မတ်မလီု၊ ဂျူလာၚ် ၁၉
ပ္ဍဲတွဵုရးဍုၚ်မန် အပ္ဍဲသၞာံဏံ ဟိုတ်နူဒပ်ကံၚ်ဇြဳပၞာန် ပန်ကၠုၚ်ကဵုလွဟ်ဇၞော်တုဲ ညးဍုၚ်ကွာန်ကောန်အရာပ် ၃၀ ပြၚ် ဇီုကပိုက်ချိုတ်အာလဝ်ရောၚ် ဂွံတီကေတ် အတိုၚ်တၚ်နၚ် ဌာန်ဒတန်အခေါၚ်အရာမၞိဟ်ဍုၚ်မန်ရ။
သၞာံဏံ နူဂိတုဂျာန္နဝါရဳ ၁ စဵုကဵု ဂိတုဂျူလာၚ် ၁၅ ဂှ် ဟိုတ်နူလွဟ်ဇၞော်ဒပ်ကံၚ်ဇြဳပၞာန်တုဲ ပ္ဍဲတွဵုရးဍုၚ်မန်ဂှ် ညးဍုၚ်ကွာန်ကောန်အရာပ် ၅ တၠချိုတ်တုဲ ဟွံအောန်နူ ၂၉ တၠ ဇီုကပိုက်ကလိဂွံလဝ်ဝပ်ရ။
ဟိုတ်နူဘဲလွဟ်ဇၞော်ဒပ်ပၞာန်တုဲ ကောန်အရာပ်ဒးပြဟ်လလုဲအာဂှ် ယဝ်ဒးၜတ်ကၞာတ်ကဵုသၞာံတုဲတေံမ္ဂး သၠုၚ်တိုန်ကၠုၚ်မွဲကဝက်ဆပြၚ်တုဲ ဗွဲမဂၠိုၚ်ဝွံ ဒၟါနူပန်ပှော်ကၠုၚ်လဝ် ကြာန်န်တုဲ ဒှ်လဝ်ရောၚ် ထ္မံက်ထ္ၜးလဝ် ဂလာန်နာဲအဲမန် ပရိုဝ်ဂရာမ်ဒါရိုက်တာ ဌာန်ဒတန်အခေါၚ်အရာမၞိဟ်ဍုၚ်မန်ရ။
ပ္ဍဲပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ်ဂှ် ဒးလဝ်ဘဲလွဟ်ဇၞော် ဒပ်ကံၚ်ဇြဳပၞာန် ဂၠိုၚ်အိုတ်တုဲ ပ္ဍဲၜါပွိုၚ်ဍုၚ်ဏံဂှ် ပရေၚ်ပန်ပှော်လွဟ်ဇၞော် ဒှ်လဝ် စဵုကဵု ၁၆ ဝါရ။
အတိုၚ်ဂလာန် ခရိုၚ်သဓီု ဗော်သွးကောန်ဂကူကရေၚ် KNU တအ်ဂှ်မ္ဂး အပ္ဍဲခရိုၚ်သဓီု တွဵုရးဍုၚ်မန်ဂှ် အပ္ဍဲဂိတုမေတုဲကၠုၚ်တေံ ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော် ကေုာံ ဗ္တိုက်ကဵုပၞာန်ကျာတုဲ ကောန်အရာပ်ပိတၠ ချိုတ်တုဲ တြဴတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
သ္အာၚ်နူဂှ်ပၠန် ဟိုတ်နူပဋိပက္ခပရေၚ်ပၞာန် အပ္ဍဲခရိုၚ်သဓီုဂှ်တုဲ ညးဒေသ ၂၀၀၀၀ ပြၚ် ဒးပါဲလဝ်ဘဲပၞာန်တုဲ ပ္ဍဲကဵုဏံ ၜိုတ်ပိဂအုံမွဲဂအုံရ ဂွံစဴလဝ်ဌာန်ဒၟံၚ်ရောၚ် ဂွံတီကေတ် အတိုၚ်ဂလာန်ခရိုၚ်သဓီု KNU ရ။
အပ္ဍဲသၞာံ ၂၀၂၄ တုဲကၠုၚ်တေံ ပ္ဍဲတွဵုရးဍုၚ်မန်ဂှ် ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော်တုဲ ညးဍုၚ်ကွာန်ကောန်အရာပ် ၄၅ တၠ ချိုတ်တုဲ ၁၂၅ တၠ ဇီုကပိုက်ကလိဂွံလဝ်ဝပ်ရောၚ် ဌာန်ဒတန်အခေါၚ်အရာမၞိဟ်ဍုၚ်မန် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media