မတ်မလီု၊ ဂျူလာၚ် ၂၇
ပ္ဍဲတွဵုရးဍုၚ်မန် ဒၟါနူအသိၚ်လဗိုတ်ကျာဝဳဖာတုဲ ကျာမေလံၚ်ကီု သီုကျာသ္ကာတ်ပိုက်တအ်ဂှ်တုဲ ညးဍုၚ်ကွာန်ဒေသဒးဘဲကျာတအ် ပရေၚ်လီုလာ်ဆောံလေၚ်ဂၠိုၚ်လဝ်ဂှ် ဟွံဂွံအရီုဗၚ် နူကံၚ်ဇြဳပၞာန်ဏီရောၚ် ညးဒေသဂမၠိုၚ် ကေုာံ ဂကောံရီုဗၚ်ဟံၚ်ပြာ်မှာဇန်တအ် ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျူလာၚ် ၂၃ တုဲကၠုၚ်တေံတုဲ ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်၊ သဓီု၊ ပံၚ်၊ မုဟ်ဍုၚ်၊ ဇြပ်ဗု ကေုာံ ပွိုၚ်ဍုၚ်ရေဝ်တအ်ဂှ် ဟိုတ်နူကျာမေလံၚ်ကဵု ကျာသ္ကာတ်ပိုက်ဂှ်တုဲ မၞိဟ်မွဲတၠ ချိုတ်အာလဝ်တုဲ ဟွံအောန်နူ ၁၄ တၠ ကလိဂွံလဝ်ဝပ်တုဲ သ္ၚိ ၅၀၀ ပြၚ် လီုလာ်ဆောံလေၚ်အာလဝ်ရ။
ညးဍုၚ်ကွာန်ဒးဘဲကျာ ဗွဲမဂၠိုၚ်ဝွံ ဟိုတ်နူဟွံဂွံအရီုဗၚ်ကံၚ်ဇြဳပၞာန်တုဲ ဒးမံၚ်ဒၟံၚ် ပ္ဍဲဘာလကျာ်၊ ဇြပ်သ္ဘၚ်ဓဝ် ကေုာံ သ္ၚိဒၟံၚ်မသကလောကောဒေံတအ်ဂှ်တုဲ ဂွံကလေၚ်ပလေဝ် သ္ၚိဒၟံၚ်မလီုလာ်အာဂှ် အခက်အခုဲနွံဒၟံၚ်ရ။
ညးတာလျိုၚ်ဂကောံရီုဗၚ်ဟံၚ်ပြာ်ပရေၚ်မၞိဟ်မွဲတၠဂှ်တှ်ေ လ္ပာ်ကံၚ်ဇြဳပၞာန် ရီုဗၚ်ကၠုၚ်ညးဍုၚ်ကွာန်ဒးဘဲကျာတအ်ဂှ် ဟွံဂွံဆဵုကေတ်ဏီတုဲ အခိၚ်လၟုဟ် မ္ၚးနူဒၞါဲမံၚ်ဂှ် ဇွောံမစၞစတံဂှ်လေဝ် နွံပၟိက်မံၚ်ကဵုအရီုဗၚ်ရောၚ် ဟီုရ။
“အခိၚ်ပိုယ်တအ်နွံဂှ် ဂကောံဇိုၚ်ခ္ဍာ်ဗ္ကေတ်ရ ပလံၚ်ကဵုမံၚ်ဂှ်နွံ။ အလဵုအသဳဂှ်တှ်ေ ဟွံဂွံဆဵုကေတ်ပုဟ်။ ပြဟ်ဟ်ဏံ သ္ၚိတအ်ဂှ်စာ်ထောၚ်အာတုဲ ဒးမံၚ်ဒၟံၚ်ပ္ဍဲဘာလကျာ်တအ် မုတအ်ဂှ်နွံ။ သ္ၚိလ္ၚဵုတံဂှ်တှ်ေ ကလေၚ်သိုၚ်ဟွံမာန်ဏီပုဟ်။ သ္ၚိလ္ၚဵုတအ်ဂှ်ပၠန်လေဝ် ကၟဳသောတ်သၠာန်အာဂှ်နွံ။ နွံပၟိက်ဒၟံၚ်ဂှ်တှ်ေ တၟာဂလိုၚ်ရ မ္ၚးနူဒၞါဲမံၚ်ဂှ် စၞစဂှ်တှ်ေ သာတုဲနွံပၟိက်ရ” သာ်ဝွံ သ္ဂးရ။
ပြဟ်ဟ်ဏံ ပ္ဍဲဒေသဒးဘဲကျာတအ်ဂှ် နွံပၟိက်ဒၟံၚ်ကဵုဍာ်သုၚ်ကီု၊ ဂဥုဲဇဗ သွက်ညးဒေသဒးလဝ်ဘဲဝပ်တအ်ကီု၊ ဟိုတ်နူဗြဲဆက်ဂူဒၟံၚ်တုဲ နွံပၟိက်ဒၟံၚ်ကဵုကၟဳဒဒၚ်တအ်ရောၚ် ညးဆက်ဟီုရ။
အတိုၚ်တလဳဂရာမ်ချာန်နေဝ်ကံၚ်ဇြဳပၞာန်တအ် ထ္မံက်ထ္ၜးလဝ်ဂှ်မ္ဂး ဂကောံကံၚ်ဇြဳပၞာန် တွဵုရးဍုၚ်မန်ဝွံ ပ္ဍဲဂိတုဂျူလာၚ် ၂၆ ဂှ် အာစိုပ်ရီုဗၚ်လဝ် ညးဍုၚ်ကွာန်ဒးဘဲကျာ ပွိုၚ်ဍုၚ်ပံၚ်ရောၚ် ထ္မံက်ထ္ၜးလဝ်ရ။
ပ္ဍဲအရာရီုဗၚ်သာ်ဏံဂှ် သ္ၚိသရိုဟ်လီုလာ်အာတအ်ဂှ်တှ်ေ မွဲမမ္ဂး သြန်ၜါကိုဋ်ဒ္ကေဝ်၊ သ္ၚိကၟဳသၠာန်အာတအ်ဂှ် မွဲကိုဋ်ဒ္ကေဝ်၊ ယဝ်ဂွံဝပ်မ္ဂး မသုန်ဠက်ဒ္ကေဝ် ကေုာံ ညးဍုၚ်ကွာန်ဒးဘဲကျာမွဲတၠမ္ဂး ထံက်ပၚ်ကဵုလဝ် သွက်ဇွောံမ မွဲတၠ ၅၀၀၀ ဒ္ကေဝ်ရောၚ် သ္ဂးရ။
ညးဍုၚ်ကွာန်ဒးဘဲကျာတအ်ဂှ်တှ်ေ လ္ပာ်ကံၚ်ဇြဳပၞာန် ရီုဗၚ်ကဵုမံၚ်ရောၚ် ၜိုန်ဟီုမံၚ်ကီုလေဝ် ဒဵုကဵုအခိၚ်လၟုဟ် ဟွံဂွံအရီုဗၚ်ဏီတုဲ ပမာဏသြန် ကံၚ်ဇြဳပၞာန် ရီုဗၚ်ကဵုဂှ်လေဝ် သွက်ဂွံကလေၚ်ရပ်စပ် ပ္ဍဲပရေၚ်ဖျေံဒၞါဲဝါဲတအ်ဂှ် ဟွံရုမ်ဂပ်ရောၚ် ပါ်ပါဲလဝ်ရ။
ဟိုတ်နူကျာမေလံၚ်ကဵု ကျာသ္ကာတ်ပိုက်တအ်ဂှ်တုဲ အပ္ဍဲတွဵုရးဍုၚ်မန် ပ္ဍဲပွိုၚ်ဍုၚ် ၆ ဟွံကဂှ် တိုၚ်ပၟတ်ဂမၠိုၚ် ဒေါမ်စှ်ေအာလဝ်တုဲ ပၟတ်ဓာတ်လလဳ ပိုတ်သ္ကုတ်အာနွံတုဲ ဟိုတ်နူတၞံဆုဇၞော်ဇၞော် သရိုဟ်စှ်ေတုဲလေဝ် ဂၠံၚ်လ္ၚဵု အာကၠုၚ်ဟွံဂွံ ဒှ်အာလဝ်ယာယဳရ။
ပရိုၚ်−သြၚ်လောန်တိုၚ်(မ်)
ဗီုရုပ်−Ashin Sanda Zawti