ဒၞာဲပွိုင်ဍုင်လလောင်တြးလဝ် ပရေင်အုပ်ဓုပ်ပၞာန်တံဂှ် ဒပ်ပၞာန် ဘိုအ်ဂွံထပ်သၠုင်အသိင်ပၞာန်မာန်

နေပျဳတဝ်- အဝ်ဂတ် 

ကဝ်မယှေန်ပၞာန် ပရေင်စဵုဒၞာကောန်ဂကူကဵု ကံင်သဳပရေင်ဂီုကၠီု လလောင်တြးလဝ် အကာဲအရာကာမံက်တိုန် အပ္ဍဲကဵု ၆၃ ပွိုင်ဍုင်တုဲ  စကာမံင်ပရေင်အုပ်ဓုပ်ပၞာန် ပ္ဍဲကဵုကာလပိုင်ခြာလဝ်အခိင်ဏံဂှ် ထပက်ကၠုင်ပၞာန်မာန်ရောင် ဂကောံဇြဟတ်ပၠန်ဂတးတံကဵု ရဲခါတ်အကာဲပရေင်ပၞာန်တံ ဟီုရ။ 

အတိုင်တင်နင်လလောင်တြးလဝ်ဂှ်မ္ဂး ပွိုင်ဍုင် အပ္ဍဲတွဵုးရသေံကဵု ရခေင်တံ ပါလုပ်ဂၠိုင်တုဲ တွဵုးရ ကချေန်၊ ကရေင်ဍာဲ၊ ကရေင်၊ ချေင်ကဵု ပွိုင်ဍုင် ရးဒေသဇၞော် မပ္တံကဵု သကိုင်၊ မဂွေ၊ မာန်တလေဝ်တံ ပါလုပ်မံင်ရ။ နကဵုတင်တၟေင်မ္ဂး ဒၞာဲဒေသ ဝကဵု မါင်ဠာတံ ထိင်ဒဝ်လဝ် ပွိုင်ဍုင် ဟိုပါန်ကဵု မါင်ဠာတံဂှ်လေဝ် စုတ်လဝ်ကီု၊ ဒၞာဲဒပ်ပၞာန်ဗၟာ ထိင်ဒဝ်ဟွံမာန် ၁၆ ပွိုင်ဍုင်ကဵု ဒၞာဲဂကောံပၠန်ဂတးဂမၠိုင် မထိင်ဒဝ်လဝ်ပေင်င်တံ ပါလုပ်ရ။ 

တင်ရန်တၟံ သွက်ဂွံဖအိုတ်ကၠေံ ပရေင်ပကီုပရာတ် ရပ်လွဟ်ဗတိုက်မံင်တံကဵု တိဍာ်ဒေသ ညံင်ဂွံညိင်ဝပ်အာ၊ ပရေင်အုပ်ဓလီုသၞောဝ်ဓရ် ညံင်ဂွံရေင်တၠုင် ဗွဲမစိုပ်တရဴမာန် ထၜးလဝ်ဟိုတ်တံဏံတုဲ ခုတ်စၟတ်ပိုင်ခြာလဝ် ပွိုင် ၉၀ တ္ရဲရ။ 

ပရေင်တံဏံဂှ်မ္ဂး ပ္ဍဲကာလဒစးဒုင် ပေါဲရုဲမာဲဏံ ဒၞာဲပွိုင်ဍုင်လလောင်တြးလဝ် ပရေင်အုပ်ဓုပ်ပၞာန်တံဂှ် သွက်ဂွံကလေင် ထပက်ပၞာန်ကဵု ပၞာန်ကျာတံ သၠုင်အသိင် ဝေင်ကၠုင်ပၞာန် ဂၠိုင်တိုန်မာန်ရောင် ရဲခါတ်အကာဲပရေင်ပၞာန်တံ သ္ရဳဂၠိပ်လဝ်ရ။ 

ဗိုလ်ဇၞော် ဇြေန်ယျဝ် သ္ပလဝ် CDM ဂှ် အခိင်ပိုင်ခြာလဝ်ဏံ ဒပ်ပၞာန်ဗၟာတံ စထပက်ပၞာန် ကလေင်ပလန် ဗတိုက်ကၠုင်မာန်တုဲ နူဂှ်မွဲအဆံင် ပွိုင်ဍုင်ကၠောန်ပေါဲရုဲမာဲမာန်တံ ဗီုပြင်ညံင်ဂွံပဵုတိုန်ကၠုင် နွံမံင်ပၟိက်ရောင် ဟီုကဵု သြင်လောန်တိုင်မ်ရ။

“ပၟိက်ညးတံဂှ်တှ်ေ ပွိုင်ဍုင် ၆၃ ပွိုင်ဍုင်ဏံ အပ္ဍဲကဵုပွိုင် ၉၀ တ္ရဲ ညးတံ(ဒပ်ပၞာန်ဗၟာ) စထပက်ပၞာန်ဏောင်၊ ပၞောဝ်ကဵု ၆၃ ပွိုင်ဍုင်ဂှ်မှ သီုကဵု မါင်ဠာတံကီု အပ္ဍဲပွိုင် ၉၀ တ္ရဲဏံ နူတမ်မူလ ပွိုင်ဍုင်ကၠောန်ပေါဲရုဲမာဲဟွံမာန် ၆၃ ပွိုင်ဍုင်တံဂှ် ဟိုတ်နူကဵု ညးတံဗတိုက်ကၠုင်ဂံင်င်သ္ကာသ္ကာဂှ်ဟေင် ပ္ဍဲပွိုင်ဍုင်ၜိုတ် ၅၀ ဏံ ညးတံကၠောန်ပေါဲရုဲမာဲမာန်ကၠုင် ညးတံမိက်ဂွံဂွံ ဗီုပြင်ဗီုဏံ” သ္ဂးရ။  

ကံင်သဳပၞာန် မသၠောဲပအပ်ကဵုလဝ် အဝဵု ၃ တန်ကု ကံင်သဳပရေင်စဵုဒၞာကောန်ဂကူကဵု ပရေင်ဂီုကၠီု ဂှ် နကဵုသ္ဇိုင်သၞောဝ်ဥပဒေ ၝောံပိုဒ် ၄၂၁(က) စကာတုဲ ရးဒေသဇၞော်ကဵု တွဵုရး ပ္ဍဲကဵု ၆၃ ပွိုင်ဍုင်တံဂှ် လလောင်တြးလဝ် အကာဲအရာ ကာမံက်တိုန်ရ။ 

ဆဂှ်သၟးဟွံသေင် ညံင်ဂွံကလေင်စိုပ်အကာဲအရာတမ်မူလတေံ စကာရပ်စပ်အာ အမိင်ပရေင်အုပ်ဓုပ်ပၞာန်ဂှ်လေဝ် လလောင်ပတိတ်လဝ်အမိင်တုဲ တာလျိုင် ပရေင်အုပ်ဓုပ်ကဵု ပရေင်စဳရေင်သၞောဝ်ဓဝ် ပွိုင်ဍုင်တံဏံဂှ် ပအပ်လဝ်ကုဇရင် သ္ကိုပ်ဂအုပ် ပရေင်စဵုဒၞာဒပ်ပၞာန်ရ။ 

ဟိုတ်ဂှ်ရ ပွိုင်ဍုင်ဒးဒုင်လလောင်လဝ်အမိင် အကာဲအရာကာမံက်တိုန်ကဵု ပရေင်အုပ်ဓုပ်ပၞာန်တံဂှ်တှ်ေ သၠောဲပအပ်ကဵုလဝ် အဝဵုပရေင်အုပ်ဓုပ်ပၞာန် ဇရေင်သ္ကိုပ်ဌာန်ပၞာန်မဆေင်စပ်တံ သာ်ဝွံ နူဌာနသ္ကိုပ်ဌာန်ဂအုပ် ပရေင်စဵုဒၞာဒပ်ပၞာန် လလောင်တြးလဝ် ပ္ဍဲဂျူလာင် ၃၁ တေံရ။

ဂကောံလ္ရတ် စပ်ကဵုပရေင်ဂီုကၠီုပၞာန်ဗၟာ MDSI ညးတာလျိုင် သုတေသန ကိုနောင်ရိုးဂှ်တှ်ေ ကၠာဟွံစိုပ်ပေါဲရုဲမာဲဏံ တိဍာ်ဒးဗလးလဝ်တဲတံဂှ် ညံင်ဂွံကလေင်သီကေတ်မာန် နကဵုလၟေင်သၞောဝ် ပအပ်ပြာပ်ကဵုလဝ် သ္ကိုပ်ပၞာန်ဒေသတံရောင် ဟီုလဝ်ကဵု သြင်လောန်တိုင်မ်ရ။ 

“ကၠာဟွံစိုပ်ပေါဲရုဲမာဲ သွက်ဂွံကလေင်သီကေတ်တိဍာ် ညံင်ဂွံထမံက်အာရုပ်ရဴ ဂွံဝေင်အာပၞာန်မာန် နကဵုလၟေင်သၞောဝ် ဂွံဒှ်အထံက်ပင် ထပ်အပဵုစုတ်ကဵုလဝ် အမိင်အုပ်ဓုပ်ပၞာန်ရဏောင် ပိုဲတံ ဟီုစဂွံရ၊ အေဂှ်တှ်ေ ကာလဒစးဒုင်ပေါဲရုဲမာဲ ဂိတုခြာဟွံလံဏံ ဒေသဗလးလ္ရဵုလ္ရဵု ဒၞာဲကံင်သဳပၞာန် ဒးဗလးကၠုင်လဝ်တဲ ဒၞာဲဌာန်ဒေသကိစ္စဇၞော်တံ ကံင်သဳပၞာန် ထပက်ကၠုင်ပၞာန် သၠဲသၠဲလးလးမာဏောင်၊ သီုကဵုပေါဲပၞာန်တံကီု အမိင်ပၞာန် မာယှေဝ်လဝ် ပတေင်ကၠုင်တုဲ ထပ်ကရေပ်ပတိုန် လ္တူညးဍုင်ကွာန်တံ မာန်ရောင်” သာ်ဝွံ သ္ဂးရ။  

ဒၞာဲပွိုင်ဍုင် ဒးဒုင်လလောင်လဝ် ပရေင်အုပ်ဓုပ်ပၞာန်တံဂှ်တှ်ေ နကဵုပရေင်အုပ်ဓုပ် ပရေင်ဂီုကၠီု၊ ပရေင်မၞိဟ်နာနာ၊ ပရေင်သွံရာန်ကူသာန်ဗၞိက်သၟးဟွံက ပရေင်ပလံင်ဗစိုပ်တံဂှ်လေဝ် ပအပ်ကဵုလဝ်အခေါင်ရေင်တၠုင်ဖန်ဖက် ကု သ္ကိုပ်ဌာန်ပၞာန်ကဵု သ္ကိုပ်ဒေသကောပ်ကာဲတံရ။ 

ဗီုဏံကီုရ စပ်ကဵုပရေင်စဳရေင်သၞောဝ်ဓရ်တံဂှ်လေဝ် ပွမပံက်ခၞံရုင်သၞောဝ်ဓဝ်၊ ပံက်ရုင်ခုင်တုဲ စၟဳစၟတ်၊ ဖျေံအမိင်ဂစိုတ်၊ အမိင်ထံင်မွဲအယုက်တံကဵု စဳရေင်ဖျေံအမှုဇၞော်ဇၞော်တံမ္ဂး ပရေင် သွက်ဂွံကလေင် သှ်ခၠေဝ်အမှုဟၟဲဂှ်လေဝ် ကဵုလဝ်စၞောန်ရ။ 

ဒၞာဲဒပ်ပၞာန်ဟၟဲ လလောင်တြးလဝ်ဗီုဏံဂှ်တှ်ေ မွဲသာ်လေဝ်တၟေင်ကၠုင်ဟွံသေင်တုဲ ထပက်ကၠုင်ပၞာန်မ္ဂး ပလေဝ်ပလေတ်လဝ်ရောင် ညးအခေါင်ဟီုဂးနွံ မုက်ဒပ်ဂကူချေင် CNF မပါလုပ်မံင် ကံင်သဳဍုင်ချေင် သလာင်ထက်ဏဳ (ဆလိုင်းထက်နီ) ဟီုကဵု သြင်လောန်တိုင်မ်ရ။

“အေပ္ဍဲဒၞာဲတံဏံ ဒပ်ကံင်သဳပၞာန်တံလေဝ် ဟၟဲမံင်ရတှ်ေ ဍေံတံပတိတ်လိက်လလောင်လေဝ် မွဲသာ်မှ တၟေင်ကၠုင်မာန်ဟွံသေင်၊ ဆၜိုတ်လလောင်တြးလဝ်ရနွံ၊ ဆဂး သွက်ဂွံအုပ်ဓလီုဒၞာဲပိုဲတုဲ မွဲလပါ်ဂှ် ဂစာန်ထပက်ပၞာန်မ္ဂး ဒှ်အာမွဲဗီုမာန်ကီု၊ ဆဂး သွက်ပရေင်တံဏံ ပိုဲတံၜိုတ်သ္ပမာန် ပလေဝ်ပလေတ်လဝ်ရ၊ ဟိုတ်ဂှ်ရ ဆၜိုတ်လလောင်လဝ်တုဲ တၟေင်င်တၟဟ်ဟ် ဘိုအ်ဂွံဒှ်တိုန် ဟၟဲလးလးပုဟ် မိက်ဂွံဟီု” သာ်ဝွံသ္ဂးရ။ 

ကံင်သဳဍုင်ချေင်ကီု သီုကဵုကောဒေံချေင်တံကဵု ဂကောံရပ်လွဟ်ဒေသတံ ဗွဲမဂၠိုင်ထိင်လဝ် တွဵုရးချေင် ၆ ပွိုင်ဍုင်တံကီု၊ ဒၞာဲပွိုင်ဍုင်ပဠက်ဝ (ပလက်ဝ) AA မထိင်ဒဝ်လဝ်တံဂှ် ဒးဒုင်လလောင်တြးလဝ် အကာဲအရာကာမံက်တိုန်ကဵု ပရေင်အုပ်ဓုပ်ပၞာန်ရ။  

ဗီုဏံကီုရ ဒၞာဲ ဒပ်ပၞာန် AA မထိင်ဒဝ်လဝ် ၁၄ ပွိုင် နွံမံင်တွဵုရးရခေင်ဂှ်ကီ ဒၞာဲတွဵုရးသေံသၟဝ်ကျာ ဒပ်တအာင် TNLA ကဵု ဒပ်ကိုဝ်က MNDAA မထိင်လဝ် ပွိုင်ဍုင်တံကဵု ဒၞာဲ ဒပ်ကချေန် KIA ထိင်လဝ် ပွိုင်ဍုင် တွဵုရးကချေင်တံလေဝ် ပါလုပ်မံင်ရောင်။ 

တုဲပၠန် ပ္ဍဲကဵုဒေသလဒေါဝ် သကိုင်၊ မဂွေ၊ ရးမာန်တလေဝ် ဒၞာဲအလဵုအသဳပရေင်ညဳသၟဟ်ကောန်ဂကူ NUG ကဵု ဂကောံရပ်လွဟ်ကောန်ဍုင်အရင်တံ ထိင်လဝ်ပွိုင်ဍုင်တံဂှ် ဗီုပြင်ပရောဒဒှ်တုပ်မံင်ကီုရ။

ညးအခေါင်ဟီုဂးနွံ အလဵုအသဳ NUG ဥူနေဘုင်လာတ် (ဦးနေဘုန်းလတ်) ဂှ် ပရေင်ပေါဲဗတိုက်ဇၞော်တိုန်မာန်တုဲ ဒၞာဲတိဍာ် အလဵုအသဳ NUG အုပ်ဓုပ်လဝ်တံ ပရေင်စဵုဒၞာ ဘဲပၞာန်ကျာ ကဵုဖျုန်တုဲ ကၠောန်ကဵုမံင်ရောင် ဟီုကဵု သြင်လောန်တိုင်မ်ရ။  

“ဂကောံဇြဟတ်ပၠန်ဂတးတံကီု NUG လေဝ်ပါကီုရ၊ အပ္ဍဲတိဍာ်ထိင်ဒဝ်လဝ်ထံ ပွိုင် ၉၀ တ္ရဲဏံ ပေါဲဗတိုက်ပၞာန်ကျာကီု ဒၞာဲပၞာန်ထပက်ဂှ်လေဝ် ထပက်ကၠုင်မာန်ဏောင်၊ ပတဝ်လဝ်ကဵု ညးဍုင်ကွာန်တံတုဲ ပရေင်ကြာန်ဓဇန်နာနာလေဝ် သာတုဲဂၠိုင်တိုန်မာန်ကီုဏောင် သ္ရဳဂၠိပ်လဝ်ရ၊ ဟိုတ်ဂှ်တုဲ ဒၞာဲတိဍာ် NUG ထိင်လဝ်တံ ဆေင်စပ်ကဵုပရေင်တံဏံတုဲ ပိုဲဆဝ်ဗ္ရုဟ်လဝ်ညးဍုင်ကွာန်တံတုဲ ကဵုဖျူန်ကဵုပရေင်စဵုဒၞာဲ ဘဲဒဏ်ပၞာန်ကျာ ရေင်တၠုင်မံင်ရ” သာ်ဝွံ သ္ဂးရ။ 

ဒပ်ပၞာန်ဗၟာဂှ်တှ်ေ ပြဟ်ဟ်ဏံ အလုံကၟိန်ဍုင်မွဲ ၜိုန်ရ ပလီုထောံ အကာဲအရာကာမံက်တိုန်ဍုင်ကီုလေဝ် ပရေင်ခၞံဗဒှ်သၞောဝ်ဥပဒေ၊ ပရေင်အုပ်ဓုပ်ကဵု ပရေင်ပြုပြေင်စဳရေင်သၞောဝ်ဓရ် အဝဵုပိတန်ဏံဂှ် ပ္ဍဲကောံဓရီု ဂျူလာင် ၃၁ ဂှ် ကလေင် ပအာပ်ပြာပ်လဝ်ကု ကံင်သဳပရေင်စဵုဒၞာကဵု ဂီုကၠီုရ။  

မွဲလပါ်ဂှ် ခၞံဗဒှ်လဝ်ကဝ်မယှေန်ဂီုကၠီုဍုင်ကဵု ပရေင်ၜိုဟ်သြိုဟ်သာယာ နကဵုညးပါလုပ်ဂကောံ ၁၀ တၠတုဲ သ္ကိုပ်ပၞာန်ဇၞော် မေန်အံင်လှာင် ကေတ်လဝ်ဒၞာဲ ဥက္ကဌ ပၠန်ရ။ 

ကဝ်မယှေန်ဏံဂှ်တှ်ေ သွက်ဂွံစဵုဒၞာ ပရေင်ဂီုကၠီုကၟိန်ဍုင်ကဵု ပရေင်ၜိုဟ်သြိုဟ်သာယာရာင်ဆာဲတံကီု ညံင်ဂွံကၠောန်ဗဒှ်အာ ပေါဲရုဲမာဲဗွဲမအံင်ဇၞးမာန် သွက်ဂွံပံင်ပစပ်ပညဳပညပ်အာ ဒက်ပတန်လဝ်ရောင် ဂးရ။ 

စနူ ဒဳဇြေမ်ပါ သတ္တဟ တတိယဏံတုဲ အကြာဂျာန်နဝါရဳ သတ္တဟဒုတိယ သၞာံဂတဏံမံက်မ္ဂး ပ္ဍဲကဵုပွိုင်ဍုင် ၂၆၀ ပြင်ဂှ် ကုတ်လဝ်သကုတ်ညးကဵုညးတုဲ ကၠောန်အာ ပေါဲရုဲမာဲ သၞောတ်ၜါဗီုပြင် စုတ်မာဲနကဵု စက် အဳလက်ထရဝ်ဏေတ်ရောင် ဂွံတီရ။ 

ဟိုတ်ဂှ်ရ သွက်ဂွံကၠောန်အာပေါဲရုဲမာဲမာန် သီုကဵုသၠုင်ပတိုန်အသိင်ပၞာန်ကီု နနဲအဓ္ဓမ ပကောံလဝ်ကောန်ပၞာန်တံကီုတုဲ လ္တူညးဍုင်ကွာန်တံဂှ် ဒပ်ပၞာန်ဗၟာတံ ပရေင်ဖံက်ပကဝ်အခေါင်အရာမၞိဟ် သာတုဲ ဘိုအ်ဂွံဂၠိုင်တိုန်ရောင် ဂကောံဇြဟတ်ပၠန်ဂတးတံ ဟီုဂးမံင်အိုတ်ရ။ 

ပရိုင်-သြင်လောန်တိုင်မ်

photo – social media