လံၚ်လုၚ်၊ ဂျူလာၚ် ၃၁
အပ္ဍဲပေါဲဗ္တိုက် ဗ္ဒါဲကွာန်ပါန်တေန်အေန် ပွိုၚ်ဍုၚ်လံၚ်လုၚ် ရးတၞၚ်သဳဂှ် ဟိုတ်နူဒပ်ကံၚ်ဇြဳပၞာန် ပန်ကၠုၚ်လွဟ်ဇၞော်တုဲ ညးဍုၚ်ကွာန်ကောန်အရာပ်ၜါတၠ ချိုတ်တုဲ တြဴတၠ ဇီုကပိုက်ကလိဂွံလဝ်ဝပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဂျူလာၚ် ၂၉ တေံ နူကဵုသၞေဟ်ဍာ်ဒမျိုဟ်ထဝါဲဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပွဳပွူဗ္ဒါဲကွာန်ပါန်တေန်အေန်ဂှ်တုဲ ဒှ်လဝ်ပေါဲဗ္တိုက် ကုဒပ်ပံၚ်ကောံပၠန်ဂတးတအ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက် ဒှ်လဝ်ပွိုၚ်ဗ္ဒါဲ ၅ နာဍဳဏံဂှ် နူကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်ထဝါဲကဵု လံၚ်လုၚ်ဂှ်ကီု သီုနူကဵုက္ၜၚ်ပၞာန်ဒပ်ပၞာန်တအ်ဂှ်လေဝ် ဗွဲမဂၠိုၚ်ဂၠေၚ် ပန်လဝ်လွဟ်ဇၞော် အပ္ဍဲလ္ပာ်ကွာန်ပါန်တအေန်ရ။
ဟိုတ်နူလွဟ်ဇၞော်ဒပ်ကံၚ်ဇြဳပၞာန်တုဲ မၞိဟ်တြုံဒေသၜါတၠ အာယုက်မၞုံ ၄၀ သၞာံဂှ် ဇီုကပိုက်ချိုတ်အာလဝ်တုဲ မၞိဟ်ဗြဴဂမၠိုၚ် မပါလုပ် ညးဒေသတြဴတၠ ဇီုကပိုက်ကလိဂွံလဝ်ဝပ်ရ။
ဒပ်ကံၚ်ဇြဳပၞာန် ဒးဂိလဝ် အပ္ဍဲပေါဲဗ္တိုက်ၜါလ္ပာ်ဂှ်ဝွံ ပွိုၚ်မွဲတ္ၚဲဓဝ် စံၚ်ပလီုဏာလဝ် သ္ၚိပ္ဍဲကွာန်ပါန်တအေန်ဂှ် ၁၀ မရောၚ် ညးဒေသလံၚ်လုၚ်ဂမၠိုၚ် ဟီုရ။
ဟိုတ်နူပေါဲဗ္တိုက်တုဲ ညးဒေသဂၠိုၚ်ကဵုလ္ၚီ နူကဵုပန်ကွာန် ပါလုပ်သီုကဵုကွာန်ပါန်တအေန်၊ ကွာန်တပျေ တအ်ဂှ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
တုဲကၠုၚ်ဂိတုဂျူလာၚ် ၂၃ တေံဂှ်လေဝ် ပ္ဍဲကဵုကွာန်ပါန်တဝ်ပျေန်ကဵု ကွာန်မံၚ်မကာန် ပွိုၚ်ဍုၚ်လံၚ်လုၚ်ဂှ် ဟိုတ်နူဒပ်ကံၚ်ဇြဳပၞာန် ပန်လဝ်လွဟ်ဇၞော်တုဲ ညးဍုၚ်ကွာန်ကောန်အရာပ်ပိတၠ ချိုတ်တုဲ တြဴတၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ