ဘာအၚ်၊ ဂျူလာၚ် ၃၀
ဟိုတ်နူဍာ်ဇၞ်ေ ဒှ်ဒၟံၚ်ပ္ဍဲတွဵုရးကရေၚ်ဂှ်တုဲ ညးဍုၚ်ကွာန်ဒးဘဲဍာ်ဂမၠိုၚ် ဒးဆုဲပြံၚ်မံၚ်ဒၟံၚ် ပ္ဍဲဗ္ဒိုပ်ဟံၚ်ပြာ်ဘဲဍာ် ဗ္ဒါဲ ၂၀၀၀၀ နွံတုဲ နွံပၟိက်ဒၟံၚ်ကဵု အရီုဗၚ်ဍာ်သုၚ်၊ ဇွောံမစၞစတအ်ဂှ်ရောၚ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန် ဖျေံသ္ဇိုၚ်ဒေသတအ်ရ။
ပ္ဍဲဂိတုဂျူလာၚ် ၂၉ ဂှ် ဍာ်ၜဳ(သောၚ်ရၚ်း) ထပ်လုပ်စိုပ်ကၠုၚ် ပ္ဍဲဍုၚ်ဗြဝတဳ အရာပ်တိသဝ်ဝ်တအ်ဂှ်တုဲ ညးဍုၚ်ကွာန်ဒးဘဲဍာ်ဂမၠိုၚ် ထပ်တုဲဒးဆုဲပြံၚ်မံၚ်ဒၟံၚ် ပ္ဍဲဗ္ဒိုပ်ဟံၚ်ပြာ်ဘဲဍာ်တအ်ဂှ်ရောၚ် ညးဒေသဗြဝတဳမွဲတၠ ဟီုရ။
အတိုၚ်တၚ်လလောၚ်တြး ဌာနဗြဲကျာကံၚ်ဇြဳပၞာန်ဂှ်မ္ဂး ဍာ်ၜဳ(သောၚ်ရၚ်း) စိုပ်ကၠုၚ် လ္တူဗ္ၜတ်ဍာ်ဒးဂွိၚ်ဂှ် ၄ ပေပြၚ်တုဲ ဂွံမွဲတ္ၚဲတုဲဂှ် သၠုၚ်တိုန်ကၠုၚ် ၜိုတ် ၁ ပေပြၚ်ဂှ်ရ နကဵုညးမံၚ်စံၚ်ဒၟံၚ် ဗ္ဒါဲဇိုၚ်ၜဳ၊ ညးမမံၚ်ဒၟံၚ်ဒၞါဲတိသဝ်ဝ်တအ် သွက်ဂွံဆုဲပြံၚ်အာ ဒၞါဲဗၠးဘဲဍာ်တအ်မာန်ဂှ် ကဵုလဝ်သမ္တီရ။
လ္တူဍုၚ်လှာဒကှ်ဂှ်တှ်ေ ဟိုတ်နူဗြဲဇၞော်ဂူ သီုကဵုဍာ်ဒဵုစှ်ေကၠုၚ်ဂှ်တုဲ ဍာ်ၜဳဇမိတိုန်ကၠုၚ်တုဲ သ္ၚိနွံလ္ပာ်တိသဝ်ဝ်ဂမၠိုၚ် ဍာ်လုပ်လဝ်ဂှ်ရ ညးဍုၚ်ကွာန်ဒးဘဲဍာ် ၃၀၁ တၠဂှ် ဖျေံလဝ်ကဵုဒၞါဲ ပ္ဍဲဗ္ဒိုပ်ပါဲဘဲဍာ်ယာယဳရောၚ် တမ်ရိုဟ်ပရိုၚ်ဒေသမွဲတၠ သ္ဂးရ။
လ္တူဍုၚ်ဘာအၚ်ဂှ်လေဝ် ပ္ဍဲဂိတုဂျူလာၚ် ၂၅ တေံ ဍာ်ၜဳသၚ်လောန်တိုန်လဝ်တုဲ စဵုကဵုဂိတုဂျူလာၚ် ၂၉ ဂှ် ဍာ်ဟွံစှ်ေဏီဂှ်ရ အရာပ်တအ်ဏံသီုဖအိုတ် ဍာ်ဗၠိုက်အာလဝ်တုဲ ညးဍုၚ်ကွာန်ဒးဘဲဍာ် ဒးဆုဲပြံၚ်မံၚ်ဒၟံၚ် ပ္ဍဲဗ္ဒိုပ်ပါဲဘဲဍာ်ယာယဳ ၜိုတ် ၁၀၀၀၀ ပြၚ် နွံဒၟံၚ်ရောၚ် ဂွံတီကေတ် နူကဵုဂကောံရီုဗၚ်ပရေၚ်မၞိဟ်ရ။
လ္တူဍုၚ်ဘာအၚ် ဟိုတ်နူဍာ်ဇၞော်တုဲ ပ္ဍဲကဵုဂၠံၚ်ဘာအၚ်−မတ်မလီု၊ ဂၠံၚ်ဘာအၚ်−သဓီု၊ ဂၠံၚ်ဘာအၚ်−မျာၚ်ကျဳၚူ ကေုာံ ဂၠံၚ်ဘာအၚ်−လိုၚ်ဗၠဲတအ်ဂှ် ဍာ်ကၠောံဒၟံၚ်တုဲ နကဵုကွဳစက်ဍောတ်တ်ဂမၠိုၚ် လ္ပတတ်ကၠောံအာကၠုၚ်အိုတ်ဂှ် ဂကောံရီုဗၚ်ပရေၚ်မၞိဟ်ဂမၠိုၚ် ကဵုလဝ်သမ္တီရ။
ပ္ဍဲဍုၚ်ဘာအၚ်ဂှ် ဍာ်ၜဳသၚ်လောန် စိုပ်မံၚ်လ္တူဗ္ၜတ်ဍာ်ဒးဂွိၚ် ၅ ပေပြၚ်တုဲ ဂွံမွဲတ္ၚဲဂှ် စှ်ေလဝ်ၜိုတ်ဘာ်ပေမာန်ကီုလေဝ် ဆက်နွံမံၚ်လ္တူဗ္ၜတ်ဍာ်ဒးဂွိၚ်ဍုၚ်ဏံမာန်ဂှ် ဌာနဗြဲကျာ ချိၚ်ခယျလဝ်ရ။
သ္အာၚ်နူဂှ်ပၠန် ပ္ဍဲဍုၚ်လိုၚ်ဗၠဲကဵု ဍုၚ်ကမမံၚ်ဂှ်လေဝ် ညးဍုၚ်ကွာန်ဒးဘဲဍာ် ဟိုတ်နူဍာ်ဇၞော်ဂှ်ဝွံ ဒးဆုဲပြံၚ်မံၚ်ဒၟံၚ် ပ္ဍဲဗ္ဒိုပ်ပါဲဘဲဍာ်ယာယဳတံဂှ်တုဲ နွံပၟိက်ဒၟံၚ်ကဵု အရီုဗၚ်စၞစသုၚ် ဍာ်သုၚ်တံဂှ်ရောၚ် ဂွံတီကေတ် နူကဵုညးဒေသတအ်ရ။
ပ္ဍဲတွဵုရးကရၚ်ဂှ် အပ္ဍဲကာလဍာ်ဇၞော်ဏံ ညးဍုၚ်ကွာန်ဒးဘဲပၞာန်မွဲတၠ ဍာ်ဗၠိုက်ချိုတ်အာတုဲ ဟိုတ်နူတၞံဆုဒေါမ်တုဲ ညးဒေသမွဲတၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်ဗွဲမဂၠိုၚ်ဂၠေၚ်လေဝ် ဍာ်ဗၠိုက်အာလဝ်တုဲ ဟိုတ်နူကျာသ္ကာတ်ပိုက်တုဲ သ္ၚိလ္ၚဵု ဇီုကပိုက်လီုလာ်အာနွံရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ