ဝဝ်ဂါ၊ ဂျူလာၚ် ၂၀
ဒှ်ပရေၚ်ဗ္တိုက် ပကီုပရာပ်တုဲ လ္ပာ်အေဿရေ ကလေၚ်ပလန် ဗတိုက်ကၠုၚ် နကဵုပရေၚ်ပၞာန် ဇၞော်ကဵုဇြဟတ်တုဲဂှ် ပ္ဍဲကဵုဒၞါဲပၟိက်ဇၞော်အိုတ် သွက်ကောန်ဂကူဒရူဇြဳ ပ္ဍဲဍုၚ်သဳရဳယျာဂှ် ပေါဲဗ္တိုက်တၟိ ဒှ်ဒၟံၚ်ကီုလေဝ် ပ္ဍဲဂိတုဂျူလာၚ် ၁၉ တေံ အမေရိကာန် ဟီုကၠုၚ် ညးတအ်လုပ်အကြာပညဳကဵုလဝ် ညံၚ်ဂွံဂွံတၚ်တုပ်စိုတ်ဒေါအ်ပန်ပှော် အကြာအလဵုအသဳသဳရဳယျာကဵု အေဿရေ ရ။
ဟိုတ်နူပရေၚ်ဗ္တိုက် အကြာဂကူဒရူဇြဳကဵု ဂကူဗဳဒိုဝ်အေန် စဒှ်လဝ် ပ္ဍဲဂိတုဂျူလာၚ် ၁၃ ဏံဂှ်တုဲ မၞိဟ် ၆၁၃ တၠ ချိုတ်တုဲယျရောၚ် ဂကောံမၚ်ရံၚ်အခေါၚ်အရာမၞိဟ်သဳရဳယျာ ဟီုလဝ်ရ။
ပေါဲဗ္တိုက်သာ်ဏံ ဆက်ဒှ်ဒၟံၚ်ဂှ်ရ စပ်ကဵုအဝဵု က္ဍိုပ်သ္ကိုပ်ယာယဳ သဳရဳယျာ အာမက် အေဝ်ယှာရာတုဲ ပတိတ်ဒၟံၚ်သၟာန်အိုတ်ရ။
အေဿရေ ဗ္တိုက်ကၠုၚ် ဌာန်ဂအုပ်ပၞာန်ကီု သီုကဵုဗ္တိုက်ကၠုၚ်လဝ် ဂြိုဟ်ဍုၚ်ဒမာတ်သကာတ် ဍုၚ်ဇၞော်ဂှ် ဇၞော်ကဵုဇြဟတ်တုဲ ပ္ဍဲဂိတုဂျူလာၚ် ၁၆ တေံ လုပ်လဝ်အကြာရ။
ညးစၞးအမေရိကာန် စပ်ကဵုဍုၚ်သဳရဳယျာ တောမ် ဗာရက်ဂှ်တှ်ေ က္ဍိုပ်သ္ကိုပ်သဳရဳယျာ ကဵု သ္ကိုပ်ဝန်ဇၞော်အေဿရေတအ် တုပ်လဝ်စိုတ် လ္တူတၚ်တုပ်စိုတ်ဒေါအ်ပန်ပှော် အမေရိကာန်လုပ်ပညဳကဵုလဝ်ဂှ်ရောၚ် ဟီုလဝ် ပ္ဍဲဂိတုဂျူလာၚ် ၁၉ တေံရ။
အမာတ်ကလုတ်အမေရိကာန် စပ်ကဵုဍုၚ်တူရကဳ ဗာရက်ဂှ် ဍုၚ်ဂျဝ်ဒါန် မဒှ်ဍုၚ်ဇိုၚ်ဝုတ်ဒိုဟ်ကီု ဍုၚ်တူရကဳ မဒှ်ဍုၚ်ထံက်ဂလာန် က္ဍိုပ်သ္ကိုပ်သဳရဳယျာဂှ်လေဝ် ထံက်လဝ်ဂလာန် ကုတၚ်တုပ်စိုတ်ဏံရောၚ် ဟီုလဝ်ရ။
ဂကူဒရူဇြဳကီု၊ ဂကူဗဳဒိုဝ်အေန်ကီု၊ ညးမရှ်ေသှ်ေဘာသာ သောန်နဳတံကီု သီုဖအိုတ် ဖျေံလွဟ်တုဲ သွက်ဂွံဒက်ပ္တန်ဍုၚ်သဳရဳယျာတၟိ မဍိုက်ပေၚ်ကဵုပရေၚ်ၜိုဟ်လလမ် ပရေၚ်ညိၚ်ဝတ် ကရောံဂကူမၞိဟ်အောန်တၞဟ်တံဂှ် ညးဖတိုက်ဖအောဝ်လဝ်ရ။
Ref: AFP