ဍုၚ်ကြုက် မလုပ်ပညဳပညပ်ကဵုအကြာပ္ဍဲပရေၚ်ဍုၚ်ဗမာဂှ် ထံက်ပၚ်ကဵုဒၟံၚ်လွဟ် ကုဒပ်ကံၚ်ဇြဳပၞာန်

နေဗျဳဒဝ်၊ ဂျူလာၚ် ၂၇

ဍုၚ်ကြုက် မလုပ်ပညဳပညပ်ကဵုအကြာ အပ္ဍဲပေါဲဗ္တိုက်ပရေၚ်ပၞာန် ဒှ်ဒၟံၚ်အပ္ဍဲပၞာန်သီအဝဵု ပ္ဍဲဍုၚ်ဗၟာဏံဂှ် ထံက်ပၚ်ဒၟံၚ် မကမ်လွဟ်လက်နက် ကုဒပ်ကံၚ်ဇြဳပၞာန်ရောၚ် သက်သဳသာဓကဂမၠိုၚ် မံက်တိတ်ကၠုၚ်ရ။

အပ္ဍဲသတ္တာဟတုဲကၠုၚ်တေံ ဗ္ဒိုပ်ဒပ်ကံၚ်ဇြဳပၞာန် နွံဒၟံၚ်ပ္ဍဲပိကွာန် နူပွိုၚ်ဍုၚ်(ပုသိမ်ကြီး) ကဵု ပွိုၚ်ဍုၚ် (မတ္တရာ) ရးမာန္တလေတအ်ဂှ်  ဒပ်ပၞာန်စဵုဒၞါညးဍုၚ်ကွာန် PDF မာန္တလေတအ် ဗ္တိုက်လဝ်တုဲ ပ္ဍဲကဵုလွဟ်သီဂွံလဝ်ဂှ် ကဠာချူလဝ်ယၟုကမ္ပဏဳ NORINCO ပါလုပ်ဒၟံၚ်ရ။

အတိုၚ်ဗီုဓာတ်စၟတ်သမ္တီ PDF မာန္တလေ မလလောၚ်ပ္တိတ်လဝ် ပ္ဍဲဂိတုဂျူလာၚ် ၂၁ တေံဂှ်မ္ဂး ပ္ဍဲကဵုကပေါတ်လွဟ်လက်နက်သီဂွံလဝ်ဂမၠိုၚ် ဂွံဆဵုကေတ်ကဠာမကမ် ၁၄ မ ချူလဝ် ကမ္ပဏဳ NORINCO ရ။

စပ်ကဵုပရေၚ်ဏံတုဲ ပ္ဍဲအရာထံက်ပၚ်သွံကဵုလွဟ် ကုဒပ်ကံၚ်ဇြဳပၞာန်ဂှ် ဒှ်ပရေၚ်ကမ္ပဏဳလွဟ်ပၞာန်ဍုၚ်ကြုက်ပိုၚ် China North Industries Co. Ltd (NORINCO) ဆက်ပါလုပ်သွံကဵုဒၟံၚ်လွဟ်ရောၚ် ပ္ဍဲဂိတုဂျူလာၚ် ၂၅ တေံ Justice For Myanmar သ္ပဒတန် လလောၚ်ပ္တိတ်လဝ်ရ။

ပ္ဍဲကဵုလွဟ်သီဂွံလဝ်ဂမၠိုၚ် စက်ထ္ၜးဂၠံၚ် သွက်ဂွံပသောၚ်မာၚ် GBP128 ပ္တိတ်နူကဵု NORINCO လေဝ် ပါလုပ်တုဲ စက်ဏံဝွံ ရပ်စပ်ပ္ဍဲအရာဗဒှ်ဂၠံၚ် ပ္ဍဲကဵုဒၞါဲမာၚ်နွံ ပ္ဍဲပေါဲဗ္တိုက်ရ။

စက်တံဏံဂှ် ရံၚ်ကေတ် သွံကဵုလဝ် ရုပ်သ္ကိုပ်သၞာဲဒဴကၠောန်ပ္တိတ်ကပေါတ်စဵုဒၞါ မကေတ်လဝ်လျိုၚ် ပရေၚ်ကၠောန်ပ္တိတ်လွဟ်လက်နက်ပၞာန် ဒပ်ကံၚ်ဇြဳပၞာန်တအ် အတိုၚ်လိက်ကသုက် သၞာံ ၂၀၁၇ ဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ကမ္ပဏဳ NORINCO ဝွံ သွက်ဒပ်ကံၚ်ဇြဳပၞာန် ဂွံကၠောန်ပ္တိတ်လွဟ်လက်နက်ပၞာန်အပ္ဍဲဍုၚ်မာန်ဂှ် ထံက်ပၚ်ကဵုဒၟံၚ် လွဟ်လက်နက်ပၞာန်တအ်ကဵု နဲကွတ်ပညာတအ်ဂှ်တုဲ ပ္ဍဲသၞာံ ၂၀၁၇ ဂှ် ၜါလ္ပာ် တုပ်လဝ်စိုတ် သွက်ဂွံသၠုၚ်ပ္တိုန် ပရေၚ်ပံၚ်တောဲ ပ္ဍဲပရေၚ်သွံရာန် စပ်ကဵုကပေါတ်ဗၞိက်ကာစဵုဒၞါ ကေုာံ နဲကွတ်ပညာမဆက်စပ်တံဂှ်ရောၚ် JFM သ္ဂးရ။

နကဵုကံၚ်ဇြဳပၞာန် ဂွံကလေၚ်ထိၚ်ကေတ်တိဍာ် မဒးဆောံလေၚ်လဝ်တံမာန် ပ္ဍဲကဵုပရေၚ်ပၞာန်မဝေၚ်ကၠုၚ် နကဵုဇြဟတ်ပံၚ်ဖျပ် ပၞာန်တိုက်၊ ပၞာန်ဍာ်၊ ပၞာန်ကျာဂှ် ကြဴမတ်ဂှ် ဍုၚ်ကြုက် ထံက်ပၚ်ရီုဗၚ်ကဵုဒၟံၚ် ကပေါတ်လွဟ်လက်နက်နွံဒၟံၚ်ရောၚ် ညးခါတ်အကာဲပရေၚ်ပၞာန်ဂမၠိုၚ် သ္ၚဳဂၠိပ်လဝ်ရ။

ၜိုန်ရအလဵုအသဳကြုက် လေပ်ဟီုဂး ဒဒှ်ရဒ္ဂေတ်ဗက်ဒၟံၚ်အတိုၚ်မူ ဟွံလုပ်စိုပ်ပလာပ်ပထုဲ ပ္ဍဲပရေၚ်ဍုၚ်ဗမာဂှ်ကီုလေဝ် ပ္ဍဲပရေၚ်မလုပ်အကြာပညဳပညပ်ကဵုလဝ် အကြာကံၚ်ဇြဳပၞာန်ကဵု ဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာတအ်ဂှ်တှ်ေ ဒစေၚ်ဒၟံၚ် လ္ပာ်ဒပ်ပၞာန်ရ။

အရာမတၟေၚ်မွဲဂှ်တှ်ေ အပ္ဍဲပရေၚ်ပၞာန် ၁၀၂၇ တေံ ဒပ်ကဝ်က MNDAA မထိၚ်ဂွံလဝ်ဍုၚ်လာယှိုဝ် နူကဵုရးသေံသ္ကုတ်သၟဝ်ကျာဂှ် ကံၚ်ဇြဳပၞာန် ဟွံဒးဖံက်ပန်သၞာတ်မွဲသာ် ဇြဟတ်ဓရိုဟ်အလဵုအသဳကြုက်သၟးဂှ် ကလေၚ်ဂွံလဝ်ဍုၚ်ဏံ နူကဵုတဲ MNDAA ရ။

ဒပ်ကဝ်က MNDAA ဂှ်လေဝ် ဟိုတ်မ္ဒးဆုတ်ကလေၚ်လဝ် နူဍုၚ်လာယှိုဝ် မသီဂွံလဝ်ပွိုၚ်ဒ္စါံဂိတုဂှ်ဝွံ ဒှ်ဟိုတ်နူဇြဟတ်ဓရိုဟ်ပရေၚ်ဍုၚ်ကွာန်ရောၚ် ဟီုပ္တိတ်လဝ်ရ။

သ္အာၚ်နူဂှ်ပၠန် ပ္ဍဲကဵုပေါဲသဳကၠဳ အလဵုအသဳကြုက်က္ဍိုက်ပ်ဂှ် ဍုၚ်နံၚ်ချဵု ဒပ်တအာၚ် TNLA သီဂွံလဝ်ဂှ်ကီု သီုကဵုမသုန်ဍုၚ်ဂှ် ဂကောံဒပ်သီုဖအိုတ် သွက်ဂွံကလေၚ်ဆုတ်အာ ပ္ဍဲဒေသပလံၚ်ဂွံအခေါၚ်အုပ်ဓုပ်အပိုၚ်ဂှ် ကံၚ်ဇြဳပၞာန် အာတ်မိက်လဝ်ရ။

ဆ္ဂး တၚ်အာတ်မိက်ဏံဂှ် လ္ပာ် TNLA ဟွံဖ္ဍိုက်ဗပေၚ်ကၠုၚ်တုဲ ဍုၚ်နံၚ်ချဵု နွံဒၟံၚ်လ္တူဂၠံၚ်တရဴသွံရာန်ဗၞိက်ပယျဵု ကြုက်−ဗၟာဂှ် ကံၚ်ဇြဳပၞာန် ကလေၚ်ဝေၚ်ကၠုၚ်လဝ်ပၞာန်တုဲ ထိၚ်ဂွံလဝ်ရ။

အခိၚ်လၟုဟ် အလဵုအသဳကြုက် ထံက်လဝ်ဂလာန်ကဵု ပေါဲရုဲမာဲကံၚ်ဇြဳပၞာန် မကၠောန်ဗဒှ်အာ အပ္ဍဲဍုၚ်ဗၟာ ပ္ဍဲကၞောတ်သၞာံဏံဂှ်တုဲ ဗွဲလက္ကရဴဂှ် လုပ်ပညဳပညပ်ကဵုဒၟံၚ်ပ္ဍဲပရေၚ်ဍုၚ်ဗၟာရ။

မွဲလ္ပာ်ဂှ်ပၠန် ကမ္ပဏဳဍုၚ်ကြုက်ပိုၚ် NORINCO ဝွံ နူသၞာံ ၂၀၂၀ စဵုကဵုသၞာံ ၂၀၂၂ အပ္ဍဲပွိုၚ်ပိသၞာံဂှ် သွံတြးကဵုလဝ် ကပေါတ်စက် သွက်ဂွံကၠောန်ပ္တိတ်လွဟ်ပၞာန် နူကဵုဗၞိက်ပလံၚ်ပ္တိတ်တအ်ဂှ်မွဲကဆံၚ် ဇရေၚ်ရုၚ်သ္ကိုပ်သၞာဲဒဴကၠောန်ပ္တိတ်ကပေါတ်ဗၞိက်ကာစဵုဒၞါ ကံၚ်ဇြဳပၞာန်ဂှ်ရောၚ် JFM သ္ဂးရ။

အတိုၚ်လိက်ဒုၚ်စဳရေၚ် ညးစၞးတၟေၚ်ကုလသမဂ္ဂ စပ်ကဵုဍုၚ်ဗၟာ ပ္ဍဲသၞာံ ၂၀၂၃ ဂိတုမေ ဂှ်မ္ဂး ကမ္ပဏဳပါ် China Wanbao Engineering Corporation နူကဵုကမ္ပဏဳ NORINCO ဂှ်ဝွံ နူသၞာံ ၂၀၂၀ ဂိတုဖေဖဝ်ဝါရဳ စဵုကဵုသၞာံ ၂၀၂၂ ဂိတုဒဳဇြေမ်ဗာဂှ် သွံတြးကဵုလဝ်ဗၞိက်ပ္တိတ်မၞုံၚုဟ်မး အကြာ ၅−၁၀ မဳလျာန် သြန်ဒဝ်ဠာအမေရိကာန် ကုကံၚ်ဇြဳပၞာန်ရ။

အတိုၚ်တၚ်နၚ် JFM မ္ဂး ကမ္ပဏဳ NORINCO ဝွံ ညံၚ်ဂွံချုက်လိက်ကသုက်စပ်ကဵုပရေၚ်ကၠောန်ပ္တိတ်လွဟ်ပၞာန် သွက်ကံၚ်ဇြဳပၞာန်မာန်ဂှ် ကၠောန်ကဵုဒၟံၚ် နဒဒှ်ညးရေၚ်တၠုၚ်ဖဵုတုဲ သီုကဵုစဳဇန်ကဵုဒၟံၚ် သွက်သၞာဲဒဴဒပ်ပၞာန်တအ် ဂွံကတ်ဗ္တောန်အပ္ဍဲဍုၚ်ကြုက်ရ။

ကမ္ပဏဳဏံဂှ် ကံၚ်ဇြဳကၟိန်ဍုၚ်ကြုက် ပိုၚ်ပြဳလဝ်တုဲ အတိုၚ်စေဝ်ပၞောန်ထိၚ်ဒက်ကပေါတ်ဗၞိက်ကြုက်ဂှ်မ္ဂး ဗၞိက်ပလံၚ်ပ္တိတ်ကမ္ပဏဳ NORINCO ပ္ဍဲဍုၚ်ဗၟာဂှ်ဝွံ ဒးကေတ်အခေါၚ် နူအလဵုအသဳကြုက်ရောၚ် ထံက်ထ္ၜးလဝ်ရ။

ဟိုတ်ဂှ်ရ သွက်ဂွံဒေါအ်ဒေၚ်အာ ပရေၚ်မသွံတြးဒၟံၚ်လွဟ်လက်နက်ပၞာန်၊ ကပေါတ်စက် ကုကံၚ်ဇြဳပၞာန်၊ ပရေၚ်ပ္ကတ်ပ္ကေၚ်ဗ္တောန်ကဵုကွတ် ကေုာံ ပရေၚ်ပါ်ပရအ်ကဵုဒၟံၚ်နဲကွတ်ပညာထံၚ်ပရိုၚ်တအ်ဂှ် နကဵုအလဵုအသဳကြုက် ဒးတပ်ဒဏ်ကၟာတ်လဒဵု ကမ္ပဏဳ NORINCO ဏံဏောၚ်ဂှ် JFM အာတ်မိက်လဝ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်−MDY PDF