နေဗျဳဒဝ်၊ ဂျူ
ဒၟါနူၚုဟ်ဗၞိက်စၞစသုၚ်က္ဍၚ်ကၠုၚ်တုဲ အာဇီုကပိုက်ကဵု သ္ဇိုၚ်ဝန် စသြန်ဂိတုတအ်ကဵု ညးဍုၚ်ကွာန်ကဆံၚ်မၞိဟ်သ္ဇိုၚ်တံ ဇၞော်ကဵုဇြဟတ်ရောၚ် ဥူဝေန်ယှုၚ် ဝန်ဇၞော်ကၟိန်ဍုၚ် ပရေၚ်ဘဏ္ဍာကဵု ကိုန်စဳမာန်ဂှ် ဟီုရ။
ဟိုတ်နူၚုဟ်ဗၞိက်က္ဍၚ်ဒၟံၚ်သာ်ဏံတုဲ စၞောန်ကၠုၚ်လဝ် သွက်ဂွံတဵုလွဳဂလိုၚ်ပ္တိုန် သတ်ကၠေၚ်တိတ်ဂမၠိုၚ်၊ ပရေၚ်ကၠောန်ပ္တိတ်ဗၞိက် မဒုၚ်သ္ဇိုၚ်ကဵုပရေၚ်တဵုလွဳ၊ ပရေၚ်လွဳတိရစ္ဆာန်တအ် ညံၚ်ဂွံတောတက်ဂှ် သွက်ဂွံကၠောန်အာကီု၊ သွက်ဂွံပ္တိတ် ညံၚ်ဗၞိက်စသုၚ်သ္ဇိုၚ်တအ် ဂွံဂၠိုၚ်တိုန်ကၠုၚ်ရ။
ညးဍုၚ်ကွာန်မွဲတၠဂှ်တှ်ေ ၚုဟ်ဗၞိက် မ္ဒးက္ဍၚ်ဒၟံၚ်ဂှ်ဝွံ ပ္ဍဲဂၠံၚ်ပရေၚ်သွံရာန်ဗၞိက်တအ်ဂှ် ဟိုတ်နူသၞေဟ်ကၚ်ဂမၠိုၚ် ကံက်ဒၟံၚ်အခေါန်ဂၠိုၚ်ဂှ်တုဲ ၚုဟ်ဗၞိက်ဂှ်ဝွံ တၞဟ်ခြာအာကဵု အခိၚ်ကာလကၠာတေံကွေံကွေံရောၚ် ဟီုရ။
“ ဟိုတ်ၚုဟ်ဗၞိက်ဂွံက္ဍၚ်အဓိကဂှ်တှ်ေ ပ္ဍဲကဵုဂၠံၚ်တအ်ဂှ် ကံက်ကၠုၚ်မံၚ်အခေါန်တအ် ဂၠိုၚ်တုဲ ရဲသွံရာန်ဗၞိက်တအ်ဂှ်လေဝ် မွဲဒၞါဲ ဒးကဵုမွဲဠက်တှ်ေ ခရိတ်ဒးကဵုလဝ်ဏံဂှ် ကလေၚ်ပ္တိုန်ၚုဟ် ပ္ဍဲကပေါတ်ဗၞိက်တံဏံပၠန်ရ၊ ၚုဟ်ဗၞိက်ဖျာက္ဍၚ်ကၠုၚ်တုဲ ဒဒိုက်ညးဍုၚ်ကွာန်တအ်ဂှ်တှ်ေ ဇၞော်ကွေံကွေံရ” သာ်ဝွံ ဟီုရ။
သ္အာၚ်နူဂှ်ပၠန် ဟိုတ်နူၚုဟ်ဗၞိက်က္ဍၚ်တုဲ မ္ၚးနူကဵုညးဍုၚ်ကွာန်သ္ဇိုၚ်တအ်ဂှ် သ္ဇိုၚ်ဝန်သၟဝ်တဲကံၚ်ဇြဳပၞာန်တအ်လေဝ် ဒးဖန်စသုၚ်ဒၟံၚ် နူကၠာတေံဏီတုဲ သီုကဵုဒးဆေၚ်ဒၟံၚ်မုက်ကဵု ပြဒ္ဒညာသြန်လုပ်ကဵုသြန်တိတ် ဟွံသၟဟ်တးတံဂှ်ရောၚ် ညးဆက်ဟီုရ။
ညးဗြဴမွဲတၠဂှ်လေဝ် ဒၟါနူၚုဟ်ဗၞိက်က္ဍၚ်တုဲ သြန်ဂိတုဂွံဂှ်ကဵု ခရိတ်စသုၚ်ဂှ် ဟွံရုမ်ဂပ်ရတုဲ ကောန်ဇာတ်ညးတအ်သၟးဟွံက အလဵုညးတအ်လေဝ် ဒးအာစိုပ်ကၠောန်ဒၟံၚ်ကလောန် ဍုၚ်မွဲလ္ပာ်တေံရောၚ် ဟီုရ။
“သြန်ဂိတုဂွံဂှ် ၜိုတ်ၜါကိုဋ်ဘာ် ပိကိုဋ်ရဟီုတှ်ေ ခရိတ်စပ္ဍဲသ္ၚိဂှ် ဟွံရုမ်ပုဟ်လေဝ်။ ကပေါတ်ဒးရာန်တံဂှ်လေဝ် ၚုဟ်တိုန်မံၚ်ဖအိုတ်။ သြန်ဂိတုကဵု ပရေၚ်စသုၚ်မံၚ်စံၚ်တအ်ဂှ် ဟွံပြေပြံၚ်တုဲ ယဝ်ကောန်ဇာတ်နွံတှ်ေ ဗလးဏာၜၚ်ကံက်။ လ္ၚဵုဂှ်ပၠန် မၞိဟ်ဍောတ်မံၚ်ဏီတံဂှ်တှ်ေ အလဵုညးတအ်ရ တိုန်အာကၠောန်ကလောန်။ မၞိဟ်ကၠောန်ဟွံမာန်တအ်ဂှ်တှ်ေ ဗလးဏာကောန်ဇာတ်၊ အဓိကဂှ်တှ်ေ ဟိုတ်နူၚုဟ်ဗၞိက်ရဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် ကြဴနူပၞာန်သီအဝဵုတုဲ ၚုဟ်ဗၞိက်က္ဍၚ်ကၠုၚ်ဒၟံၚ်တအ် ညံၚ်ဂွံစှ်ေဂးတုဲ အပ္ဍဲကာလတုဲကၠုၚ်တေံ ကံၚ်ဇြဳပၞာန် ရပ်ကၠုၚ်လဝ် တၠကမၠောန်နူကဏ္ဍမဆေၚ်စပ်နာနာ၊ သၟာဗၞိက်ဂမၠိုၚ် သီုကဵုညးသွံရာန်ဗၞိက်တံရ။
ၜိုန်ရကံၚ်ဇြဳပၞာန် ရပ်ကၠုၚ်ဒၟံၚ်သာ်ဏံကီုလေဝ် ပ္ဍဲသၟဝ်တိဏံ ၚုဟ်ဗၞိက်စှ်ေအာဟွံမွဲတုဲ ပရေၚ်ကေတ်အရေဝ် မစိုပ်တရဴတံဂှ်လေဝ် ဟွံမွဲဂှ်ရ ၚုဟ်ဗၞိက်ဂှ် အခိၚ်လၟုဟ် ဟွံညိၚ်ဝတ် ဒှ်ဒၟံၚ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ ကြဴနူပၞာန်သီအဝဵုတုဲ ၚုဟ်ဗၞိက် ဂွံက္ဍၚ်ကၠုၚ်တိုန်ကၠုၚ်ဂှ်ဝွံ ဟိုတ်နူသြန်ဗၟာစှ်ေကီု၊ လလောၚ်ပ္တိတ် တၚ်လလောၚ်တြး ဟွံဇၞော်ကဵုပၟိက်တံဂှ်တုဲ သၞောတ်ဗ္ၜတ်ကၠုၚ်မံၚ်ကီု၊ အပ္ဍဲဒေသဂှ် ပတိတ်ကၠုၚ်ဗၞိက် ရုမ်မ်ဂပ်ပ်ဟွံမာန်တုဲ ရပ်ဒက်ကၠုၚ်ဒၟံၚ်ကပေါတ်ဗၞိက် မပၠောပ်ပ္တိုန်နၚ်နူဍုၚ်သ္အာၚ်တံဂှ်ရောၚ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ