နေဗျဳဒဝ်၊ ဂျူလာၚ် ၃၁
ကံၚ်ဇြဳပၞာန် လလောၚ်တြးကၟိန်ဍုၚ် နဒဒှ်အကာဲအရာကာတၟေၚ်တုဲ မပပဵုပ္တိုန်ကေတ်လဝ် အာယုက်ကာလကာတၟေၚ် ၆ ဂိတုမွဲဝါဂှ် အခိၚ်အာယုက်ပပဵုပ္တိုန်ကေတ်လဝ်ကြပ်အိုတ်ကၠုၚ်မံၚ်ဏံ လလောၚ်ပ္တိတ်ကၠုၚ်မံၚ် သၞောဝ်မဆေၚ်စပ်ကဵုပေါဲရုဲမာဲ မွဲတုဲမွဲရ။
သၞောဝ်ပေါဲရုဲမာဲ နူကဵုကၠတ်ထဝ်ပိတန် ကၠတ်ထဝ်ညးဍုၚ်ကွာန်၊ ကၠတ်ထဝ်ကောန်ဂကူ၊ ကၠတ်ထဝ်ရးဒေသ ဟွံသေၚ်မ္ဂး ကၠတ်ထဝ်တွဵုရးတအ်ဂှ် ကံၚ်ဇြဳပၞာန် သ္ပဒတန်စၞောန်ပျးကၠုၚ် ပ္ဍဲဂိတုဂျူလာၚ် ၂၉ ဏံ နဒဒှ်သၞောဝ်ပလေဝ်လဝ် အလန်ဆဌမရ။
သ္အာၚ်နူဂှ်ပၠန် သၞောဝ်သွက်ဂွံစဵုဒၞါ နူပွမပလီုပလာ်ပေါဲရုဲမာဲဒဳမဝ်ကရေဇြဳဗော်ဇဳတုဲ မဖျေံဒဏ်ဂစိုတ်ဂွံ ပ္ဍဲဝၚ်ပေါဲရုဲမာဲ ကၠောန်ကၠုၚ်လဝ်ပ္ဍဲဍုၚ်ဗၟာဏံ ဟွံကေၚ်နွံကၠုၚ်လဝ်ဂှ် ကံၚ်ဇြဳပၞာန် စၞောန်ပျးလဝ်ရ။
စၞောန်ပျးကၠုၚ် သၞောဝ်စပ်ကဵုပေါဲရုဲမာဲသာ်ဏံဂှ်ဝွံ ထ္ၜးကၠုၚ်ဒၟံၚ် အကာဲအရာ ဒဒှ်ရဂွံကၠောန်ပေါဲရုဲမာဲ ချိုတ်ပၠိုတ်ဒၟံၚ်ဂှ်ရောၚ် မာန်အံၚ်ပျဳသဵု ဥက္ကဌ ဗော်ဒဳမဝ်ကရေတ်တေတ်ကောန်ဂကူကရေၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပေါဲရုဲမာဲဂှ်တှ်ေ ကၠောန်ဂှ်ဒးကၠောန်ဏောၚ်။ သၞောဝ် နဲသၞောဝ်ဥပဒေတအ်ဂှ်တှ်ေ ဟွံတိတ်ဏီပုဟ်။ လၟုဟ် (သၞောဝ်စပ်ကဵုပေါဲရုဲမာဲ) တအ် တိတ်ယျဟီုတှ်ေ ဗော်ပိုယ်တအ်လေဝ် မၚ်ဒၟံၚ်သၞောဝ်တအ်ဏံရဏောၚ်။ ပေါဲရုဲမာဲဂှ်တှ်ေ ဂွံကၠောန်ဗဒှ်ဂှ် ချိုတ်ပၠိုတ်မံၚ်ယျ” သာ်ဝွံ သ္ဂးရ။
အပ္ဍဲပေါဲဗ္တိုက်ရပ်လွဟ် ထပိုတ်ရိုဟ်ကၞက်သၞောတ်တၠအဝဵုပၞာန် ဒှ်ဒၟံၚ်အပ္ဍဲပရေၚ်ပၞာန်သီအဝဵုဏံဂှ် ဂွံဂွံပၞော်တိတ်ပရေၚ်ဍုၚ်ကွာန်ဂှ် ကၠောန်ဗဒှ်ကဵုအာပေါဲရုဲမာဲမွဲဏောၚ် ကံၚ်ဇြဳပၞာန် ဟီုကၠုၚ်မံၚ် ဂၠိုၚ်ၚ်ကဵုဝါရ။
ဆ္ဂး ထ္ၜးဟိုတ်ကဵုပရေၚ်ဍုၚ်ကွာန်ဟွံညိၚ်ဝတ်တုဲ စွံကၠုၚ်လဝ်ကၟိန်ဍုၚ် သၟဝ်စက်ယန်အုပ်ဓုပ်ပၞာန် မဒုၚ်လဝ်ယၟုကံၚ်ဇြဳပၞာန်ဂှ် ပွိုၚ်ပန်သၞာံပြၚ်ကၠုၚ်တုဲ ပလေဝ်ပလေတ်ကၠုၚ်ဒၟံၚ် သွက်ဂွံကၠောန်ဗဒှ်ပေါဲရုဲမာဲ ဟွံပိုတ်သ္ကုတ်ရ။
နူဂိတုဒဳဇြေမ်ဗာ သတ္တာဟတတိယ စဵုကဵုဂိတုဂျာန္နဝါရဳ သတ္တာဟဒုတိယ မလလောၚ်တြးလဝ်လၟုဟ်ဂှ် သွက်ဂွံကၠောန်ပေါဲရုဲမာဲ ပ္ဍဲကဵုပွိုၚ်ဍုၚ် ၂၆၀ မာန်ဂှ် ကံၚ်ဇြဳပၞာန် အခိၚ်သှ်ေဒၟံၚ် ၜိုတ်ပန်ဂိတုပြၚ်ၚ်ဓဝ်ရ။
က္ဍိုပ်သ္ကိုပ်ဗော်တောတက်မန်မွဲတၠဂှ်တှ်ေ နကဵုကံၚ်ဇြဳပၞာန် ကဵုလဝ်ကတိ အပ္ဍဲဍုၚ်ကဵု ဍုၚ်သ္အာၚ်တအ် ဂၠိုၚ်ၚ်ကဵုဝါဂှ်တှ်ေ အလန်ဏံ ဒးကၠောန်ဗဒှ်အာပေါဲရုဲမာဲ ဗွဲစၟတ်ရဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပေါဲရုဲမာဲဂှ်တှ်ေ ဍေံတအ်(စကစ) ဒးကၠောန်ဍာံဍာံရဏောၚ်။ ကဵုလဝ်ကတိဂှ်လေဝ် ဂၠိုၚ်ဒၟံၚ်ယျ။ ဟွံကၠောန်မွဲသာ် ဆက်အာမံၚ် ၆ ဂိတုမွဲဝါ ဗီုဏံရတှ်ေ ဟွံပြေပြံၚ်ရပုဟ်လေဝ်။ ဇြဟတ်ဓရိုဟ်နူဍုၚ်သ္အာၚ်တအ်ဂှ်လေဝ် ကၠုၚ်မံၚ်ဏောၚ်။ ဟဂှ်ရ ဍေံတအ် ဒးကၠောန်အာတွဵုဏောၚ်ဂှ် ညာတ်ကေတ်ရ” သာ်ဝွံ သ္ဂးရ။
ပ္ဍဲပေါဲရုဲမာဲ သၞာံ ၂၀၂၀ တေံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် သီကေတ်လဝ်အဝဵုကၟိန်ဍုၚ် နကဵုဟိုတ်မမာဲဟွံဓဝ်ယာဂှ်တုဲ လလောၚ်တြးလဝ် အကာဲအရာကၟိန်ဍုၚ် ကာတၟေၚ် ပွိုၚ်မွဲသၞာံရ။
ကြဴနူဂှ်တုဲ အတိုၚ်သၞောဝ်သ္ဇိုၚ်ကၟိန်ဍုၚ် ၝောံပိုဒ် ၄၂၅ ဂှ်မ္ဂး အာယုက်ကာလကာတၟေၚ် ပပဵုပ္တိုန်မွဲအလန် ပွိုၚ်တြဴဂိတုဂွံတုဲ ပပ္တဵုပ္တိုန်စဵုကဵုၜါဝါဂွံဂှ် ကံၚ်ဇြဳပၞာန် ထ္ၜးကၠုၚ်ဟိုတ်ကဵုပရေၚ်ဟွံညိၚ်ဝတ်တုဲ ပပဵုပ္တိုန်ကေတ်လဝ် ဂၠိုၚ်ၚ်ကဵုဝါတုဲ ကၟိန်ဍုၚ်ဝွံ ဆက်နွံဒၟံၚ် နဒဒှ်အကာဲအရာကာတၟေၚ်ရ။
အာယုက်ကာလကာတၟေၚ် ပပဵုပ္တိုန်ကေတ်လဝ် ပ္ဍဲဂိတုဂျာန္နဝါရဳ ၃၁ ဂှ်လေဝ် အာယုက်အိုတ် ပ္ဍဲဂိတုဂျူလာၚ် ၃၁ ဏံဏောၚ်တုဲ စိုပ်တ္ၚဲဏံမ္ဂး ကံၚ်ဇြဳပၞာန် ကော်ကၠုၚ်ကောံဓရီုကံၚ်ဇြဳဂီုကၠီုစဵုဒၞါဏောၚ် မဒှ်ရ။
သွက်ဂွံကၠောန်ဗဒှ် ပေါဲရုဲမာဲကံၚ်ဇြဳပၞာန် မပလေဝ်ဒၟံၚ်ဏံမာန် အပ္ဍဲကောံဓရီုဏံ သ္ဇက်ဂွံရုပ်သီအာ အကာဲအရာကာတၟေၚ် မလလောၚ်တြးလဝ်ဂှ်နွံရောၚ် ညးလ္ၚတ်ပရေၚ်ဍုၚ်ကွာန်ဂမၠိုၚ် သ္ၚဳဂၠိပ်ဒၟံၚ်အိုတ်ရ။
ပ္ဍဲကဵုတၚ်ပ္တိုန်ထ္ၜး ပ္ဍဲကောံဓရီုကာစဵုဒၞါဂှ် သမ္မတယာယဳ ရပ်လဝ်အဝဵုသၠုၚ်အိုတ်တုဲ ဒးကဵုသ္ဂုတ်သွာတ်ဏောၚ်ဂှ်ရ နကဵုသ္ကိုပ်ပၞာန်ဇၞော် မေန်အံၚ်လှာၚ် မလှဲပြံၚ်ကေတ်လဝ်လျိုၚ်ဏံဂှ်တှ်ေ ဗီုပၟိက်စိုတ် သ္ဂုတ်သွာတ်ကေတ်မာန် ဒှ်မံၚ်အကာဲအရာဏံရ။
အလဵုသ္ကိုပ်ပၞာန်ဇၞော် မေန်အံၚ်လှာၚ်ဂှ်လေဝ် ပ္ဍဲအရာကၠောန်ဗဒှ်ပေါဲရုဲမာဲဂှ် ရေၚ်တၠုၚ်အာ နကဵုတၚ်သ္ဂုတ်သွာတ် ကံၚ်ဇြဳဂီုကၠီုစဵုဒၞါမာန် သာ်ဝွံ ထ္မံက်ထ္ၜးလဝ် ပ္ဍဲသၞောဝ်သ္ဇိုၚ်ကၟိန်ဍုၚ်ရောၚ်ဂှ် ဟီုလဝ်ရ။
အတိုၚ်သၞောဝ်သ္ဇိုၚ်ဒက်ပ္တန်မ္ဂး ပ္ဍဲဂိတုဂျူလာၚ် ၃၁ ဏံ ယဝ်လလောၚ်တြး ဒဒှ်ရရုပ်သီအကာဲအရာကာတၟေၚ်ဂှ်မ္ဂး အပ္ဍဲပွိုၚ်တြဴဂိတု သွက်ဂွံကၠောန်ပေါဲရုဲမာဲဂှ် ဒးဒက်ပ္တန်အလဵုအသဳအကြာမွဲဏောၚ် ညးလ္ၚတ်ပရေၚ်ဍုၚ်ကွာန်ဂမၠိုၚ် သ္ၚဳဂၠိပ်လဝ်အိုတ်ရ။
ဆ္ဂး အပ္ဍဲပၞာန်သီအဝဵုဏံ နကဵုက္ဍိုပ်သ္ကိုပ်ပၞာန် မကေတ်လဝ်လျိုၚ် နဒဒှ်ဥက္ကဌကံၚ်ဇြဳပၞာန်ဂှ် လေပ်ပအပြံၚ်အလှာဲ ဒၞါဲကောန်ဂကောံကံၚ်ဇြဳပၞာန်တအ် မွဲဏှမွဲဏှဂှ် ဆက်ကၠောန်အာအလဵုအသဳအကြာ နကဵုကောန်ဂကောံနွံမံၚ်လၟုဟ်တံဏံမာန်ရောၚ် ထံက်ထ္ၜးလဝ်ရ။
သွက်ဂွံကၠောန်ဗဒှ်ပေါဲရုဲမာဲဂှ် နကဵုကံၚ်ဇြဳပၞာန် နူကောံဓရီုဂီုကၠီုစဵုဒၞါဏံ သ္ဂုတ်သွာတ်ကၠုၚ် အကာဲအရာသာ်လဵုမွဲဒှ်ဒှ် လ္ပာ်ဇြဟတ်ပၠန်ဂတးတအ်ဂှ်တှ်ေ ဒစဵုဒစးဗ္တိုက်သရိုဟ်အာဏောၚ်ဂှ် ကဵုလဝ်သမ္တီ နူကၠာတေံရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI