တာကာ၊ ဂျူလာၚ် ၂၉
ဗေန်ဂလာဒေတ် ရန်ကဵုပရေၚ်ကြံၚ်မ္ၚိုဟ် ပ္ဍဲပရေၚ်သွံရာန်ဗၞိက် ဂွံပြေပြံၚ်ကီု သီုညံၚ်အခေါန်ဖလှာ နူကဵုအလဵုအသဳထြာမ် မသ္ပဒတန်လဝ်ဂှ် ဂွံသက်သာတိုန်ဂှ်တုဲ ဗ္ကန်လဝ်က္ၜၚ်ကျာ ပ္တိတ်နူကမ္ပဏဳဗိုဝ်ရေန် ၂၅ ဖ္ဍိုက်တုဲ သၠုၚ်ပ္တိုန်လဝ်အသိၚ်ရာန်ကပေါတ်ဗၞိက်အမေရိကာန်တအ်ဂှ်ရောၚ် သၞာဲဒဴကဆံၚ်သၠုၚ်မွဲတၠ ဟီုလဝ် ပ္ဍဲဂိတုဂျူလာၚ် ၂၇ တေံရ။
သွက်ဂွံဝေၚ်ပါဲ အခေါန်ဖလှာအမေရိကာန် ဖျေံလဝ် ၃၆ တၟံကၠံဂှ်ကီု၊ သွက်ဂွံဖအောန်ဖျေံ အရာမတၞဟ်ခြာဒၟံၚ် ပ္ဍဲပရေၚ်သွံရာန်ဗၞိက် အကြာဗေန်ဂလာဒေတ်ကဵု အမေရိကာန် ၆ ဗဳလျာန်ဒဝ်ဠာဂှ်တုဲ ဗေန်ဂလာဒေတ် ဖန်ဇန်ကၠုၚ်ဒၟံၚ်သာ်ဏံ နဒဒှ်ဗျူဟာဍောတ်တ်မွဲကီုရ။
ဟိုတ်နူအမေရိကာန် ကဵုလဝ်သမ္တီ ဒဒှ်ရကံက်ဂလိုၚ်ပ္တိုန်အာ အခေါန်ဖလှာဂှ်ဏောၚ်တုဲ သွာၚ်ဗၞိက်ပလံၚ်ပ္တိုန်ဍုၚ် နူဗေန်ဂလာဒေတ် ဗွဲတၟေၚ် သွာၚ်ကမၠောန်ဇိၚ်ဂၠိက်ယာတ်ဂှ် ချဳဒရိုက်အာတုဲ ပ္ဍဲဗွဝ်ဖျာညးတအ်ဇၞော်အိုတ်မွဲဏံဂှ် ဘဲအန္တရာယ်ဒးဆောံလေၚ်ကၠုၚ် ပရေၚ်ပြိုၚ်ပ္ကာန်တအ်မာန်ဂှ် နွံဒၟံၚ်ရ။
နကဵုညးတအ် နွံပၟိက်ဒၟံၚ်ကဵု က္ၜၚ်ကျာတၟိမွဲ ဇၞော်ကဵုဇြဟတ်တုဲ အပ္ဍဲပွိုၚ်မွဲၜါသၞာံဏံ ဂွံရာန်ဒှ်ကၠုၚ်မာန်ရောၚ် ဝန်ဇၞော်ပရေၚ်ပိုန်ဒြပ် ရာမာန် ဟီုလဝ်ကဵု အ္စာပရိုၚ်ဂမၠိုၚ်ရ။
နူကဵုကမ္ပဏဳဗိုဝ်ရေန် ဖျေံသ္ဇိုၚ်အမေရိကာန်ဂှ် ကၠာတဲ ၜိုန်ရဗ္ကန်လဝ်က္ၜၚ်ကျာ ၁၄ ဖ္ဍိုက်ကီုလေဝ် လၟုဟ်ဂှ် ဗ္ကန်လဝ် ဒှ်ကၠုၚ်စဵုကဵု ၂၅ ဖ္ဍိုက်ယျရောၚ် ညး ဟီုရ။
မ္ၚးနူတၚ်တုပ်စိုတ် ပရေၚ်ရာန်ကေတ်လဝ်က္ၜၚ်ကျာဂှ် ဗေန်ဂလာဒေတ် သၠုၚ်ပ္တိုန်အသိၚ်တုဲ သီုကဵုရာန်ပၠောပ်လဝ် ဂျုၚ်၊ ကၠေၚ်ၜဲ (ပဲပိစပ်ဆီ) ကေုာံ တောဝ်ချဵုတအ်ဂှ်ရ။
အတိုၚ်တၚ်တုပ်စိုတ် ထ္ပက်လဝ်စၟတ်တဲ ပ္ဍဲဂိတုဏံ ပြဟ်ဟ်တေံဂှ်မ္ဂး ဗေန်ဂလာဒေတ်ဝွံ အပ္ဍဲပွိုၚ် ၅ သၞာံကၠုၚ်စိုပ်ဏံ လၟေၚ်သၞာံ ဗ္ကန်ရာန်ကေတ်အာလျိုၚ်တာန် ဂျုၚ် ၇ ကိုဋ် နူကဵုအမေရိကာန်ဏောၚ်ရ။
ဟိုတ်နူပြဝဏံတုဲ ယှအ်ဖျေံပရေၚ်ကြံၚ်မ္ၚိုဟ် ဒှ်ဒၟံၚ်ပ္ဍဲပရေၚ်သွံရာန်ဗၞိက် ကုအမေရိကာန်မာန်ကီု၊ ပရေၚ်ဇီုကပိုက် လ္တူကိစ္စထြာမ်လလောၚ်တြးလဝ်အခေါန်ဖလှာတအ်ဂှ် သက်သာကၠုၚ်ဏောၚ်ဂှ် သၞာဲဒဴဗေန်ဂလာဒေတ်ဂမၠိုၚ် ဟီုလဝ်ရ။
Ref: Reuters