ဘာအၚ်၊ ဂျူလာၚ် ၂၉
တွဵုရးကရေၚ် ဍုၚ်ဘာအၚ်၊ ဍုၚ်ဗြဝတဳတအ်ဂှ် ဍာ်ၜဳသၚ်လောန်ကဵု ဍာ်ၜဳ (သောၚ်ရၚ်း) ၜက်ဒၟံၚ်နူကဵုဗ္ၜတ်ဒးဂွိၚ်ဂှ်တုဲ ညးမမံၚ်တန်တဴဒၟံၚ် ကရပ်ဇိုၚ်ၜဳ၊ ညးမမံၚ်ဒၟံၚ်လ္ပာ်တိသဝ်ဝ်တအ် ပါဲဒလေတ်လ္ပာ်ဒၞါဲဗၠးဘဲဍာ်တအ်အိုတ်ညိဂှ် ဌာနဗြဲကျာကံၚ်ဇြဳပၞာန် ကဵုသမ္တီ လလောၚ်ပ္တိတ်လဝ် ပ္ဍဲဂိတုဂျူလာၚ် ၂၈ တေံရ။
အတိုၚ်ချိၚ်ခယျလဝ် ပ္ဍဲဂိတုဂျူလာၚ် ၂၈ အခိၚ်တ္ၚဲစေၚ် ၂ နာဍဳဂှ်မ္ဂး ဍာ်ၜဳ (သောၚ်ရၚ်း) ဝွံ ၜက်ကၠုၚ်ဒၟံၚ်ဗ္ၜတ်ဍာ်ဒးဂွိၚ် ဍုၚ်ဗြဝတဳဂှ် ၜိုတ်ဘာ်ပေပြၚ်ဂှ်တုဲ မွဲတ္ၚဲပၠန်မ္ဂး ဍာ်ၜဳဏံ တိုန်ကၠုၚ်ၜိုတ် ၂ ပေမာန်တုဲ ဆက်တုဲနွံမံၚ် လ္တူဗ္ၜတ်ဍာ်ဒးဂွိၚ်ဏံမာန်ရောၚ် ဌာနဗြဲကျာ ချိၚ်ခယျလဝ်ရ။
ပ္ဍဲဍုၚ်ဘာအၚ်ဂှ်လေဝ် ဍာ်ၜဳသၚ်လောန် ၜက်အာ ဗ္ၜတ်ဍာ်ဒးဂွိၚ်ဍုၚ်ဂှ် ၜိုတ် ၄ ပေဘာ်ပြၚ်တုဲ မွဲတ္ၚဲပၠန်မ္ဂး တိုန်ကၠုၚ်ၜိုတ် ၁ ပေမာန်တုဲ ဆက်တုဲနွံမံၚ် လ္တူဗ္ၜတ်ဍာ်ဒးဂွိၚ်ဍုၚ်ဂှ်မာန်ရောၚ် ဌာနဗြဲကျာ သ္ဂးလဝ်ရ။
ဟိုတ်ဂှ်ရ အပ္ဍဲပွိုၚ်ဍုၚ်ဘာအၚ်ကဵု ပွိုၚ်ဍုၚ်ဗြဝတဳဂှ် နကဵုညးမမံၚ်တန်တဴဒၟံၚ် ကရပ်ဇိုၚ်ၜဳကဵု လ္ပာ်သ္ကုတ်တိသဝ်တအ် သွက်ဂွံပါဲဒလေတ်မာန်ဂှ် ဌာနဗြဲကျာ လလောၚ်ပ္တိတ်ကဵုလဝ်သတိရ။
ပ္ဍဲဍုၚ်ဘာအၚ်ဂှ် ဟိုတ်နူဍာ်ၜဳသၚ်လောန်တိုန်တုဲ လၟိဟ်မၞိဟ်ဒေသ ၅၀၀၀ ပြၚ်ဂှ် ဂကောံရီုဗၚ်ဟံၚ်ပြာ်မှာဇန်အပ္ဍဲဒေသတအ် ဆုဲပြံၚ်ကဵုလဝ် ပ္ဍဲဗ္ဒိုပ်ဟံၚ်ပြာ်ဘဲဍာ် ၁၀ ဒၞါဲဂှ်ရောၚ် ဂွံတီကေတ်ရ။
ဍာ်ၜဳသၚ်လောန်ဇၞော်ကၠုၚ်ကီု ဗြဲဂၠိုၚ်တုဲ ဍာ်ဒဵုဆၚ်ကၠုၚ်ကီုဂှ်ရ ပ္ဍဲကဵုကွာန် နွံမွဲဒမြိပ်ဇိုၚ်ၜဳတအ်ကဵု အရာပ်လ္တူဍုၚ်ဘာအၚ်သီုဖအိုတ်ဂှ် ဍာ်ဗၠိုက်အာတုဲ အာကၠုၚ်ကျာတ်ဝါတ်ဒၟံၚ်ရောၚ် ညးဒေသဂမၠိုၚ် သ္ဂးအိုတ်ရ။
သ္အာၚ်နူဂှ်ပၠန် ပ္ဍဲကဵုဒၞါဲလ္ၚဵု လ္ပာ်ဂၠံၚ်ကွဳစက် ဘာအၚ်−မတ်မလီုကဵု လ္ပာ်ဂၠံၚ်ဘာအၚ်−သဓီုတအ်ဂှ် ဍာ်ကၠောံမံၚ်တုဲ ဆက်တုဲဒးရီုဗၚ်ကဵုဒၟံၚ် ညးဍုၚ်ကွာန်ဒးဘဲဍာ်တံဂှ်ရောၚ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန်တအ်ရ။
အပ္ဍဲသတ္တာဟဏံ ပ္ဍဲတွဵုရးကရေၚ်ဂှ် ဍာ်ဇၞော်၊ ကျာသ္ကာတ်ပိုက်၊ တိလာ်၊ ဍာ်ဒဵုစှ်ေ ဟိုတ်နူဟိုတ်တအ်ဏံတုဲ ညးဒေသမွဲတၠ ဍာ်ဗၠိုက်ချိုတ်အာတုဲ ဟိုတ်နူတၞံဆုဒေါမ်တုဲ ညးဗြဴမွဲတၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်ဍာ်ဗၠိုက်တအ်ကီု ပရေၚ်ဇီုကပိုက်လီုလာ်တအ်ကီု နွံကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုမ်−CJ