ၜဳကလေၚ်၊ ဂျူလာၚ် ၃၀
ပ္ဍဲတွဵုရးဍုၚ်မန် ဟိုတ်နူဗြဲဇၞော်ဂူ သီုကဵုဍာ်ၜဳတိုန်ကၠုၚ်ဂှ်တုဲ ပ္ဍဲဒေသဍာ်ဇၞော်ဒၟံၚ်ဂမၠိုၚ် နွံပၟိက်ဒၟံၚ်ကဵု အရီုဗၚ်ဍာ်သုၚ်၊ ဇွောံမစၞစ ကေုာံ ဂဥုဲဇဗတံရောၚ် ဂကောံရီုဗၚ်ပရေၚ်မၞိဟ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပြဟ်ဟ်ဏံ ပ္ဍဲတွဵုရးဍုၚ်မန် ပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီုဂှ် ဍာ်ဇၞော်ဒၟံၚ်တုဲ ပ္ဍဲကဵုဏံ ပွိုၚ်ဍုၚ်ၜဳကလေၚ်ဝွံ ဒးဒုၚ်ဒၟံၚ်ဘဲဍာ်ဇၞော် ဇၞော်ကဵုဇြဟတ်ရ။
ဟိုတ်နူဍာ်ဇၞော်တုဲ ပ္ဍဲပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီုဂှ် ဒးပံက်လဝ်ဗ္ဒိုပ်ဟံၚ်ပြာ်ယာယဳ ၃၂ တုဲ လၟိဟ်မၞိဟ် ၃၀၀၀၀ ပြၚ် ဒးမံၚ်ဘဲဍာ်ရ။
ညးဍုၚ်ကွာန်ဒေသ ဒးဘဲဍာ်ဂမၠိုၚ်ဝွံ ဒးဇူဒီုဒၟံၚ် ပ္ဍဲဘာလကျာ်၊ ဇြပ်သ္ဘၚ်ဓဝ်၊ ဘာဗ္တောန်လိက် နွံကြပ်တအ်ဂှ်ကီု သီုကဵုဒးမံၚ်ဒၟံၚ် ပ္ဍဲဒၞါဲဗၠးဘဲဍာ်တံဂှ်တုဲ သွက်ဂွံစသုၚ်ဂှ်တှ်ေ တၠဒါန်ဂမၠိုၚ် ဒးရီုဗၚ်ရေၚ်တၠုၚ်ကဵုဒၟံၚ်ရ။
ညးတာလျိုၚ် ဂကောံရီုဗၚ်ဟံၚ်ပြာ်ပရေၚ်မၞိဟ် နူပွိုၚ်ဍုၚ်ၜဳကလေၚ် မွဲတၠဂှ်တှ်ေ ကံၚ်ဇြဳပၞာန်တအ် ထံက်ပၚ်ကဵုဒၟံၚ် သွက်ညးဍုၚ်ကွာန်ဒးဘဲဍာ်တအ်ဂှ် ဟွံရုမ်ဂပ်တုဲ အခိၚ်လၟုဟ် နွံပၟိက်ဒၟံၚ်ကဵု ဍာ်သုၚ်၊ သ္ၚု၊ စၞစဟဂှ်တအ်ဂှ်ဏောၚ် ဟီုရ။
“နွံပၟိက်ဂှ်တှ်ေ ဍာ်သုၚ်တအ် စစၞဟကှ်တအ် သ္ၚုတအ်ရ။ ကံၚ်ဇြဳပၞာန်ဂှ် ကဵုမံၚ်ကီု ဆ္ဂး ဂွံမံၚ်ၜိုတ်သ္ၚုမွဲကလတ်ရဏောၚ်။ ရဲသ္ၚိမၞိဟ်ဂၠိုၚ်တအ်ဂှ်တှ်ေ ဟွံပြေပြံၚ်ပုဟ်။ မွဲကလတ်ဟီုဂှ် ကဵုအရိုဟ်တ္ၚဲဟွံသေၚ်၊ ခြာတုဲကဵုမံၚ်ဏောၚ်။ ပရအ်သ္ၚု ပရအ်ကၠေၚ်ဟီုဂှ်လေဝ် နူကဵုဂကောံရီုဗၚ်ပရေၚ်မၞိဟ်တအ်ရဏောၚ် ကၠောန်ဒၟံၚ်။ ဂကောံအလဵုအသဳမ္ၚးဂှ် ဟွံမွဲရပုဟ်။ ဇကုဇကုဒးကၠောန်ကေတ်ဒၟံၚ်တုဲ ဟွံလောဲပုဟ်” သာ်ဝွံ သ္ဂးရ။
အခိၚ်လၟုဟ် ဍာ်ၜဳ ၜဳကလေၚ် ဆက်လုပ်ဒၟံၚ်တုဲ ပ္ဍဲဒၞါဲလ္ၚဵုတအ်ဂှ်တှ်ေ အကြာအာကၠုၚ်ဝါတ်ဂါတ်ဒၟံၚ်ဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ် ဒးရီုဗၚ်ကဵုဒၟံၚ် ညးဒေသတအ်တုဲ ကံၚ်ဇြဳပၞာန်ဂှ်တှ်ေ ထ္ၜးဟိုတ်ကဵုပရေၚ်ဂီုကၠီုတုဲ ရီုဗၚ်ဟံၚ်ပြာ်ကဵုဟွံမွဲရောၚ် ညးဆက်ဟီုရ။
ညးတာလျိုၚ် ဂကောံရီုဗၚ်ဟံၚ်ပြာ်ပရေၚ်မၞိဟ်မွဲတၠ နူပွိုၚ်ဍုၚ်သဓီုဂှ်လေဝ် သွက်ညးဍုၚ်ကွာန်ဒးဘဲဍာ်တအ်ဂှ် မ္ၚးနူကဵုဍာ်သုၚ်၊ ဇွောံမစၞစဂှ် ဒှ်ဒၟံၚ်ဂၞဴအာဂၞဴလီု မွဲဏှမွဲဏှတုဲ နွံပၟိက်ဒၟံၚ် စနူကဵုဂဥုဲဇဗတံရောၚ် ဟီုရ။
“ပြဟ်ဟ်ဏံ နွံပၟိက်ဂှ်တှ်ေ ဍာ်သုၚ်၊ ဇွောံမစၞစ၊ စၞစဟကှ်တအ်ဂှ်တှ်ေ အဓိကရ။ တုဲတှ်ေ ဒးကေတ်ဂဥုဲဇဗဏောၚ်။ မူဟိုတ်ရောဟီုတှ်ေ အခိၚ်လၟုဟ် ယဲဂၞဴအာဂၞဴလီုတအ်ဂှ်လေဝ် ဒှ်ဒၟံၚ်မွဲဏှမွဲဏှ။ ညးတၞဟ် ကၠုၚ်ပရအ်ကဵုပုၚ်ဂွဳတအ်ကီု။ ပုၚ်ဂွဳဟီုဂှ်တှ်ေ ဂွံမွဲဗ္ဂါပ်ရဏောၚ်။ စၞဟကှ်ဟီုတှ်ေ စွံလဝ်ဂွံမံၚ်။ ဒးကေတ်ဗီုတံဏံ အဓိကရ” သာ်ဝွံ ဟီုရ။
ဂကောံအုပ်ဓုပ်ကွာန်အရာပ် သၟဝ်တဲကံၚ်ဇြဳပၞာန်တအ် ၜိုန်ဖျေံလဝ်ကဵုဒၞါဲ သွက်ညးဍုၚ်ကွာန်ဒးဘဲပၞာန်တအ်ဂှ်ကီုလေဝ် ဍာ်သုၚ်ကဵု ဇွောံမစၞစတအ်ဂှ်တှ်ေ ဒးပတှ်ေဒၟံၚ်တၠဒါန်တအ်သၟးဂှ်ရ ယဝ်လအ်ကၠုၚ်မ္ဂး ဒှ်ကၠုၚ်အခက်အခုဲမာန်ရောၚ် ညးဆက်ဟီုရ။
အတိုၚ်အကာဲအရာလၟုဟ်မ္ဂး ဟိုတ်နူဗြဲဂူဆက်ဒၟံၚ်တုဲ ဍာ်ထပ်တိုန်ကၠုၚ်မာန်တုဲ လၟိဟ်ညးဍုၚ်ကွာန်ဒးဘဲဍာ် ဂၠိုၚ်ကၠုၚ်မာန်ဂှ်ရ သွက်ညးတအ်ဂှ် နွံပၟိက်ဒၟံၚ်ကဵုဍာ်သုၚ် သီုကဵုဇွောံမစၞစ ကာတၟေၚ်မာန်ရောၚ် ဂွံတီကေတ်ရ။
ဍာ်ထပ်တိုန်ကၠုၚ်မာန်ဂှ်ရ နကဵုညးမမံၚ်စံၚ် ဗ္ဒါဲၜဳကြုၚ်ဂမၠိုၚ် စွံသတိတုဲ မံၚ်စံၚ်အိုတ်ဂှ်ကီု၊ ယဝ်ဍာ်တိုန်ကၠုၚ်မ္ဂး ညံၚ်ဘဲအန္တရာယ်ဟွံဂွံမွဲ သွက်ဂွံဒစးဒုၚ်ပလေဝ်ပလေတ်လဝ်ဂှ်လေဝ် ဂကောံရီုဗၚ်ဟံၚ်ပြာ်ပရေၚ်မၞိဟ်ဂမၠိုၚ် ဖတိုက်ဖအောဝ်လဝ်ရ။
တုဲကၠုၚ်ဟွံလအ်ဂှ်လေဝ် ပ္ဍဲတွဵုရးဍုၚ်မန် ပွိုၚ်ဍုၚ် ၆ ဂှ် ဟိုတ်နူကျာမေလံၚ် သီုကဵုကျာသ္ကာတ်ပိုက်ဂှ်တုဲ သ္ၚိ ၅၀၀ ပြၚ် လီုအာလဝ်တုဲ မၞိဟ်မွဲတၠ ချိုတ်တုဲ ဟွံအောန်နူ ၁၄ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Naing Zaw Bo Fb