ပဠဝ်၊ ဂျူလာၚ် ၃၀
အပ္ဍဲပေါဲဗ္တိုက်ၜါလ္ပာ် ဒှ်ဒၟံၚ်ပ္ဍဲပွိုၚ်ဍုၚ်ပဠဝ် ရးတၞၚ်သဳဂှ် ညးဒေသ၊ ညးအာတရဴ အာကၠုၚ်ဟွံဂွံဒှ်ဒၟံၚ်ဂှ် လ္ပာ်ကံၚ်ဇြဳပၞာန် ဟွံကဵုအခေါၚ်တိတ်တုဲ ကၟာတ်လဒဵုလဝ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုဂျူလာၚ် ၂၄ တုဲ ပ္ဍဲကဵုကွာန် ဗ္ဒါဲဂၠံၚ်ဇၞော်ပျဳထံၚ်သု ပွိုၚ်ဍုၚ်ပဠဝ်ကဵု ပွဳပွူဗ္ဒါဲဍုၚ်ပလဂှ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတအ်ဂှ် ပေါဲဗ္တိုက်ဒှ်ဒၟံၚ် ဗွဲမသ္ကာတ်မြဟ်ရ။
ဟိုတ်နူပေါဲဗ္တိုက်တုဲ သီုၜါလ္ပာ် ကၟာတ်လဝ်အခေါၚ်တတ်ကၠောံအာကၠုၚ် လ္ပာ်ဂၠံၚ်ပျဳထံၚ်သု ပွိုၚ်ဍုၚ်ပဠဝ်ဂှ်တုဲ ယာန်ကွဳစက်ဖ္ဍိုက်ဗၞိက်ကီု ယာန်ညးအာတရဴကီု ဂၠိုၚ်ကဵုကၠံ အာကၠုၚ်ဟွံဂွံ ဒှ်ဒၟံၚ်ရ။
ညးဒေသ ကေုာံ ညးဍုၚ်ကွာန်အာတရဴ နွံဒၟံၚ်အပ္ဍဲဒေသပေါဲဗ္တိုက်ဒှ်တအ်ဂှ်ဝွံ နူဍုၚ်ပဠဝ် ဂွံအာကၠုၚ်ဍုၚ်ဗိက် နကဵုဂၠုၚ်စက်ဂှ် လ္ပာ်ကံၚ်ဇြဳပၞာန် ဟွံကဵုတၠဂၠုၚ်ဂမၠိုၚ် အာကၠုၚ်ဂှ်တုဲ ဂွံအာကၠုၚ်တရဴဂှ် ဒှ်ဒၟံၚ်အခက်အခုဲအိုတ်ရ။
အခိၚ်လၟုဟ်ဂှ်တှ်ေ နူကဵုကံၚ်ဇြဳပၞာန် ကေုာံ ဂကောံနာနာနူကဵုဌာနမဆေၚ်စပ်မၠိုၚ် တာဒၞါလဝ် နူသၞေဟ်ပဠဝ် ဖ္ဍိုက်ညးအာတရဴတုဲ အာကၠုၚ်ဟွံဂွံဂှ်ရ သွက်ညးအာတရဴဂမၠိုၚ် ဂွံအာကၠုၚ်ဂှ် ဒှ်ဒၟံၚ်အခက်အခုဲရ။
ဆ္ဂး ညးအာတရဴလ္ၚဵုတအ်ဂှ်တှ်ေ ကၠတ်အာကၠုၚ်ဒၟံၚ် နကဵုဂၠုၚ်တမ္ၚာ၊ ဂၠုၚ်ဗၞိက် နူလ္ပာ်ကွာန်တအ်ဂှ်တုဲ နူဍုၚ်ပဠဝ် မၞိဟ်အာဍုၚ်ဗိက် မွဲတၠမ္ဂး ဒးကဵုဒၟံၚ်လှုဲ မွဲကိုဋ်ဒ္ကေဝ်ပြၚ်ရောၚ် သ္ဂးရ။
တုဲကၠုၚ်ဂိတုဂျူလာၚ် ၂၅ တေံဂှ်လေဝ် ညးအာတရဴ သှ်ေၜက်ဒၟံၚ် အပ္ဍဲပေါဲဗ္တိုက်ပဠဝ်တအ်ဂှ်ဝွံ ဟိုတ်နူလွဟ်ဇၞော်ဒပ်ကံၚ်ဇြဳပၞာန်ကီု သီုကဵုဗ္တိုက်ထောံကၠုၚ်မခတိုဟ် နကဵုဒရုၚ်တံဂှ်တုဲ ၁၀ တၠ ချိုတ်တုဲ ၅ တၠ ဇီုကပိုက်ကလိဂွံလဝ်ဝပ်ရ။
ပေါဲဗ္တိုက်ပဠဝ်ဝွံ ဆက်ဒှ်ဒၟံၚ် စဵုကဵုဂိတုဂျူလာၚ် ၂၉ ဂှ်တုဲ အကာဲအရာၜါလ္ပာ် ဇီုကပိုက်ချိုတ်ဂျိုၚ်ဂှ်တှ်ေ ဟွံဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media