မတ်မလီု၊ ဂျူလာၚ် ၂၉
ပ္ဍဲတွဵုရးဍုၚ်မန် ပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်ဂှ် ကောန်ပၞာန်ပျဳတုသေတ်ကံၚ်ဇြဳပၞာန် ပိတၠ ဒးဒုၚ်ပန်ဂစိုတ်လဝ်ကဵုသေနာတ်တုဲ ၜါတၠ ချိုတ်တုဲ မွဲတၠ ဇီုကပိုက်ကလိဂွံလဝ်ဝပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဂျူလာၚ် ၂၆ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် ကောန်ပၞာန်ပျဳတုသေတ် ဥူတာန်ဇြဝ်ဥူကဵု ဥူအံၚ်ကိုဝ်ဝေန် မစဴကၠုၚ်နူကဵုပ္တိတ်လှုဲ ပ္ဍဲဆေၚ် Kpay နူကဵုကွာန်(ပုတိန်ရိုး) ပွိုၚ်ဍုၚ်သဓီုဂှ် ဂကောံပၠန်ဂတးတအ် ပန်ဏာလဝ်ကဵုသေနာတ်ရ။
ညးတအ်ၜါတၠ ပ္တိတ်လှုဲတုဲအခိၚ်စဴကၠုၚ်ဂှ် ဒးဒုၚ်ပန်ဂစိုတ်လဝ် နကဵုသေနာတ် ကရပ်ဘာတန်သၠုၚ်ပါ် ကွာန်(ပုတိမ်ရိုး) ဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရောၚ် ညးဒေသဂမၠိုၚ် ဂးရ။
ကောန်ပၞာန်ပျဳတုသေတ်ၜါတၠဏံဝွံ သီုဒှ်ကောန်ဂကောံကံၚ်ဇြဳပၞာန် ဗ္တိုက်သရိုဟ်ပွပကီုပရာပ် ကေုာံ ပရေၚ်ဂီုကၠီုညးဍုၚ်ကွာန်တအ်ဂှ်တုဲ ဒှ်မံၚ်ညးဖျေံဒပ်မံၚ်ဒၟံၚ် အပ္ဍဲအရှာံဘာလကျာ် ကွာန်(ပုတိမ်ရိုး) ကရောံဒပ်ကံၚ်ဇြဳပၞာန်တအ်ဂှ်ရောၚ် ဂွံတီကေတ်ရ။
ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် ၇ နာဍဳဂှ် ကောန်ပၞာန်ပျဳတုသေတ် ဒၟံၚ်ကွာန်(ဒေါၚ်းရွာ) ပွိုၚ်ဍုၚ်ၜဳကလေၚ် အာယုက် ၄၉ သၞာံ မၞုံယၟုသဝ်ဘခက်ဂှ် သၟာသေနာတ်ၜါတၠ ကၠုၚ်စိုပ်ပန်ဏာလဝ် ဗ္ဒါဲသ္ၚိညးရ။
ဟိုတ်နူဒးဒုၚ်ပန်လဝ်ကဵုသေနာတ်ဂှ်တုဲ သဝ်ဘခက် ဒှ်ကောန်ဂကောံပျဳတုသေတ်ဂှ်ဝွံ ကလိဂွံဝပ်မကမ် ပ္ဍဲတဲ ကေုာံ ပ္ဍဲသ္ကဲလ္ပာ်ပါဲတုဲ ဒးတိုန်စိုပ်လွဳဒၟံၚ် ပ္ဍဲရုၚ်ဂဥုဲပၞာန်မတ်မလီုရ။
တုဲကၠုၚ်ဂိတုဂျောန် ၁၆ တေံဂှ်လေဝ် ပ္ဍဲကဵုဂၠံၚ်ကွဳပၟတ် လ္ဂုၚ်−မတ်မလီု ကွာန်ကယျေန်လေသုက် ပွိုၚ်ဍုၚ်သဓီုဂှ် ဒပ်ကံၚ်ဇြဳပၞာန် မကေတ်ဒၟံၚ်ဂီုကၠီုဂၠံၚ်ကွဳပၟတ် ဒးဒုၚ်ခတိုဟ်ကဵုမာၚ်တုဲ မွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ