ရေဝ်၊ ဂျူလာၚ် ၃၁
ဗ္ဒိုပ်ကၚ်စဵုဒၞါကံၚ်ဇြဳပၞာန်ၜါ ပ္ဍဲကဵုကွာန်ဘာမွဲ ပ္ဍဲကွာန်ကျာ်မွဲ ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်မသုန်တၠ ချိုတ်အာလဝ်ရောၚ် ဒပ်ပၠန်ဂတးဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ကၚ်စဵုဒၞါ နူကဵုကွာန်ဘာဂှ် ပ္ဍဲဂိတုဂျူလာၚ် ၂၉ ပယျာံဂယးဂှ် ဒပ်ပံၚ်ကောံမဟာမိတ်ပၠန်ဂတးတအ် လုပ်စိုပ်ဗ္တိုက်လဝ်တုဲ ဗ္ဒိုပ်ကၚ်စဵုဒၞါ နူကဵုကွာန်ကျာ်ဂှ် လုပ်စိုပ်ဗ္တိုက်လဝ် ပ္ဍဲဂိတုဂျူလာၚ် ၃၀ အခိၚ်ပယျာံဂယးရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် ဒှ်အာလဝ်ပွိုၚ်ဘာ်နာဍဳပြၚ်တုဲ နူတမ်ဒပ်ဖျေံသ္ဇိုၚ်ကံၚ်ဇြဳပၞာန် ထပ်ပန်ပှော်လဝ်လွဟ်ဇၞော် နွံရ။
အပ္ဍဲပေါဲဗ္တိုက်ကွာန်ကျာ်ဂှ် ကောန်ဒပ်ကံၚ်ဇြဳပၞာန်မွဲတၠ ချိုတ်တုဲ ပ္ဍဲပေါဲဗ္တိုက်ကွာန်ဘာဂှ် ကောန်ဒပ်ကံၚ်ဇြဳပၞာန်ပန်တၠ ချိုတ်တုဲ ညးဇီုကပိုက်ကလိဂွံဝပ်တံလေဝ် နွံဒၟံၚ်ရောၚ် ညးတာလျိုၚ်ဒပ်ပၠန်ဂတး ပါလုပ်ဒၟံၚ် ပ္ဍဲပေါဲဗ္တိုက်ဂှ်မွဲတၠ ဟီုရ။
ပရေၚ်ဗ္တိုက်ဏံဂှ် ဒပ်ပၠန်ဂတးဍုၚ်မန် MSRF ၊ ဒပ်စဵုဒၞါညးဍုၚ်ကွာန်ရေဝ် YPDF ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တမ်ဒပ် ၂၇ တအ် ပံၚ်တောဲဗ္တိုက်လဝ်တုဲ ဇီုကပိုက်ကလိဂွံဝပ်ဟွံမွဲရောၚ် သ္ဂးရ။
တုဲကၠုၚ်ဂိတုဂျူလာၚ် ၁၁ တေံဂှ်လေဝ် ဒပ်ကံၚ်ဇြဳပၞာန် မၚ်တောပ်ဗ္တိုက်ဒၟံၚ် ဗ္ဒါဲဒဒန်ကွာန်ကျာ်ဂှ် ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MSRF