ပ္ဍဲပေါဲဗ္တိုက်ဍာ်ဗုဂှ် သ္ကိုပ်ဗိုလ်ဒပ်ပၞာန်ဗၟာမွဲတၠ ချိုတ်တုဲ ပန်တၠ ရပ်ဂွံဂျိုၚ်ၚ်

ဍာ်ဗု၊ ဂျူလာၚ် ၁၈

ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် သွက်ဂွံဗပေၚ်ဇြဟတ် ပ္ဍဲဗ္ဒိုပ်(နတ်အိမ်တောၚ်) ပွိုၚ်ဍုၚ်ဍာ်ဗု ရးတၞၚ်သဳ ပယျဵုသေံ−ဗၟာဂှ် ဒးဒုၚ်ကၟာတ်လဒဵုဗ္တိုက်လဝ်တုဲ သ္ကိုပ်ဗိုလ်မွဲတၠ မပါလုပ်ဂှ် ဟွံအောန်နူပန်တၠ ချိုတ်အာလဝ်ရောၚ် ဒပ်ပံၚ်ကောံမဟာမိတ်ပၠန်ဂတးတအ် လလောၚ်ပ္တိတ်လဝ် ပ္ဍဲဂိတုဂျူလာၚ် ၁၆ တေံရ။

ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် သွက်ဂွံဗပေၚ်ဇြဟတ်ဒပ် ပ္ဍဲဗ္ဒိုပ်(နတ်အိမ်တောၚ်) ဂှ် ပ္ဍဲဂိတုဂျူလာၚ် ၁၁ စဵုကဵု ၁၅ ပွိုၚ်ပန်တ္ၚဲပြၚ် ဒပ်ပံၚ်ကောံမဟာမိတ်ပၠန်ဂတးဂမၠိုၚ် ပါလုပ်သီုကဵု ဒပ်ပၞာန်ဗၠးၜးကောန်ဂကူကရေၚ် KNLA ကၟာတ်လဒဵုဗ္တိုက်လဝ်ရ။

အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန်ဂှ် သ္ကိုပ်ဗိုလ် အံၚ်ဗိုလ်ဟုၚ် မပါလုပ် ကောန်ဒပ်ကံၚ်ဇြဳပၞာန် ဟွံအောန်နူပန်တၠ ချိုတ်အာလဝ်တုဲ ရပ်ဂွံလဝ်ပန်တၠရ။

အပ္ဍဲပေါဲဗ္တိုက်ပွိုၚ်ပန်တ္ၚဲဂှ် နူကံၚ်ဇြဳပၞာန်ဂှ် ရပ်ဂွံလဝ်လွဟ် ၉ ဇကိုအ်၊ RPG ၁ ဇကိုအ်၊ လွဟ် ၆၀ မမ ၁ ဇကိုအ် ကေုာံ မကမ်လွဟ်လက်နက်တၞဟ်ဟ်တံလေဝ် သီဂွံလဝ်ရောၚ် ဒပ်ပံၚ်ကောံမဟာမိတ်ပၠန်ဂတးတအ် လလောၚ်ပ္တိတ်ကၠုၚ်လဝ် သီုကဵုဗီုဓာတ်စၟတ်သမ္တီဂမၠိုၚ်ရ။

ကရောၚ်ပၞာန်ဒဝ်ဏ ၂၊ ကရောၚ်ပၞာန်ဒဝ်ဏ ၃၊ ဒပ်ပံၚ်ကောံ ဒပ်မဟာ ၄ KNLA ၊ ဒပ်ပံၚ်ကောံ တမ်ဒပ် ၂၇ ဒပ်မဟာ ၆ တအ်၊ NMSP(AD) R.M.A ၊ ဒပ်ပၠန်ဂတးဍုၚ်မန် MSRF ၊ KTLA၊ ဒပ်ပ္ကတ်ပ္ကေၚ် Nonentity Coach တအ် ပါလုပ်ဗ္တိုက်လဝ်ရောၚ် ကဵုလဝ်သမ္တီရ။

တမ်ဒပ် မထ္ပက်ကၠုၚ်ကရောၚ်ပၞာန် လ္ပာ်ဗ္ဒိုပ်ပယျဵု(နတ်အိမ်တောၚ်) ဂှ် ဒှ်တမ်ဒပ်ကံၚ်ဇြဳပၞာန် ခလရ ၂၈၂၊ ခလရ ၂၇၃၊ ခမရ ၄၀၈၊ ခမရ ၄၀၉၊ ခမရ ၄၁၀ မဒှ်သၟဝ်တဲဌာန်ဂအုပ်ပၞာန်ပြၚ်ၜဳတအ်ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်−မဟာမိတ်ပူးပေါင်းတပ်ဖွဲ့