နေဗျဳဒဝ်၊ ဂျူလာၚ် ၃၀
ကံၚ်ဇြဳပၞာန် ဝေၚ်ပၞာန်တုဲ ကလေၚ်ဂွံလဝ်တိဍာ်ဂကောံဇြဟတ်ပၠန်ဂတးတအ် မထိၚ်ဒက်ဂွံလဝ်ဂှ် ပ္ဍဲဂိတုဂျူလာၚ် ၂၈ တေံ သ္ပဒတန်ကၠုၚ် သၞောဝ်စဵုဒၞါတၚ်နၚ်ပၞုက်မဆေၚ်စပ်ကဵုသွာၚ်ပၞာန် ကဵုဒုဟ်ဒဏ် စဵုကဵုဒဏ်ဂစိုတ်မာန်ဂှ်ရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ဗိုလ်ဇၞော် မေန်အံၚ်လှာၚ် ဥက္ကဌကံၚ်ဇြဳပၞာန်ဂှ်တှ်ေ သ္ပဒတန်လဝ် သၞောဝ်ဏံ အတိုၚ်ၝောံပိုဒ် ၄၁၉ သၞောဝ်သ္ဇိုၚ်ကၟိန်ဍုၚ်ရ။
ပူဂဵုလဵုမွဲဟွံဟီု ဗွဲမဗဗွဲကဵုသၞောဝ် ဟွံဂွံအခေါၚ် နူကဵုညးလျိုၚ်တအ်ဂှ်မွဲသာ် ယဝ်လှဲပြံၚ်ကဵုဒး တၚ်နၚ်ပၞုက်မဆေၚ်စပ်ကဵုသွာၚ်ပၞာန်တအ်ဂှ်ရောၚ် ဒုဟ်ဒဏ်ပြာကတ်မ္ဂး ဒဏ်ထံၚ်မွဲအာယုက်ကဵုဒှ် ဒဏ်ဂစိုတ်ကဵုဒှ် မွဲမွဲသာ် ဒးဒုၚ်ဏောၚ်ဂှ် ထ္မံက်ထ္ၜးလဝ် ပ္ဍဲၝောံပိုဒ် ၁၆ ရ။
မဟာဗျူဟာ နဲဗျူဟာ မဆေၚ်စပ်ကဵုသွာၚ်ပၞာန်၊ ကိစ္စမဆေၚ်စပ်ကဵုပရေၚ်ပ္ကတ်ပ္ကေၚ်သွာၚ်ပၞာန်၊ နဲကွတ်ပညာ ကေုာံ နဲကဲ မဆေၚ်စပ်ကဵုကပေါတ်အရပ်စပ်ပၞာန် စက်ယန်ပၞာန် မကမ်လွဟ်လက်နက်ပၞာန်တ်အ်ဂှ် စုတ်လဝ် ပ္ဍဲသၞောဝ်ဏံ နဒဒှ်တၚ်နၚ်ပၞုက်မဆေၚ်စပ်ကဵုသွာၚ်ပၞာန်ရ။
သ္အာၚ်နူဂှ်ပၠန် ကွတ်ပညာရပ်စပ် က္ၜၚ်ပၞာန်၊ က္ၜၚ်ကျာ၊ စက်ယာန်တၞဟ်ဟ်တအ်ကီု တၚ်နၚ်ဂမၠိုၚ် နဲကွတ်ပညာ လၟေၚ်ကမၠောန် မဆေၚ်စပ်ကဵုသွာၚ်ပၞာန်တအ် ကေုာံ ကိစ္စမလလောၚ်ပ္တိတ်စၟတ်ကေတ်လဝ် နဒဒှ်တၚ်နၚ်ပၞုက်တအ်လေဝ် ပါလုပ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ သ္ကိုပ်ဗိုလ်ပၞာန်ဒေါအ်ဇူဂမၠိုၚ် ညံၚ်ကေတ်တၚ်နၚ်အပ္ဍဲဒပ်ဟွံဂွံဂှ်ကီု၊ စပ်ကဵုသွာၚ်ပၞာန်တုဲ ညံၚ်ရဴပ္တန်ကၠေံစၚ်တၞဟ်ခြာမွဲဟွံဂွံဂှ် ဒှ်သၞောဝ်ကရေပ်ဓရတ်လဝ်ရောၚ် သ္ၚဳဂၠိပ်လဝ်ရ။
“သ္ကိုပ်ဗိုလ်ပၞာန် တိတ်ကၠုၚ်နူဒပ်ပၞာန်တအ် ညံၚ်ကေတ်ပရိုၚ်ဟွံဂွံဂှ် စဵုဒၞါလဝ်ရ။ တုဲပၠန် ဆေၚ်စပ်ကဵုပရေၚ်ဂီုကၠီုတုဲ နူကဵုသ္ကိုပ်ဗိုလ်ပၞာန်တအ်ဏံ ရဲတိတ်နူပၞာန် ရဲတိတ်နူဒပ် ရဲတိတ်နူဗၠာဲသၟိၚ်တအ် ညံၚ်ကလေၚ်တဝ်စၞေဟ်ကၠုၚ်ညးတအ်( ဒပ်ပၞာန်) ဟွံဂွံဂှ် ကၠောန်လဝ်ရ။ တုဲပၠန် နိဿဲကေတ်တၚ်နၚ်နူအပ္ဍဲဒပ်ပၞာန်တအ်ဂှ်တုဲ ထ္မံက်ထ္ၜးဒၟံၚ်ဂှ်န်ွံ။ ဌာန်ပရိုၚ်ကၠောန်ဒၟံၚ် ကဵုဝါပ်သာ်တအ်ဂှ်လေဝ်နွံ။ ပရူတံဏံဂှ်လေဝ် ဟီုဟွံဂွံပုဟ်။ ပထောံလဝ် သၞောဝ်တၚ်နၚ်ပၞုက်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ပွမထိၚ်ဒဝ် တၚ်နၚ်ပၞုက်စပ်ကဵုပရေၚ်ပၞာန်ဂှ်ဝွံ ရန်တၟအ် ညံၚ်ဂွံဒှ်အထံက်အပၚ် သွက်ပရေၚ်ဂီုကၠီုကောန်ဂကူဏောၚ် ထ္မံက်ထ္ၜးလဝ် ပ္ဍဲသၞောဝ်ဂှ် ဂွံဆဵုကေတ်ရ။
ညးမတၞီလုပ် အတိုၚ်သၞောဝ်ဂှ်မ္ဂ: ညးမ္ဒးဒ္ဂေတ်ဗက်သၞောဝ်ဥပဒေဒပ်ပၞာန်ဂှ်တှ်ေ ညးမလုပ်ၜိုတ်ဒၟံၚ် ပ္ဍဲကဵုဌာနဝန်ဇၞော်ကာစဵုဒၞါတအ် အခိၚ်ပေၚ်ၚ်ကဵုဒှ် သ္ကုတ်အခိၚ်ကဵုဒှ် ကေုာံ ကောန်ဒပ်ဗၠာဲသၟိၚ် ကောန်ဒပ်ပၞာန်ညးဍုၚ်ကွာန် သ္ဇိုၚ်ဝန်ကာစဵုဒၞါတြေံတအ်လေဝ် ပါလုပ်ရ။
သ္ဇိုၚ်ဝန်ကာစဵုဒၞါ ဟွံသေၚ်မ္ဂး သ္ဇိုၚ်ဝန်ကာစဵုဒၞါတြေံတအ်ဝွံ ပ္ဍဲကဵုအလဵုအသဳဍုၚ်တၞဟ်ဟ်ကီု သီုကဵုပ္ဍဲဂကောံမဆေၚ်စပ်ကဵုပရေၚ်ပၞာန်တအ်ဂှ်ကီု လုပ်ကေတ်လျိုၚ်ဟွံဂွံတုဲ ပ္ဍဲကဵုကမၠောန်ပရေၚ်ဒုၚ်ကာပရေၚ်ဂီုကၠီုပူဂဵု ကေုာံ ပ္ဍဲဂကောံရပ်လွဟ်ဗွဲမလုပ်သၞောဝ်ဟွံသေၚ်တအ်ဂှ်လေဝ် လုပ်ကၠောန်ၜိုတ်ဟွံဂွံရောၚ် စၞောန်ပျးလဝ်ရ။
တၚ်ရန်တၟံဂှ်တှ်ေ သွက်ဂွံစဵုဒၞါ ပွမလုပ်ကၠောန်ၜိုတ် ပ္ဍဲကဵုအလဵုအသဳဍုၚ်တၞဟ်ဟ်၊ ဂကောံမဆေၚ်စပ်ကဵုပရေၚ်ပၞာန် ဟွံသေၚ်မ္ဂး ဂကောံဟွံဆေၚ်စပ်ကဵုသွာၚ်ပၞာန်တအ်ကီု သီုပ္ဍဲဂကောံရပ်လွဟ်ဟွံလုပ်သၞောဝ်တအ် ကေုာံ သွက်ဂွံစဵုဒၞါ ပွမရပ်စပ်တၚ်နၚ်ပၞုက်နူသွာၚ်ပၞာန်တအ်ဂှ်တုဲ ပ္ကတ်ပ္ကေၚ်ကဵုမၞိဟ်ပူဂဵုမွဲမွဲ၊ ရေၚ်တၠုၚ်ကၠောန်သ္ပဒုၚ်ကာ ကေုာံ ပွမလှဲပြံၚ်ကဵုကွတ်တအ်ဂှ်ရ။
ဂကောံရပ်လွဟ်လုပ်သၞောဝ်ဟွံသေၚ်ဟီုဂှ် အပ္ဍဲဍုၚ်ကဵုဒှ် မ္ၚးဍုၚ်ကဵုဒှ် နွံဒၟံၚ်တုဲ ဒှ်မံၚ်ဂကောံရပ်လွဟ်လုပ်သၞောဝ် ပ္ဍဲကၟိန်ဍုၚ်ဟွံသေၚ်တုဲ ဒှ်ဂကောံရပ်လွဟ်ပံက်လဝ် နကဵုသၞောဝ်ဥပဒေဟွံသေၚ် သာ်ဏံ ပံက်လဝ်အဓိပ္ပာယ်ရ။
ဣဏံဝွံ စၞောန်ထ္ၜးဒၟံၚ် ဂကောံရပ်လွဟ်ကောန်ဍုၚ်အရၚ် ပၠန်ဂတးဒၟံၚ်ကံၚ်ဇြဳပၞာန်တအ်ကီု ဒပ်ပၞာန်စဵုဒၞါညးဍုၚ်ကွာန် PDF ကေုာံ ဂကောံရပ်လွဟ်အပ္ဍဲဗဒသ Local PDF တအ်ရောၚ်ဂှ် ကၠိုဟ်ကေတ်ရ။
ကောန်ပၞာန် ကေုာံ ကောန်ဒပ်ဗၠာဲသၟိၚ် လုပ်သ္ပလဝ်ဇြဳဒဳအာမ် အပ္ဍဲပၞာန်သီအဝဵုဏံဂှ် လုပ်စိုပ်ကၠောန်ၜိုတ်ဒၟံၚ် အပ္ဍဲဂကောံရပ်လွဟ်ပၠန်ဂတးတအ်နွံတုဲ ထံက်ပၚ်ကဵုဒၟံၚ် သီုကဵုနဲကွတ်ပညာ မဆေၚ်စပ်ကဵုပရေၚ်ပၞာန်တအ်ဂှ်လေဝ် နွံရ။
သ္အာၚ်နူဂှ်ပၠန် ရဲကဵုပရိုၚ်အပ္ဍဲဒပ် ဟွံသ္ပဇြဳဒဳအာမ်မွဲသာ် မပလံၚ်ကဵုဒၟံၚ် တၚ်နၚ်အပ္ဍဲဌာနဝန်ဇၞော်ကာစဵုဒၞါကံၚ်ဇြဳပၞာန် ဇရေၚ်ဒပ်ပၠန်ဂတးရပ်လွဟ်တအ်ဂှ်လေဝ် နွံဒၟံၚ်ရ။
ဗိုလ်ဇၞော်ဇြေန်ယဝ်သ္ပလဝ်ဇြဳဒဳအာမ်ဂှ်တှ်ေ ကၠာဟွံဂွံလလောၚ်ပ္တိတ်သၞောဝ်သာ်ဏံဂှ်လေဝ် ယဝ်ရပ်ဂွံရဲကဵုပရိုၚ်အပ္ဍဲဒပ်တအ်ဂှ်မ္ဂး ကဵုဒၟံၚ်ဒုဟ်ဒဏ် ဒဏ်ထံၚ်သၞာံဇမၠိၚ်တအ်ကဵု ဒုဟ်ဒဏ်မထေက်ကြိုက်တအ်ဂှ်ရတုဲ သၞောဝ်ဥပဒေ ကဵုဒုဟ်ဒဏ် စဵုကဵုဒဏ်ဂစိုတ်ဂွံဏံ တိတ်ကၠုၚ်ဂှ်လေဝ် မုဟွံတၟေၚ်ရောၚ် ဟီုရ။
“အခိၚ်လၟုဟ် ရဲကဵုပရိုၚ်အပ္ဍဲဒပ်တအ်ဂှ်တှ်ေ ကၠာဟွံဂွံပတိတ်သၞောဝ်ဏံ နူကၠာတေံဂှ်ရ ယဝ်ရပ်ဂွံမ္ဂး ဒးဒုၚ်မံၚ်ဒဏ်ထံၚ် ၂၀ သၞာံ ဒဏ်ဂစိုတ် ဒုဟ်ဒဏ်မထေက်ကြိုက်တအ်ဂှ် နွံလဝ်ရ။ ပိုယ်တံလေဝ် ဒးကေၚ်ဆောံလေၚ်ကၠုၚ်ဒၟံၚ် ရဲကဵုပရိုၚ်တအ်ဂှ်နွံ။ အေ ဂှ်တှ်ေ ပရိုၚ်နူကဵုဌာနမဆေၚ်စပ် အပ္ဍဲဒပ်ဂမၠိုၚ် ကဵုကၠုၚ်ဂှ်တှ်ေ ဒးကူချပ်အိုတ်တုဲမှ ဒးကၠောန်လဝ်ဏောၚ်။ ကၠာသၞောဝ်ဏံဟွံဂွံတိတ်ဂှ်လေဝ် ဍေံတံ ကၠောန်လဝ်ရ၊ သၞောဝ်ဏံ တိတ်ကၠုၚ်ဂှ်လေဝ် မုဟွံတၟေၚ်ရပုဟ်၊ ဍေံတံဂှ်တှ်ေ အရာဒးကၠောန်နွံဂှ် ကၠောန်မံၚ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် သ္ဇိုၚ်ဝန်ကာစဵုဒၞါမွဲမွဲတၠ ယဝ်မိက်ဂွံကၠောန်ၜိုတ် နဒဒှ်သ္ဇိုၚ်ဝန်ဂီုကၠီုပူဂဵုမ္ဂး ဒးအာတ်ပ္တိုန် ပ္ဍဲဌာနဝန်ဇၞော် ဗွဲမဗဗွဲကဵုစေဝ်ပၞောန်ဂမၠိုၚ်ဏောၚ် စုတ်လဝ် ပ္ဍဲသၞောဝ်ဂှ်ရ။
ကၠာသၞောဝ်ဏံ လမျီုဟွံဂွံလုပ်ဂှ် သ္ဇိုၚ်ဝန်ကာစဵုဒၞါမွဲမွဲတၠ ယဝ်ကၠောန်ဒၟံၚ် နဒဒှ်သ္ဇိုၚ်ဝန်ဂီုကၠီုပူဂဵုမ္ဂး ပပ္တံနူတ္ၚဲသၞောဝ်ဏံ လမျီုလုပ်တုဲ အပ္ဍဲပွိုၚ်တြဴဂိတု ဒးအာတ်ပ္တိုန်အခေါၚ် ပ္ဍဲဌာနဝန်ဇၞော်ရောၚ် စၞောန်ပျးလဝ်ရ။
ပ္ဍဲဂိတုဖေဖဝ်ဝါရဳ ၁၈ တုဲကၠုၚ်တံ ကံၚ်ဇြဳပၞာန် သ္ပဒတန်လဝ် သၞောဝ်ဒုၚ်ကာစပ်ကဵုပရေၚ်ဂီုကၠီုပူဂဵုတုဲ ကမ္ပဏဳဍုၚ်သ္အာၚ် ကေုာံ ကမ္ပဏဳအပ္ဍဲဍုၚ်တအ် နွံပၟိက်မ္ဂး ရပ်လွဟ်ဂွံတုဲ ကောန်ပၞာန်တြေံ ကောန်ပၞာန်ပျဳတုသေတ်တြေံ ကေုာံ ကောန်ပၞာန်ဍုၚ်သ္အာၚ်ဂမၠိုၚ် ပါလုပ်မာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI