မတ်မလီု၊ ဂျူလာၚ် ၁၉
ပ္ဍဲတွဵုရးဍုၚ်မန် မွဲဟူဏံ ကွဳစက်ဗၞိက်ဂၠိုၚ်ကဵုကၠံ ဒးဒုၚ်ရပ်လဝ် နကဵုတၚ်စောဲစပ် ဖ္ဍိုက်ကပေါတ်ဗၞိက်ဟွံလုပ်သၞောဝ်ဂှ် ညးမစုက်လုက်ကဵုကံၚ်ဇြဳပၞာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျူလာၚ် ၁၅ တုဲကၠုၚ်တေံတုဲ ကွဳစက်ဗၞိက် နူတွဵုရးကရေၚ် လုပ်စိုပ်ကၠုၚ်အပ္ဍဲတွဵုရးဍုၚ်မန်တအ်ဂှ် ကံၚ်ဇြဳပၞာန် ကၟာတ်လဒဵုရပ်ဒက်ကၠုၚ်လဝ် ပ္ဍဲဂၠံၚ်မတ်မလီု၊ ပံၚ်၊ သဓီု၊ ၜဳကလေၚ် ကေုာံ ကျာ်ထဝ်တအ်ရ။
အတိုၚ်ဂလာန် ညးမစုက်လုက်ကဵုကံၚ်ဇြဳပၞာန်တအ်ဂှ်မ္ဂး စဵုကဵုဂိတုဂျူလာၚ် ၁၈ ဂှ် ကွဳစက်ဗၞိက် ဒးဒုၚ်ရပ်လဝ် နွံကၠုၚ် ၁၇၀ ပြၚ်တုဲ ပ္ဍဲကဵုဏံ ကွဳစက်ဗၞိက်ဗွဲမဂၠိုၚ်ဂှ် ထိၚ်စွံလဝ် ပ္ဍဲကဵုဗ္ဒိုပ်ဒပ်ပၞာန်တအ်ကဵု ရုၚ်အကံက်အခေါန် ဒၞါဲမကြပ်တအ်ဂှ်ရ။
အခါလၟုဟ် ပ္ဍဲအရာရပ်ကၠုၚ်ကွဳစက်ဗၞိက်တအ်ဂှ် ရပ်ကၠုၚ်ဒၟံၚ် သီုကွဳစက်ကဵုလဝ်အခေါန် သီုကွဳစက်ဟွံကဵုလဝ်အခေါန်တံဂှ်တုဲ ကွဳစက်ကဵုလဝ်အခေါန်တအ်ဂှ်တှ်ေ သီကေတ်ဏာလဝ် နဒဒှ်ဒြပ်ကၟိန်ဍုၚ်ရောၚ် သ္ဂးရ။
အတိုၚ်ဂလာန် ညးဒေသဂွံဆဵုကေတ်နမတ်မွဲတၠ စပ်ကဵုပရေၚ်ရပ်ဒက်ကၠုၚ်ကွဳစက်ဗၞိက်တအ်ဂှ်မ္ဂး ဂကောံကံၚ်ဇြဳပၞာန်ပံၚ်ကောံဂှ်ဝွံ စၟဳတ်ဒၟံၚ်တၚ်နၚ် ဇၟာပ်ကွဳစက်ဗၞိက်တံဂှ်တုဲ သီဏာဒၟံၚ်မွဲတဲဓဝ်ရ။
ပရေၚ်ရပ်ဒက်ကွဳစက်ဗၞိက်ဂှ်ဝွံ ဟိုတ်နူအကြာသ္ကိုပ်ရး ဌာန်ဂအုပ်ပၞာန်ရးအဂၞဲဖျေံသ္ဇိုၚ်မတ်မလီုဂှ်ကဵု ဒုသ္ကိုပ်ရးတအ် အရေဝ်ဂၠိုၚ်ညးသ္ကအ် စပ်ကဵုပရေၚ်ကေတ်အရေဝ် လ္တူဗၞိက်သေံတံဂှ်တုဲ နူကဵုသ္ကိုပ်ရးဂှ် စၞောန်ကၠုၚ်လဝ် သွက်ဂွံရပ်ဒက် ကွဳစက်ဗၞိက် မလုပ်ကၠုၚ် ပ္ဍဲတွဵုရးဍုၚ်မန်ဖအိုတ်ရောၚ်ဂှ်လေဝ် ပရိုၚ်မံက်တိတ်ဒၟံၚ်ရ။
သ္အာၚ်နူဂှ်ပၠန် ရပ်ကၠုၚ်လၟုဟ်ဂှ် ရပ်ဒၟံၚ်သီုကဵုကွဳစက်ဗၞိက် မဆက်စပ်ဒၟံၚ်ကဵု ဇၞော်သ္ကိုပ် လ္ပာ်ဒပ်ပၞာန်ကဆံၚ်လ္တူတံဂှ်တုဲ ညးမဆက်စပ်ပါလုပ်ဒၟံၚ် အပ္ဍဲဒပ်တံဂှ်လေဝ် ဒှ်ဒၟံၚ်အကာဲအရာ ဒးဒုၚ်ကေတ်အရေဝ်မာန်ရောၚ် ညးမစုက်လုက်ကဵုကံၚ်ဇြဳပၞာန်တအ် ဟီုအိုတ်ရ။
တုဲကၠုၚ်ဂိတုမာတ်တေံဂှ်လေဝ် ပ္ဍဲတွဵုရးကရေၚ် ပွိုၚ်ဍုၚ်ဘာအၚ်ဂှ် ဂကောံကံၚ်ဇြဳပၞာန်တအ် ရပ်ကၠုၚ်လဝ် လၟိဟ်ကွဳစက်ဗၞိက် ဟွံဒုၚ်လဝ်အကံက်အခေါန် ၅၀၀ မပြၚ် မပၠောပ်နၚ်နူဍုၚ်သေံတအ်ဂှ်တုဲ ကဵုဒုၚ်လဝ်အခေါန်ဖလှာတုဲ ကလေၚ်ဗလးကဵုလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ