မတ်မလီု၊ ဂျူလာၚ် ၂၉
ပ္ဍဲတွဵုရးဍုၚ်မန် ၜိုန်ဒးမံၚ်ဘဲသဘာဝ ဍာ်ဇၞော် ကျာသ္ကာတ်ပိုက်တအ်ဂှ်ကီုလေဝ် လ္ပာ်ကံၚ်ဇြဳပၞာန် ဆက်တုဲပကောံကၠုၚ်ဒၟံၚ်ကောန်ပၞာန် သွက်တန်ဗ္တောန်ကွတ်ပၞာန် လၟေၚ် ၁၆ တံဂှ်ရောၚ် ညးမစုက်လုက်ကဵုကံၚ်ဇြဳပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ပလေဝ်ပလေတ်လဝ် သွက်ဂွံပံက်အာတန်ဗ္တောန်ကွတ်ပၞာန် လၟေၚ် ၁၆ ပ္ဍဲဂိတုအဝ်ဂါတ် သတ္တာဟဒုတိယဏံဂှ်တုဲ သွက်ဂွံပံက်တန်ဗ္တောန်ကွတ်ပၞာန်မာန်ဂှ် ဆက်တုဲပကောံကၠုၚ်ဒၟံၚ်ကောန်ပၞာန်ရ။
ပ္ဍဲတွဵုရးဍုၚ်မန် ပွိုၚ်ဍုၚ်ဗွဲမဂၠိုၚ် ကံၚ်ဇြဳပၞာန်တအ် မပကောံဒၟံၚ်ကောန်ပၞာန်တအ်ဂှ်တှ်ေ ပပ္တံနူဂိတုဂျူလာၚ် ၂၃ တုဲကၠုၚ်တေံတုဲ ဟိုတ်နူလဗိုတ်ကျာဝဳဖာတုဲ လၟိဟ်မၞိဟ်ဂၠိုၚ်ကဵုဠက် ဒးမံၚ်ဘဲသဘာဝတုဲ ပရေၚ်ဇီုကပိုက်ချိုတ်တအ်လေဝ် နွံဒၟံၚ်ရ။
သၟတ်ဒေသတွဵုရးဍုၚ်မန်မွဲတၠဂှ်တှ်ေ အခိၚ်ဘဲသဘာဝဒှ်ဒၟံၚ်ဗီုဏံဂှ် ပကောံဒၟံၚ်ကောန်ပၞာန်တုဲ နကဵုသၟတ်ဂမၠိုၚ် ဂွံဘိုၚ်ရီုဗၚ်ကဵုရဂှ် ဒးဖေက်ဒၟံၚ်တုဲ အခိၚ်ဘဲသဘာဝဒှ်ဒၟံၚ်သာ်ဏံ ရပ်ဒက်ညးသၟတ်တအ်ဂှ် ဒှ်ဟွံထေက်ရောၚ် ဟီုကၠုၚ်လဝ်ရ။
“အခိၚ်ဘဲသဘာဝဒှ်မံၚ်ဏံဂှ်တှ်ေ ဟွံပြေပြံၚ်ပုဟ်လေဝ်။ ပိုယ်တအ်တှ်ေ သာပရေံရ။ ဒှ်ဒၟံၚ်သီုကဵုသၟတ်ပၠန်။ တုဲပၠန် အခိၚ်ဒးဘိုၚ်ရီုဗၚ်ဒၟံၚ်ဂှ် ဂွံအာဂွံကၠုၚ်ဂှ် ဒးဖေက်မံၚ်ရ။ မၞိဟ်ဍောတ်တ်တအ် ဂွံရီုဗၚ်ကဵုဂှ် ယအ်အာရ။ ဒှ်မာန်တှ်ေ အခိၚ်ဘဲသဘာဝဒှ်ဒၟံၚ်သာ်ဏံ ပရေၚ်ရပ်ဒက်တအ် မုတအ် ဟွံကၠောန်မ္ဂး ခိုဟ်ရ။ ဟိုတ်နူပရေၚ်ယိုက်လျိုၚ်ပၞာန်ဏံတုဲ သၟတ်တိတ်အာဍုၚ်သ္အာၚ် ဂၠိုၚ်ကွေံကွေံရ” သာ်ဝွံ သ္ဂးရ။
အခိၚ်ဒှ်ဒၟံၚ်ဘဲသဘာဝသာ်ဏံဂှ် ပကောံဒၟံၚ်ကောန်ဒပ်တၟိတအ်ဂှ်တုဲ နကဵုသၟတ်ဂမၠိုၚ် ဟွံဂံၚ်ရီုဗၚ်ဟံၚ်ပြာ် က္တိုၚ်ၚ်ကၟဟ်ဟ် ဗီုကၠာတေံရတုဲ ဟိုတ်နူသၟတ်ဟွံမွဲတုဲ ပ္ဍဲအရာခၠေဝ်ပလန်ဘဲသဘာဝဂှ်လေဝ် ယအ်စှ်ေကၠုၚ်တီတီရောၚ် ညးဆက်ဟီုရ။
ညးဍုၚ်ကွာန်အပ္ဍဲဒေသတအ် အခိၚ်ဒးမံၚ်ဘဲသဘာဝဂှ် သွက်တန်ဗ္တောန်ကွတ်ပၞာန်ဂးတုဲ ကံၚ်ဇြဳပၞာန် ရပ်ကၠုၚ်ဒၟံၚ်သၟတ်တအ် အခိၚ်ဗ္တံကီု၊ မၞိဟ်ဍိုက်ဒးကွဳလာၚ်ဇြေန်ဟွံမွဲတအ်ဂှ် ရပ်ဒက်ပကောံကၠုၚ်ဒၟံၚ်ကီု၊ ဂွံကော်ဘိက်သွက်ဂွံလုပ်ပၞာန်ဂှ်လေဝ် ပလေဝ်ပလေတ်ဒၟံၚ် နွံရ။
ပ္ဍဲတွဵုရးဍုၚ်မန် ကံၚ်ဇြဳပၞာန် မပကောံဒၟံၚ်ကောန်ဒပ် သွက်တန်ဗ္တောန်ကွတ်ပၞာန်ဂှ် ဟိုတ်နူဍာ်ဇၞော် ကျာသ္ကာတ်ပိုက်တုဲ မၞိဟ်မွဲတၠ ချိုတ်တုဲ ဟွံအောန်နူ ၁၄ တၠ ဇီုကပိုက်ကလိဂွံလဝ်ဝပ်တုဲ သ္ၚိဟွံအောန်နူ ၅၀၀ ဒးဆောံလေၚ်လီုလာ်လဝ်နွံရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် ပ္ဍဲကဵုတန်ဗ္တောန်ကွတ်ပၞာန် ကံၚ်ဇြဳပၞာန်တအ် ပံက်ကၠုၚ်လဝ် နူလၟေၚ် ၁ စဵုကဵုလၟေၚ် ၁၅ ဂှ် သၟတ်ဟွံအောန်နူ ၂၅၀၀ တၠ ဒးဒုၚ်ပကောံကၠုၚ်မံၚ် နဒဒှ်ကောန်ဒပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ