကၠီုရောၚ် ဝန်ဇၞော်ကာစဵုဒၞါဂျပါန် ဟီုလဝ်ရ။

ပရေၚ်ၜိုဟ်လလမ်ဂၠးတိလၟုဟ်ဂှ် ဒးဒုၚ်ကော်ကၠုၚ်မံၚ်ဆဴ ဇၞော်ကဵုဇြဟတ်တုဲ ဂျပါန်ဝွံ ကြဴနူပၞာန်ဂၠးကဝ်ဒုတိယတုဲဂှ် စိုပ်ကၠုၚ်မံၚ် ပ္ဍဲကဵုပွဳဗွိုၚ်ပရေၚ်ဂီုကၠီုထုဲထံၚ်အိုတ် သ္ကာတ်မြဟ်အိုတ်ဏောၚ် ဝန်ဇၞော်ကာစဵုဒၞါ သ္ကိုပ်ဗိုလ် နာကာတာနဳ ဟီုရ။

ချဳဒရာၚ်ပရေၚ်ပၞာန်ကြုက်ဂှ်ဝွံ သွက်ဂျပါန်ဂှ် ဟွံကေၚ်ဂဗမွဲလှ်ေ၊ ဒှ်တၚ်ကော်ဆဴ မဆေၚ်စပ်ကဵုမဟာဗျူဟာဇၞော်အိုတ်မွဲရောၚ် ညးဟီုရ။

ဗေကျေန်ဂှ်တှ်ေ ဗွဲမပြဟ် သၠုၚ်ပတိုန်ဒၟံၚ်အသိၚ် အစောံဇြဟတ်ပရေၚ်ပၞာန်ညးတအ် သီုကဵုလၟိဟ်ပၞာန် သီုကဵုအစောံစရာဲပၞာန်ညးတအ်ရောၚ် ဝန်ဇၞော် နာကာတာနဳ သ္ဂးရ။

တ္ကအ်မၞုံပ္ဍဲၜဳကြုက်ဗၟံက်မွဲ နူကဵုဂျပါန် မဟီုဂးလဝ် ဒှ်ဒြပ်အပိုၚ်ညးတအ်ဂှ် ကြုက်ဂှ်လေဝ် ဒှ်ဒြပ်ညးတအ်ရောၚ် ဟီုလဝ်ကီုရ။

ဟိုတ်နူပရေၚ်ပြိုၚ်ပ္ကာန် အကြာကြုက်ကဵု မဟာမိတ်ဂျပါန် အမေရိကာန်တအ်ဂှ်တုဲ အနာဂတ်ဒေသဏံဝွံ ဒှ်ဒၟံၚ်အကာဲအရာ အန္တရာယ်မၞုံကၠုၚ်မာန်ရောၚ် ထ္မံက်ထ္ၜးလဝ် ပ္ဍဲကဵုလိက်လလောၚ်တြး စပ်ကဵုပရေၚ်စဵုဒၞါဂျပါန် မုက်လိက်မၞုံ ၃၄ ဂှ်ရ။

စပ်ကဵုရုယှာ ဗ္တိုက်ဒၟံၚ်ယူကရုၚ်ဂှ်တုဲလေဝ် ဂျပါန် ဒှ်တဴဓဝိၚ်ဂှ် ချူလဝ် ပ္ဍဲလိက်လလောၚ်တြးဂှ်ရ။

ရုယှာ ဖျေံစွံလဝ်လွဟ်လက်နက်ပၞာန် ဗ္ဒါဲဍုၚ်ညးတအ်ဂှ်ဝွံ ဒှ်ဒၟံၚ်သ္ဇက်ဒးဂွိၚ်ကဵုပရေၚ်ဂီုကၠီုရောၚ် ထ္မံက်ထ္ၜးလဝ်ရ။

ကိုဝ်ရဳယျာသၟဝ်ကျာလေဝ် ထပ်ပ္တိတ်ဒၟံၚ်လွဟ်နျူကလဳယျာနွံတုဲ သွက်ဂွံပလံၚ်ဗစိုပ်ကဵုဇရေၚ်ရုယှာမာန် သၠုၚ်ပတိုန်အသိၚ် ကၠောန်ပ္တိတ်ဒၟံၚ် ကမ်လှောဝ်တအ်ဂှ်ရောၚ် ဂျပါန် ဟီုကၠုၚ်ရ။

ကမ်လှောဝ် နူကဵုပျုၚ်ယာန် မစုတ်လွဟ်နျူကလဳယျာဂွံဂှ်ဝွံ ပန်ဓလီုနၚ် အလုံတ္ကအ်ဂျပါန်မွဲမာန်ရောၚ် ထ္မံက်ထ္ၜးလဝ် ပ္ဍဲကဵုလိက်လလောၚ်တြး ဒပ်ပၞာန်ဂျပါန်ရ။

Ref: CNN