နေဗျဳဒဝ်၊ ဂျူလာၚ် ၃၁
ပ္ဍဲပေါဲရုဲမာဲကံၚ်ဇြဳပၞာန် ကၠောန်ဗဒှ်အာဏံ ယဝ်ကလိလောန်ဒုဟ်ဒဏ် စဵုကဵုမၞိဟ်လမျီုဒးအိုတ်မ္ဂး ဖျေံဒဏ်ဂစိုတ်ဂွံ သၞောဝ်သွက်ဂွံစဵုဒၞါ နူပွမပလီုပလာ်ပေါဲရုဲမာဲဒဳမဝ်ကရေဇြဳဗော်ဇဳဂှ် ကံၚ်ဇြဳပၞာန် စၞောန်ပျးကၠုၚ် ပ္ဍဲဂိတုဂျူလာၚ် ၂၉ တေံရ။
သၞောဝ်ဥပဒေဏံဂှ် အခန် ၈ ၊ ၝောံပိုဒ် ၃၂ ပါလုပ်တုဲ ပ္ဍဲပေါဲရုဲမာဲဍုၚ်ဗၟာဏံမ္ဂး ဒှ်သၞောဝ်ပေါဲရုဲမာဲဖျေံဒဏ်ဂစိုတ်ဂွံ ဟွံကေၚ်နွံကၠုၚ်လဝ်တုဲ ဆၜိုတ်ဟီုပရူပေါဲရုဲမာဲဟွံခိုဟ်ဂှ် ဒးဒုၚ်ဖျေံဒဏ်ထံၚ်မာန်ဒၟံၚ်ရ။
အတိုၚ်သၞောဝ်ဏံမ္ဂး ပ္ဍဲအရာကလိလောန် ဒုဟ်ဒဏ်မမိက်ကဵုမွဲမွဲ မဆက်စပ်ကဵုပေါဲရုဲမာဲဂှ် ယဝ်မၞိဟ်မွဲမွဲတၠ လမျီုဒးအိုတ်အာမ္ဂး ကုညးမပါလုပ်ဒၟံၚ် ပ္ဍဲဒုဟ်ဒဏ်ဏံသီုဖအိုတ်ဂှ် ဒးဖျေံဒဏ်ဂစိုတ်ဏောၚ် စၞောန်ပျးလဝ်ရ။
ညးရေၚ်တၠုၚ်ဂဗုတ်ကၠတ်ထဝ်သၞောဝ်ဓဝ် ဥူကျဳမျေတ်ဂှ်တှ်ေ သၞောဝ်ဏံဂှ် ဒှ်ဟိုတ်နူတၚ်အာတ်မိက် ဗော်ပရေၚ်ဍုၚ်ကွာန် မလုပ်ပြိုၚ်အာပေါဲရုဲမာဲတံဂှ်ဏောၚ်တုဲ ဒှ်သွက်ဂွံဖျေံဒဏ်ဂစိုတ် ကုမၞိဟ်မလုပ်ပထုဲပလာပ် ပေါဲရုဲမာဲရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဗော်ပရေၚ်ဍုၚ်ကွာန်လ္ပာ်ဒပ်ပၞာန်တအ်ဂှ်တှ်ေ ဍေံတအ် အန္တရာယ်နွံမံၚ်ဏောၚ်။ ပိုယ်တအ် လုပ်ပြိုၚ်ပ္ဍဲပေါဲရုဲမာဲတုဲ ယဝ်ဂွံဒုၚ်ရုဲစှ်မ္ဂးလေဝ် ဘဲအန္တရာယ်လမျီုဂှ် နွံမံၚ်။ ဟီုကၠုၚ်သာ်ဏံတုဲ သၞောဝ်ဏံ တိတ်ကၠုၚ်လဝ်ရ။ ညးတအ် ကၠောန်အာပေါဲရုဲမာဲ ဟွံဒှ်ညံၚ်ဂွံဒှ်ဏောၚ်။ ရဲပလီုတှ်ေ ပလေဝ်စလဝ်ဂးတုဲ ဒှ်မံၚ်သၞောဝ်ဥပဒေ သာ်ဏံရ” သာ်ဝွံ သ္ဂးရ။
သ္အာၚ်နူဂှ်ပၠန် အတိုၚ်ဝေါဟာ မရပ်စပ်စကာလဝ် ပ္ဍဲသၞောဝ်ကံၚ်ဇြဳပၞာန်ဂှ်မ္ဂး ဒးဖျေံဒဏ်ထံၚ် ဒးဖျေံဒဏ်ဂစိုတ်ဏောၚ်ဂးတုဲ စကာလဝ်သာ်ဏံဂှ်ရ ကဵုဖျေံလဝ်အတေၚ်ဏောၚ်တုဲ နကဵုညးချဳဒရာၚ်ကတိုၚ်ကၟဟ် ဟွံဒုၚ်တဲပေါဲရုဲမာဲတအ် ဒှ်မံၚ်အကာဲအရာ ဒးစွံသတိဇၞော်ဇၞော်ရောၚ် ညးဆက်ဟီုရ။
အတိုၚ်သၞောဝ်ဂှ်မ္ဂး ပွမဟီုတွံ ဟီုဂး ညံၚ်လၟေၚ်ကမၠောန်ပေါဲရုဲမာဲဂွံလီုမ္ဂး ဒးဒုၚ်ဖျေံဒဏ်ထံၚ် နူ ၃ သၞာံ ဂၠိုၚ်အိုတ် ၇ သၞာံဏောၚ်တုဲ ယဝ်ကလိလောန်ဒး ပ္ဍဲဒၞါဲမၞိဟ်ကောံကလောံဂှ်မ္ဂး ဒးဒုၚ်ဖျေံစၟတ် ဒဏ်ထံၚ် နူ ၅ သၞာံ စဵုကဵု ၁၀ သၞာံမာန်ရောၚ် ပါလုပ်ရ။
သ္အာၚ်နူဂှ်ပၠန် ယဝ်ဘပဠ တာဒၞါ ပလာပ်ပထုဲ သ္ကဵုဇီုကပိုက်ဂိဂေၚ်မွဲမွဲသာ် လ္တူညးတၠဆန္ဒမာဲ၊ ညးတာလျိုၚ်ရုၚ်မာဲ၊ ညးတာလျိုၚ်ဂကောံကဝ်မယှေန်ပေါဲရုဲမာဲ ကေုာံ အလံၚ်ညးစၞးကၠတ်ထဝ်တအ်ဂှ်မ္ဂး ဖျေံအာဒဏ်ထံၚ် နူ ၃ သၞာံ စဵုကဵုမွဲအာယုက်မာန်ရောၚ် စၞောန်ပျးလဝ်ရ။
စၟတ်တဲဆန္ဒမာဲ၊ ကဠာမာဲ၊ စက်ကဵုမာဲ၊ ရုၚ်ကဝ်မယှေန် ကေုာံ စမြိုၚ်ရုၚ်မာဲ မဆက်စပ်ကဵုပေါဲရုဲမာတအ်ဂှ်ကီု ကပေါတ်အရပ်စပ်မဆေၚ်စပ်ဂမၠိုၚ်ဂှ်ကီု ယဝ်ပလီုပလာ်မ္ဂးလေဝ် ဖျေံအာဒဏ်ထံၚ် နူ ၅ သၞာံ စဵုကဵု ထံၚ်မွဲအာယုက်ဏောၚ် သ္ဂးရ။
ကံၚ်ဇြဳပၞာန်ဝွံ ပ္ဍဲသၞာံဏံကဵု သၞာံတၟိမံက်တေံ ဂွံကၠောန်အာပေါဲရုဲမာဲဂှ် ကဵုဒၟံၚ်တန်ဗ္တောန်စက်ကဵုမာဲ၊ ပလေဝ်ပလေတ်စၞောန်ပျး သၞောဝ်ပေါဲရုဲမာဲ၊ လၟေၚ်ကမၠောန်စပ်ကဵုပေါဲရုဲမာဲတအ်ဂှ် ကၠောန်ကၠုၚ်ဒၟံၚ်အဆက်က်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI