ဂါဇြာ၊ ဂျူလာၚ် ၂၇
ပ္ဍဲဒေသဂါဇြာတေံ လၟိဟ်မၞိဟ်ပ္ဍဲပိဂအုံမ္ဂး ၜိုတ်မွဲဂအုံ ဟွံဂွံစစၞ လအ်ကၠုၚ်ယျရောၚ် ဂကောံအစဳဇန်ဇွောံမစၞစ ကုလသမဂ္ဂ WFP ကဵုသတိ ဟီုလဝ်ရ။
ညးဗြဴတအ်ကဵု ကောန်ၚာ်သၟတ် ၉၀၀၀၀ ပြၚ် နွံပၟိက်ဒၟံၚ် သွက်ဂွံလွဳလွတ်ယဲကာတၟေၚ်တုဲ ပရေၚ်စၞအာဟာရပိုတ်ကၠုၚ်ဂှ်လေဝ် ဂၠိုၚ်ကၠုၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး WFP ရ။
အပ္ဍဲသတ္တာဟဏံ စပ်ကဵုပရေၚ်ကၠောဝ်ဗျဵု ပ္ဍဲဂါဇြာဂှ်တုဲ တၚ်ကဵုသတိတအ် ဂၠိုၚ်တိုန်ကၠုၚ်မံၚ်ရ။
ပ္ဍဲဂိတုဂျူလာၚ် ၂၅ တေံ ဟိုတ်နူအာဟာရပိုတ်တုဲ ပ္ဍဲဂါဇြာ မၞိဟ် ၉ တၠ ထပ်ဒးချိုတ်အာလဝ်တုဲ ကြဴနူပေါဲပၞာန်စတုဲဂှ် ဒၟါနူအာဟာရပိုတ်တုဲ မၞိဟ်ဒးချိုတ်အာ နွံကၠုၚ် စဵုကဵု ၁၂၂ တၠယျဂှ် ဌာနဝန်ဇၞော်ပရေၚ်ထတ်ယုက် ဂကောံဟာမာသ် နွံပ္ဍဲဂါဇြာ ဟီုလဝ်ရ။
အေဿရေ မထိၚ်ဒက်လဝ် ပွထံက်ပၚ် ပ္ဍဲဂါဇြာ သီုဖအိုတ်ဂှ် ဟီုကၠုၚ်လဝ် ညးတအ် တာဒၞါလဝ် ပရေၚ်ပလံၚ်ဗစိုပ်အရီုဗၚ် ပ္ဍဲဂါဇြာဂှ်ဟွံမွဲတုဲ ဟိုတ်နူပရေၚ်စၞအာဟာရပိုတ်ဏံဂှ်တုဲ ပတိုန်လဝ်ဒုဟ် ကုဂကောံဟာမာသ်ရ။
ကြဴနူအမာတ်ကၠတ်ထဝ်ဗျိတိၚ် ပိဂအုံမွဲဂအုံပြၚ် ထ္ပက်စၟတ်တ္ၚဲ ဖ္တိုက်ဖ္အောဝ်လဝ် သွက်ဂွံတုပ်စိုတ် ပါလက်သတိုၚ် နဒဒှ်ဍုၚ်မွဲဍုၚ်တုဲဂှ် ပ္ဍဲအရာကဵုအရီုဗၚ် ပ္ဍဲဂါဇြာ နကဵုပၞာန်ကျာဂှ် ဒဒှ်ရဗျိတိၚ်ပါလုပ်အာဏောၚ် သ္ကိုပ်ဝန်ဇၞော် ကဳယာ သတာမာ ဟီုလဝ် ပ္ဍဲဂိတုဂျူလာၚ် ၂၅ တေံရ။
ခြာဟွံလအ်ဏံ ကဵုအာအခေါၚ်ပလံၚ်ဗစိုပ် အရီုဗၚ် ပ္ဍဲဂါဇြာ နကဵုပၞာန်ကျာဏောၚ် သၞာဲဒဴဂီုကၠီုအေဿရေဂမၠိုၚ် ဟီုကၠုၚ်တုဲဂှ် ဂလာန်သ္ကိုပ်ဝန်ဇၞော် ကဳယာသတာမာ မံက်တိတ်ကၠုၚ်သာ်ဏံရ။
အေဂျေန်ဇြဳကဵုအရီုဗၚ်ဂှ်တှ်ေ ကၠဟ်ဖျေံကဵုအရီုဗၚ်ပ္ဍဲဂါဇြာ နူပၞာန်ကျာဂှ်ဝွံ ဟွံရုမ်ဂပ်ပုဟ်ဂှ် ကၠာတေံ ကေၚ်ဟီုလဝ်ရ။
ယူအေအဳ ကေုာံ ဂျဝ်ဒါန်ဂှ်လေဝ် ဒဒှ်ရဖျေံအာကဵုကပေါတ်အရီုဗၚ် ပ္ဍဲဂါဇြာ နကဵုပၞာန်ကျာဏောၚ်ဂှ် ဟီုလဝ်ကီုလေဝ် မၚ်စၟဳဒၟံၚ်အခေါၚ် နူကဵုဒပ်ပၞာန်အေဿရေရောၚ် သ္ဂးရ။
သွက်ဂွံကလေၚ်ရုပ်သီကဵု ဒဒှ်မတာဒၞါလဝ် ပရေၚ်ပလံၚ်ဗစိုပ်အရီုဗၚ် ပ္ဍဲဂါဇြာဂှ် ဂျာမနဳ၊ ပြၚ်သေတ်၊ ဗျိတိၚ်တအ် ဖတိုက်ဖ္အောဝ်လဝ် အေဿရေ ပ္ဍဲဂိတုဂျူလာၚ် ၂၅ တေံရ။
Ref: BBC