နံၚ်ချဵု၊ ဂျူလာၚ် ၁၈
ကံင်ဇြဳပၞာန် ပံၚ်ဖျပ်ဇြဟတ်ပၞာန်တိုက်ကဵု ပၞာန်ကျာတုဲ ထ္ပက်ပၞာန်တုဲ ကလေၚ်ထိၚ်ဂွံလဝ် တိဍာ်မဒးဗလးလဝ်တဲတံဂှ်တုဲ တိဍာ်မဆက်စပ်တံဂှ်လေဝ် ညးတအ်သၠဲပတိတ်ကၠုၚ် နဒဒှ်တိဍာ်ထိၚ်ဒဝ်တအ်မာန်ရောၚ် ညးခါတ်အကာဲဂမၠိုၚ် သ္ၚဳဂၠိပ်လဝ်ရ။
ကံၚ်ဇြဳပၞာန် လလောၚ်တြးလဝ် ကၠောန်ပေါဲရုဲမာဲ ပ္ဍဲဂိတုဒဳဇြေမ်ဗာဂှ် ပ္တဝ်က္ဍိုပ်ကဵုဒေသပၟိက်ဇၞော် ပ္ဍဲပရေၚ်ဍုၚ်ကွာန်ပရေၚ်ပၞာန်တအ်ဂှ်တုဲ စကာကၠုၚ်အရီုဗၚ်ပၞာန်ကျာ၊ လွဟ်ဇၞော်၊ ဒြဟတ်ဒပ်ဗွဲမဂၠိုၚ်ဂၠေၚ်တုဲ ကၠောန်ကၠုၚ်ဒၟံၚ် သွက်ဂွံကလေၚ်ကေတ်တိဍာ် မဒးဗလးလဝ်တဲတအ်ရ။
ပ္ဍဲကဵုဏံ ဍုၚ်နံၚ်ချဵု နူကဵုရးသေံသ္ကုတ်သၟဝ်ကျာ ဒပ်တအာၚ် TNLA မထိၚ်ဂွံလဝ် ၜိုတ်ပွိုၚ်မွဲသၞာံဂှ် ကံၚ်ဇြဳပၞာန်တအ် ပါ်ကရောၚ်ပၞာန်ပန်တုဲ ထ္ပက်ကၠုၚ်လဝ်ပၞာန် ဗွဲမသ္ကာတ်မြဟ် ပ္ဍဲဂိတုဂျူလာၚ် သတ္တာဟဒုတိယဂှ်တုဲ ပ္ဍဲဂိတုဂျူလာၚ် ၁၆ ဂှ် ကလေၚ်ဂွံလဝ်ရ။
နံၚ်ချဵုဝွံ နွံဒၟံၚ် လ္တူဂၠံၚ်ဇၞော်ပရေၚ်သွံရာန်ဗၞိက် မာန္တလေဝ်−မူဇြေဝ် မဒှ်ဒတန်ပၟိက်ဇၞော် ပရေၚ်ပိုန်ဒြပ်ပယျဵု ကြုက်−ဗၟာဂှ်တုဲ ဍေံဆက်စၠောံလဝ်ကဵု ဍုၚ်ကွာန်မၞုံပ္ဍဲရးသေံသ္ကုတ်သၟဝ်ကျာတအ် နူကျံက်မေဝ်မွဲကဆံၚ်တုဲ သီုကဵုဆက်စၠောံကဵုလဝ်ဍုၚ်တၞဟ်ဟ်ဂမၠိုၚ် နူပျေန်ဥူလွေန်−မာန္တလေဝ်ဏံမွဲကဆံၚ်ရ။
ကိုဝ်နံၚ်ယော ညးဒုၚ်လျိုၚ်သုတေသနလ္ပာ်ပၞာန် ဂကောံလ္ၚတ်ကေၚ်ကာပၞာန်ဗၟာ ကေုာံ ပရေၚ်ဂီုကၠီု MSDI ဂှ်တှ်ေ ကံၚ်ဇြဳပၞာန် ပတဝ်ကၠုၚ်မံၚ်က္ဍိုပ် သွက်ဂွံကလေၚ်ကေတ် တိဍာ်မ္ဒးဗလးလဝ်တဲ လ္တူဂၠံၚ်သွံရာန်ဗၞိက်ဏံဂှ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂၠံၚ်သွံရာန်ဗၞိက် မာန္တလေဝ်−မူဇြေဝ်ဏံ ပၟိက်ဇၞော်ပ္ဍဲပရေၚ်ဍုၚ်ကွာန်ပရေၚ်ပၞာန်တုဲ ကံၚ်ဇြဳပၞာန်လေဝ်မိက်ဂွံဂွံ လ္ပာ်ကြုက်လေဝ်မိက်ဂွံဂွံမံၚ်ဂှ် ဂၠံၚ်ဏံ ညံၚ်ဂွံကလေၚ်ပံက်ကီု တုဲတှ်ေ တိဍာ်ဒးဗလးလဝ်တဲ နွံဒၟံၚ်လ္တူဂၠံၚ်ဏံ မပ္တံကဵုဍုၚ်နံၚ်ချဵု၊ တဳပဝ်၊ ကျံက်မေဝ် ဍုၚ် TNLA သီဂွံလဝ်လၟုဟ်တအ်ဂှ် သွက်ဂွံကလေၚ်ကေတ်ဍုၚ်တအ်ဏံဂှ် ပ္တဝ်က္ဍိုပ်ကၠောန်ကၠုၚ်ဒၟံၚ်ရောၚ် ပိုယ်ဂွံညာတ်ကေတ်ရ” သာ်ဝွံ သ္ဂးရ။
ပ္ဍဲအရာကလေၚ်သီကေတ် ဍုၚ်နံၚ်ချဵုဂှ် နူဍုၚ်(တောၚ်ခမ်း) စဵုကဵုဍုၚ်နံၚ်ချဵုဂှ် ကံၚ်ဇြဳပၞာန် ပံၚ်ဖျပ် ပၞာန်တိုက်ကဵု ပၞာန်ကျာတုဲ ကလေၚ်ဗ္တိုက်လဝ် နကဵုအရီုဗၚ်လွဟ်ဇၞော်၊ အရီုဗၚ်ပၞာန်ကျာ ကေုာံ ကရောၚ်ပၞာန်ရီုတအ်ဂှ်တုဲ ပရေၚ်ပန်ပှော်ဗ္တိုက် ၅၆၆ ဝါနွံတုဲ လအ်အာပွိုၚ် ၁၁ ဂိတုရောၚ် သ္ဂးရ။
ပရေၚ်ပၞာန်ဏံဂှ် စလဝ် ပ္ဍဲသၞာံတုဲကၠုၚ်တေံ ကၞောတ်ဂိတုအဝ်ဂါတ်တုဲ သၞာံဏံ ဂိတုဖေဖဝ်ဝါရဳကြပ်အိုတ်ဂှ် ကလေၚ်ထိၚ်ဒက်ဂွံလဝ် ဂၠံၚ်အုပ်ဓုပ် ဆက်စၠောံလဝ်ကဵု (တောၚ်ခမ်း) ဂှ်တုဲ ပ္ဍဲဂိတုဂျူလာၚ် ၁၆ ဂှ် ကလေၚ်သီဂွံလဝ် ဍုၚ်နံၚ်ချဵုရောၚ် လလောၚ်ပ္တိတ်လဝ်ပရိုၚ်ရ။
ပ္ဍဲတၚ်လလောၚ်တြး TNLA ပ္ဍဲဂိတုဂျူာလၚ် ၁၆ ဂှ် ပ္ဍဲဍုၚ်နံၚ်ချဵုဂှ် ဟိုတ်နူပေါဲဗ္တိုက်ဂမၠိုၚ် ဆက်သ္ကာတ်မြဟ်ဒၟံၚ်ဂှ်တုဲ ညးဍုၚ်ကွာန်ဂမၠိုၚ် စွံသတိတုဲ သွက်ဂွံအာကၠုၚ်အိုတ်ဂှ်ကဵု သွက်ဂွံဒ္ဂေတ်ဗက် တၚ်စၞောန်စဵုဒၞါ ဘဲအန္တရာယ်ပၞာန်ကျာတအ်ဂှ် သ္ဂးလဝ်ရ။
သ္အာၚ်နူဂှ်ပၠန် ပ္ဍဲဍုၚ်ကျံက်မေဝ်၊ တဳပဝ်၊ မိုဝ်ကုတ် ပေါဲဗ္တိုက်ဟွံဂွံဒှ်ဏီတံဂှ် သွက်ဂွံစွံသတိကဵု ပရေၚ်ဗ္တိုက်ပၞာန်ကျာ နူဒပ်ကံၚ်ဇြဳပၞာန်ဂှ်လေဝ် ကဵုလဝ်သမ္တီရ။
ဗိုလ်ဇၞော် ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ လ္ပာ်ကံၚ်ဇြဳပၞာန် ဟိုတ်နူဇြဟတ်ပၞာန် ကေုာံ လွဟ်ဇၞော်ညးတအ် ခိုဟ်ဒၟံၚ်တုဲ ကလေၚ်ဂွံလဝ်နံၚ်ချဵုတုဲ တိဍာ်သှ်ေတအ်ဂှ်လေဝ် ဂွံဗ္တိုက်အာနွံဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ် ဇြဟတ်ပန်ပှော်လေဝ် စကာမာန်၊ ဇြဟတ်မၞိဟ်လေဝ် စကာမာန်မံၚ်ဏောၚ်။ ပ္ဍဲရးသေံသၟဝ်ကျာဂှ် TNLA မွဲဂကောံရ ကလေၚ်ဗ္တိုက်ဒၟံၚ် ကံၚ်ဇြဳပၞာန်။ အေ ဂှ်တှ်ေ သၞဒပ်ပၞာန်ဂှ် နွံမံၚ် TNLA မွဲဂကောံရဏောၚ်။ ဂွံအာနံၚ်ချဵုယျဟီုတှ်ေ ခြာဟွံလအ် ဍုၚ်ကျံက်မေဝ်၊ တဳပဝ်၊ မိုဝ်ကုတ်တအ်ဂှ်လေဝ် ဍေံတံ(စကစ) သၠဲပ္တိတ်တိဍာ်တုဲ ဂွံဗ္တိုက်ပတိတ်အာပရဲဂှ် နွံဏောၚ်” သာ်ဝွံ သ္ဂးရ။
လ္ပာ်ဒပ်တအာၚ် TNLA ဂှ်တှ်ေ ညံၚ်ဟွံဂွံဒးဗလးတဲ တိဍာ်ထိၚ်ဒက်တအ်ဂှ် ကလေၚ်တဝ်စၞေဟ်အာဏောၚ်တုဲ ဗွဲမသ္ကာတ်မြဟ် ကလေၚ်ဝေၚ်ကၠုၚ်ပၞာန်ထ္ပက်မာန်ရောၚ် ညးဆက်ဟီုရ။
ကံၚ်ဇြဳပၞာန် ထ္ပက်လဝ်ပၞာန် ကုဍုၚ်မိုဝ်ဗျေဝ် ပယျဵုသေံ−ကရေၚ်ဍာဲ နူကဵုဒပ်ပံၚ်ကောံ ကေုာံ ဒပ်ပံၚ်ကောံကရေၚ်ဍာဲ KNPP KNDF တအ် မထိၚ်ဂွံလဝ်ဂှ် ပွိုၚ်တြဴဂိတုတုဲ ကလေၚ်သီဂွံလဝ် ပ္ဍဲဂိတုဂျူလာၚ် ၆ တေံရ။
ဒၟါနူကြုက်ဓရတ်ကၠုၚ်တုဲ နူတဲဒပ်ကဝ်ကဂှ် ကံၚ်ဇြဳပၞာန် ကလေၚ်ဂွံလဝ် ဍုၚ်လာယှိုဝ် ပ္ဍဲရးသေံသ္ကုတ်သၟဝ်ကျာဂှ်တုဲ ဍုၚ်နံၚ်ချဵုကဵု ဍုၚ်မိုဝ်ဗျေဝ်တအ်ဂှ်တှ်ေ ထ္ပက်ပၞာန်နကဵုဇြဟတ် လၟိဟ်ဗွဲမဂၠိုၚ်တုဲ ကလေၚ်ဂွံလဝ်ရ။
ညးခါတ်အကာဲပရေၚ်ပၞာန်တအ်ဂှ်တှ်ေ ဗျူဟာပၞာန်ကံၚ်ဇြဳပၞာန် မတောတက်ကၠုၚ်ဂှ် ကဵုဒၟံၚ်သမ္တီ သွက်ဂကောံဇြဟတ်ပၠန်ဂတးတအ်ဏောၚ်တုဲ ကလေၚ်သ္ၚဳဂၠိပ် ဗွဲမစှ်ေကဵုသၞောတ်တုဲ ဒးကၠောန်သ္ပအပြံၚ်အလှာဲ မၞုံပၟိက်တအ်ဏောၚ်ဂှ် ထံက်ထ္ၜးလဝ်ရ။
“ဍေံတံ (စကစ) ဂှ် အခိၚ်လၟုဟ် ဇြဟတ်ပန်ကီု ဇြဟတ်ပၞာန်ကျာကီု သီုကဵုဇြဟတ်မၞိဟ် နကဵုပိသာ်ဏံ ဗ္တိုက်ကၠုၚ်ဏောၚ်တုဲ ပိုယ်တအ် ထ္မံက်ကၠုၚ်ဒၞါဲဗ္တိုက် နူကဵုဒၞါဲဇဳဒိုဟ်ဂှ်မာန်မှ ဒှ်ၜိုတ်ဒးဟစိုပ်ညိကီု။ ဟွံသေၚ်တှ်ေ ပၞာန်ထ္ပက်နာနာဟီုဂှ် လ္ပာ်ဂကောံဇြဟတ်စဵုဒၞါတအ် ကၠောန်ကၠုၚ်ဟွံသေၚ်တုဲ လ္တူပၞာန်ထ္ပက်ဒပ်ပၞာန်ဂှ် ပိုယ်တအ် ဒှ်အာဒးဝေၚ်ပၞာန်ဒုၚ်ရဏောၚ်” သာ်ဝွံ ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ် ဟီုရ။
အကာဲအရာလၟုဟ်ဂှ်တှ်ေ ကံၚ်ဇြဳပၞာန် ကလေၚ်ထ္ပက်မံၚ်ပၞာန် ဗ္တိုက်ဒၟံၚ် ဒေသပၟိက်ဇၞော်ဂမၠိုၚ် နကဵုလွဟ်ဇၞော်၊ အရီုဗၚ်ပၞာန်ကျာတံဂှ်ကီုလေဝ် မွဲလ္ပာ်ဂှ်ပၠန် ပ္ဍဲဒေသသ္ကုတ်သၠုၚ်ကျာကီု ပ္ဍဲလ္ပာ်ဒေသတိဗလး ရးသက်ကိုၚ်ကဵု ရးမဂွဵုတအ်ဂှ် ဖအောန်ဖျေံလဝ်ချဳဒရာၚ်ပၞာန်ရ။
ပ္ဍဲဒေသတၞၚ်သဳ ကေုာံ ဒေသကရေၚ် နွံပယျဵုသေံ−ဗၟာဂှ် ဗ္ဒိုပ်ဒပ်ပၞာန်ဒုၚ် ကံၚ်ဇြဳပၞာန် ဟိုတ်နူထ္ပက်ကၠုၚ်မံၚ်ပၞာန် ဒပ်ပံၚ်ကောံမဟာမိတ် ကေုာံ ဒပ် KNLA ဗော်သွးကောန်ဂကူကရေၚ်တအ်ဂှ်တုဲ ဒးဆောံလေၚ်ကၠုၚ်ဒၟံၚ် ဗ္ဒိုပ်မွဲတုဲမွဲ ပါလုပ်သီုကဵု ဗ္ဒိုပ်( ဥကရစ်ထ) ရ။
ညးခါတ်အကာဲပရေၚ်ပၞာန်တအ်ဟီုဂှ်တှ်ေ ၜိုန်ဒှ်ဗျူဟာပၞာန်ကံၚ်ဇြဳပၞာန်တအ်ကီုလေဝ် ဟိုတ်နူမၞုံကဵုသၞောတ်ဗ္ၜတ် ပ္ဍဲဇြဟတ်ပၞာန်၊ လွဟ်လက်နက်မကမ်၊ လွဟ်ဇၞော် ကေုာံ အရီုဗၚ်ပၞာန်ကျာတံဂှ်တုဲ ကံၚ်ဇြဳပၞာန် ပါဲနူထိၚ်ဒက်တိဍာ်တုဲ ဖအောန်ဖျေံကၠုၚ်လဝ် ပရေၚ်ပြုပြေၚ်ပၞာန်တအ်ရောၚ် ထံက်ထ္ၜးလဝ်ရ။
မွဲလ္ပာ်ဂှ်ပၠန် လ္ပာ်ကံၚ်ဇြဳပၞာန် ကလေၚ်ထိၚ်ဒက်တိဍာ်သာ်ဏံတုဲ ဂၠံၚ်တရဴပတဝ်အာက္ဍိုပ်ကဵုနေဗျဳဒဝ်တအ်ဂှ် ယဝ်ထိၚ်ဒက်ဂွံဖအိုတ်မ္ဂး ပ္ဍဲရာသဳဗြဲကျာတၟးဏံ ထ္ပက်ကၠုၚ်ပၞာန် ပ္ဍဲဒေသသ္ကုတ်သၠုၚ်ကျာကဵု ပ္ဍဲဒေသတိဗလးမာန်ရောၚ် သ္ၚဳဂၠိပ်ဒၟံၚ်အိုတ်ရ။
ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဂှ်တှ်ေ ပ္ဍဲအရာဗ္တိုက်သရိုဟ်သၞတအ်ဂှ် ပ္ဍဲဂကောံသ္ကုတ်သၠုၚ်ကျာကဵု ဂကောံသၟတ်ကျာတအ်ဂှ် ဒးကေတ်ဓဝ်ညဳသာဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တအ် ပ္ဍဲအရာဗ္တိုက်သရိုဟ်သၞောတ်တၠအဝဵုပၞာန်ဂှ် မွဲဂကောံဓဝ် ဗ္တိုက်ဟွံဂွံပုဟ်။ ဟိုတ်ဂှ်ရ အခါပိုယ်ဗ္တိုက်သၞတအ်ဂှ် တၚ်မဒှ်ပၟိက်ဇၞော်အိုတ်ဂှ်တှ်ေ ဓဝ်ညဳသာ အကြာဂကောံပၠန်ဂတးတအ်ဂှ် နွံပၟိက်မံၚ်ကွေံကွေံယျ။ အေ ဂှ်တှ်ေ သီုသ္ကုတ်သၠုၚ်ကျာ သီုသ္ကုတ်သၟဝ်ကျာတေံ နွံပၟိက်မံၚ် ကုဓဝ်ညဳသာဏောၚ်” သာ်ဝွံ သ္ဂးရ။
ပေါဲရုဲမာဲ မဖန်ဇန်ကဵုပၞော်တိတ်ပရေၚ်ဍုၚ်ကွာန် သွက်ကံၚ်ဇြဳပၞာန်သီအဝဵုဂှ် ဂွံကၠောန် သှ်ေဒၟံၚ်မသုန်ဂိတုရတုဲ ပၞာန်ထ္ပက် မထပိုတ်ရိုဟ်ကၞက်သၞောတ်တၠအဝဵုပၞာန်ဂှ်ဝွံ ရုပ်ရဴဟွံဂွံမံက်ကၠုၚ်ဏီရ။
အလဵုအသဳညဳသၟဟ်ဂကူ NUG မဒှ်ဒပ်ပၠတရဴ ဂကောံပၠန်ဂတးကညၚ်ဂှ်ဝွံ သွက်ဂွံကၠောန်သ္ပအပြံၚ်အလှာဲ ပ္ဍဲအရာအာက္ဍိုပ် အကာဲအရာပရေၚ်ဍုၚ်ကွာန် ပရေၚ်ပၞာန်ဂှ် ပၟိက်ဇၞော်ဒၟံၚ်ယျရောၚ် ဟီုဂးဒၟံၚ် အကြာညးဍုၚ်ကွာန်ဒစဵုဒစးသၞောတ်တၠအဝဵုပၞာန်ဂမၠိုၚ်ရ။
ညးခါတ်အကာဲပရေၚ်ပၞာန်တံဂှ်တှ်ေ အခိၚ်ကံၚ်ဇြဳပၞာန် ထ္ပက်ဒၟံၚ်ပၞာန် အပ္ဍဲတိဍာ်ညးတံ မပ္တဝ်လဝ်က္ဍိုပ်ဂှ် ညံၚ်အသိၚ်ပရေၚ်ပၞာန် ဂွံဒေါအ်ဒေၚ်အာဂှ် နကဵုဂကောံဇြဟတ်ပၠန်ဂတး နူဒေသတၞဟ်ဟ်ဂမၠိုၚ် ဒးကေတ်အဆက် သွက်ဂွံထ္မံက်ပေါဲဗ္တိုက်တံဂှ်ဏောၚ် ကဵုလဝ်ကသပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Telegram