နျူဒေလဳ၊ ဂျူလာၚ် ၁၉
ဟိုတ်နူပရေၚ်ကၟာတ်လဒဵုကေတ်အရေဝ်ဂမၠိုၚ်တုဲ ယဝ်ဟွံဂွံကၠေၚ်ဍေန် နူရုယှာကီုလေဝ် နကဵုအိန္ဒိယ ရာန်ကေတ်ကၠေၚ်ဍေန် နူကဵုဒၞါဲတၞဟ်ဟ်ဂွံမာန်ရောၚ် စှ်ေစိုတ်ဂှ် ဝန်ဇၞော်ကၠေၚ်ဍေန် ဟာဒေတ် သေန်ပူရဳ ဟီုလဝ် ပ္ဍဲဂိတုဂျူလာၚ် ၁၇ တေံရ။
အပ္ဍဲပွိုၚ် ၅၀ တ္ၚဲ ယဝ်မဝ်သဂိုဝ် ဟွံဂွံတၚ်တုပ်စိုတ် ကုယူကရုၚ်မ္ဂး နကဵုကၟိန်ဍုၚ် မရာန်ကေတ်ဒၟံၚ် ဗၞိက်တိတ်နူရုယှာတအ် ဒးဆေၚ်အာမုက်ကဵု ပရေၚ်တပ်ဒဏ်ကၟာတ်လဒဵုတံမာန်ရောၚ် သမ္မတအမေရိကာန် ဒဝ်နေဝ်ထြာမ် ဘပဠကၠုၚ်လဝ် ပ္ဍဲသတ္တာဟဏံရ။
အိန္ဒိယကီု ဍုၚ်လ္ၚဵုတအ်ကီု ယဝ်ကၠောန်ဒၟံၚ်ပရေၚ်ပိုန်ဒြပ်ကုရုယှာမ္ဂး ဒးဒုၚ်အာ ပရေၚ်တပ်ဒဏ်ကၟာတ်လဒဵုတံ ဇၞော်ကဵုဇြဟတ်မာန်ရောၚ် ညးအုပ်ကာ ဂကောံနေတဝ် မက်ရူတဳ ဟီုလဝ် ဗွဲတၞဟ်ခြာရ။
နကဵုအိန္ဒိယ ပတိတ်အာဇြဟတ် သွဂွံဂွံအထံက်အပၚ် နူဍုၚ်တၞဟ်ဟ်တံဂှ်ဏောၚ်တုဲ သောၚ်ကလးအာပြဒ္ဒညာကၠေၚ်ဍေန်ဏံဏောၚ်ဂှ် ဝန်ဇၞော်ပူရဳ ဟီုရ။
ဍုၚ်မပတိတ်ဒၟံၚ်ကၠေၚ်ဍေန်ရရ ညံၚ်ရဴဗရာဇြဳ ကေုာံ ကနေဒါတံကီု ဍုၚ်မလုပ်ကၠုၚ်ပ္ဍဲဗွဝ်ဖျာတၟိ ညံၚ်ရဴဂူယာနာတအ်ကီုဂှ် နွံဒၟံၚ်တၟာဂလိုၚ်ရောၚ် ဝန်ဇၞော်အိန္ဒိယ သ္ဂးရ။
သ္အာၚ်နူဂှ်ပၠန် နကဵုအိန္ဒိယ ထေက်ကဵုဒးလ္ၚတ်အာ နဲကဲကၠောန်ပ္တိတ်တအ် ဂၠိုၚ်ၚ်ဏောၚ်ဂှ်လေဝ် ဝန်ဇၞော်ဂှ် ဟီုရ။
အဲ ဟွံဒးဂွိၚ်ပုဟ်၊ ဒှ်ကၠုၚ်မွဲမွဲမ္ဂး ပိုယ်တအ် သောၚ်ကလးအာဏောၚ် သာ်ဝွံ ဝန်ဇၞော် ပူရဳ ဟီုဏာလဝ် ပ္ဍဲအသေအဟာန်ကေၚ်ကာကွတ်စက် မကၠောန်ဗဒှ်လဝ် ပ္ဍဲဍုၚ်နျူဒေလဳရ။
ကၠာတေံမ္ဂး ရာန်ကၠုၚ်လဝ်ကၠေၚ်ဍေန် နူကဵု ၂၇ ဍုၚ်ကီုလေဝ် အခိၚ်လၟုဟ် ညးတံ ရာန်ကၠုၚ်ကၠေၚ်ဍေန် နူကဵု ၄၀ ဍုၚ်ပြၚ် ဂွံဒၟံၚ်ယျရောၚ် ညးဟီုဗပေၚ်လဝ်ရ။
အပ္ဍဲပွိုၚ်တြဴဂိတု သၞာံဏံဂှ် အိန္ဒိယ ရာန်ကၠုၚ်လဝ်ကၠေၚ်ဍေန် ဇရေၚ်ရုယှာ ဂၠိုၚ်တိုန်ကၠုၚ်တီတီတုဲ ကမၠောန်ပူဂဵုဂမၠိုၚ် ပလံၚ်ပ္တိုန်ဂှ်ဝွံ ၜိုတ်ကဝက်ကၠေၚ်ဍေန် ရာန်ဒၟံၚ်နူမဝ်သဂိုဝ်ဂှ် နွံဏောၚ် ဂွံတီကေတ်ရ။
Ref: Reuters