မတ်မလီု၊ ဂျူလာၚ် ၁၈
ပ္ဍဲတွဵုရးဍုၚ်မန် ကောန်သ္ဂံၚ် PDF မသုန်တၠ မကလိလောန်လဝ်ဒုဟ်ဒဏ်ဟွံမွဲဂှ် လုပ်ဖျေံကၠုၚ်လွဟ် သီုကဵုလွဟ်လက်နက်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်ရ။
ကောန်သ္ဂံၚ် PDF မသုန်တၠ လုပ်စိုပ်ဖျေံကၠုၚ်လွဟ်ဂှ် ပ္ဍဲဂိတုဂျူလာၚ် ၁၆ တေံ ဂွံဒုၚ်လဝ်တဲ ပ္ဍဲဌာန်ဂအုပ်ပၞာန်ရးအဂၞဲ ဖျေံသ္ဇိုၚ်ဍုၚ်မတ်မလီု တွဵုရးဍုၚ်မန်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ကောန်သ္ဂံၚ် PDF မသုန်တၠဂှ် ကဵုထ္ပက်စၟတ်တဲတုဲ လှဲပြံၚ်ဏာဇရေၚ်မိမညးတအ်တုဲ ပအပ်ကဵုလဝ်သြန်ထံက်ပၚ် ကေုာံ စၞစသုၚ်နာနာရောၚ် လလောၚ်ပ္တိတ်လဝ်ရ။
သဝ်ဒါဂိုဝ် သ္ကိုပ်ပြုပြေၚ်ပၞာန် ကရောၚ်ပၞာန်ဒဝ်ဏ ဗျူဟာ (၃၃) ဒပ်ပၞာန် PDF ဂှ်တှ်ေ ကံၚ်ဇြဳပၞာန် ဟီုကၠုၚ် PDF တအ်ဖျေံလွဟ်ဂှ်ဝွံ ဆၜိုတ်တြးဝါဒသၟးရရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ပရိုၚ် PDF လုပ်ဖျေံလွဟ် ပ္ဍဲရးအဂၞဲဂှ်တှ်ေ ညအ်ဂှ် ဒှ်ဆၜိုတ်ကံၚ်ဇြဳပၞာန် တြးဝါဒသက်က်ရဏောၚ်။ တီကၠးမံၚ်ရ၊ ဗီုဓာတ်ဍေံတံပအပ်လွဟ်ဂှ် ကၟာတ်လဝ်မုက်ဂှ်လေဝ် ဟွံမွဲပုဟ်လေဝ်၊ ဍေံတံပကေတ်ဂှ် တီကၠးမံၚ်ရ။ မွဲပၠန်ဂှ် ပ္ဍဲ PDF မုက်မတ်တံဏံဂှ် ပ္ဍဲတွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ်လေဝ် ပိုယ်တအ် ဟွံကေၚ်ဆဵုပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် လ္ပာ်ဒပ်ပၠန်ဂတးတအ် ယဝ်လုပ်စိုပ်ဖျေံလွဟ် ဇရေၚ်ကံၚ်ဇြဳပၞာန်မ္ဂး ဂကောံမဆေၚ်စပ်ဂမၠိုၚ် လလောၚ်ပ္တိတ်လဝ် ဗွဲမလုပ်သၞောဝ်နွံတုဲ တမ်ဒပ်ပၠန်ဂတး ဂကောံပၠန်ဂတးလၟုဟ်တအ် လလောၚ်ပ္တိတ်လဝ်ဟွံမွဲမွဲသာ် ကံၚ်ဇြဳပၞာန် ထ္မံက်ထ္ၜးကၠုၚ်သာ်ဏံဂှ်ဝွံ တြးဝါဒရဏောၚ်ဂှ် ညးဆက်ဟီုလဝ်ရ။
ပ္ဍဲဂိတုဂျူလာၚ် ၅ တုဲကၠုၚ်တေံ ကံၚ်ဇြဳပၞာန် ရန်ကဵုသွက်ပေါဲရုဲမာဲတုဲ ကော်ဘိက်ကၠုၚ် ဂကောံရပ်လွဟ်ဂမၠိုၚ် ပါလုပ်သီုကဵု PDF တအ် သွက်ဂွံပံၚ်တောဲပါလုပ် ပ္ဍဲဂၠံၚ်တရဴပေါဲရုဲမာဲရ။
ဆ္ဂး PDF ကေုာံ ဂကောံဇြဟတ်ပၠန်ဂတးတအ်ဂှ်တှ်ေ ဟွံပတှ်ေ လ္တူကံၚ်ဇြဳပၞာန် မကော်ဘိက်ကၠုၚ်ဂှ်တုဲ စိုတ်လေဝ်ဟွံလုပ်စရောၚ် ခၠေဝ်ပလန်လဝ်ရ။
ပ္ဍဲတွဵုရးဍုၚ်မန်ဂှ်တှ်ေ ကံၚ်ဇြဳပၞာန် ဟီုလဝ် PDF တအ် လုပ်ဖျေံလွဟ်ကီုလေဝ် ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ကျာ်မြဟ်၊ ဇြပ်ဗု ကေုာံ ပွိုၚ်ဍုၚ်ရေဝ်တအ်ဂှ် အကြာကံၚ်ဇြဳပၞာန်ကဵု ဂကောံပၠန်ဂတးတအ် ဒှ်မံၚ်ပေါဲဗ္တိုက်ဆေၚ်မုက် မွဲနှေံမွဲနှေံရ။
အတိုၚ်လိက်ဒုၚ်စဳရေၚ် ဂကောံပျဳတုပါန်တိုၚ်မ္ဂး အလုံဍုၚ်မွဲ အပ္ဍဲဂိတုဂျောန်ပွိုၚ်မွဲဂိတုတုဲကၠုၚ်တေံ ကောန်ဒပ်ဗၠာဲသၟိၚ် ကေုာံ ဒပ်ကံၚ်ဇြဳပၞာန် ၁၂၀ ပြၚ်ဝွံ လုပ်စိုပ်ဖျေံကၠုၚ်လွဟ် ဇရေၚ်ဂကောံဒပ်ပၠန်ဂတးတံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI