ပဠဝ်၊ အဝ်ဂတ် ၂
ပ္ဍဲရးဒေသတနင်သဳ ပွိုင်ဍုင်ပဠဝ်(ပုလော) ရုင်ဗၠာဲသၟိင် ဍုင်ပဠ(ပလ) ညံင်ဟွံဂွံဒးကျဗြောံအာ ဒပ်ပၞာန်ဗၟာ ဒုင်ခဳလဝ်ကဵုပၞာန်ကျာ ဇၞော်ကဵုဇြဟတ်ဏောင် ရဲဒေသတံ ဟီုကဵုသြင်လောန်တိုင်မ်ရ။
ဒပ်ကံင်ဇြဳပၞာန်ကဵု ဒပ်ဗၠာဲသၟိင် ဇြဟတ် ၅၀ ပြင်င် ဖျေံလဝ်ဒပ်ဒၞာဲ ဗဒိုပ်ဗၠာဲသၟိင်ဍုင်ပဠဂှ် စနူအဝ်ဂတ်(၁) အခိင်နူဂယး ရဲဒပ်ပံင်ကောံပၠန်ဂတးတံ လုပ်သီမံင်ဗဒိုပ်ဏံရ။
အပ္ဍဲကဵုပေါဲဗတိုက်ဏံ ဗဒိုပ်ဏံညံင်ဟွံဂွံကျဗြောံအာ ဒပ်ပၞာန်ဗၟာ ကၠုင်ဖျေံဏာဗုမ် ဟွံအောန်နူကဵု ၃ ဝါကီုတုဲ ဒၞာဲအပ္ဍဲဍုင်ဗွဲမဂၠိုင် လီုလာ်စာ်ထောင်အာဂၠိုင်မာန်ဏောင် ကောန်ဍုင်ညးတံ ဟီုဂးရ။
ဟိုတ်နူပေါဲဗတိုက် ဗဒိုပ်ဗၠာဲသၟိင်ဍုင်ပဠဂှ် ကောန်ဍုင်ဗွဲမဂၠိုင် ဂြိပ်ပါဲဒဴတိတ်အာတုဲ ပေါဲဗတိုက်ၜါလပါ်ဂှ်လေဝ် ဒဵုကဵုအခိင်ဗတမ် ဆက်ပန်မံင်ညးသကအ်ရ။
စပ်ကဵုပရေင်ပေါဲဗတိုက်ပဠဏံတုဲ ကောန်ညးဍုင်ကွာန်တံကီု ရဲဒပ်ၜါလပါ်တံကီု ဗီုလီုဒးလဝ်ဘဲဝပ် ပရေင်ချိုတ်ဂျိုင် တင်နင်သောဲသောဲဗြောဲဗြောဲ ဟွံဂွံတီဏီ။
စနူဂျူလာင် ၂၄ တုဲကၠုင်ဏံရ ဍုင်ပဠကီု အကြာပဠကဵု ဍုင်ပဠဝ် ပ္ဍဲကွာန်နွံမံင်လ္တူဂၠံင်ဇၞော်ကၟိန်ဍုင်တံဂှ် အကြာၜါလပါ် ပေါဲဗတိုက်ဒှ်ကၠုင် ဗွဲမသ္ကာတ်မြဟ်ရ။
အပ္ဍဲပေါဲဗတိုက်ဏံ ဒၟာနူဒပ်ကံင်သဳပၞာန် ဗတိုက်မံင်ကဵု လွဟ်ဇၞော်ကီု ပၞာန်ကျာတံဂှ်ဟေင် ကောန်ညးဍုင်ကွာန် ဗ္ဒါဲ ၂၀ တၠ ချိုတ်လဝ်တုဲ ရဲဒးလဝ်ဘဲဝပ်ဗွဲမဂၠိုင်ဂၠင် နွံမံင်ရောင် ဂွံလဝ်ပရိုင်ရ။
ပရိုင်- သြင်လောန်တိုင်မ်
Photo – Social Media