မတ်မလီု၊ အဝ်ဂတ် ၃
ပ္ဍဲကဵုတွဵုရးဍုင်မန် ဌာန်ဂအုပ်ပၞာန်ရးအဂၞဲဖျေံလဝ်သ္ဇိုင် ဍုင်မတ်မလီုဂှ် ဒုသ္ကိုပ်ရးဌာန်ပၞာန် (ရတခ) ဒုသ္ကိုပ်ပၞာန် ဇြဝ်မေန်အံင် (ဇော်မင်းအောင်) မွဲကရောံ သီကဵု သၞာဲဒါ ၁၅ တၠတံ ဒးဒုင်ရပ်ထိင် စၟဳစၟတ်မံင်ရဂှ် ညးစုက်လုက်တံ ဟီုလဴကဵုလဝ် ဌာန်ပရိုင် သြင်လောန်တိုင်(မ်) ရ။
ထၜးဟိုတ် စလဝ်လာဘ်ဗဇဴ ဗလးကဵုဏာလဝ် ကပေါတ်ဗၞိက်ဟွံလုပ်သၞောဝ်ဂးတုဲ ဒုသ္ကိုပ်ရးကီု သီုကဵုသၞာဲဒါဂမၠိုင်တံဂှ် နူကဵုဂကောံဗဟဵု နူနေဗျဳတဝ် ကၠုင်စိုပ်စၟဳစၟတ်မံင်ဏောင် သ္ဂးရ။
အပ္ဍဲကဵု ညးမဒးဒုင်ရပ်လဝ်တံဂှ် ဒုသ္ကိုပ်ရးအဂၞဲ၊ သ္ကိုပ်က္ဍိုက်ပ်ဌာနအကံက်ခေါန် တွဵုရးကရေင်၊ ဒပ်ဂီုကၠီုသွာင်ပၞာန် တွဵုရးကရေင်၊ ဒပ်ဗၠာဲသၟိင်ဗတိုက်သရိုဟ်ဒုစရိုတ်၊ ဒပ်ပရိုင်ဗၠာဲသၟိင် ကဵု သၞာဲဒါဌာနအကံက်ခေါန်တံ ပါလုပ်ရ။
ရဲဒးဒုင်ရပ်ထိင်လဝ် ဗွဲမဂၠိုင်တံမ္ဂး ဒၞာဲသၞေဟ်ကင်ဂိက်ဒဒန် အကြာတွဵုရးမန်ကဵုကရေင် သၞာဲညးမကေတ်မံင်တာလျိုင်တံကဵု ညးတာလျိုင်အဓိက မကောပ်ကာဲလဝ် ဒၞာဲသၞေဟ်ကင်ဏံရ။
အခိင်ဒုသ္ကိုပ်ရး ဒုသ္ကိုပ်ပၞာန် ဇြဝ်မေန်အံင် ဒးဒုင်ရပ်ထိင်လဝ်ဏံ တာလျိုင်ကမၠောန် စၞးညးတေံဂှ် သ္ကိုပ်ဗဵုဇၞော် ဗညာဝေန် ညးမဒှ်ဂအုပ်ဘာ ဒပ်ပကတ်ပကေင်အဆံင်သၠုင် စၟတ်(၄) မၞုံမံင် ပွိုင်ဍုင်ဇြပ်ဗုဂှ် ဗွဲယာယဳမွဲခဏ ပအပ်ကဵုလဝ်တာလျိုင် ဂွံတီရ။
ပရေင် ဒုသ္ကိုပ်ရး(ရတခ) မွဲကရောံ သၞာဲဒါဂမၠိုင် ဒးဒုင်ရပ်ထိင်လဝ်ဏံဂှ်တှ်ေ အပ္ဍဲကဵုဂျူလာင် ၃၀ တေံ ကၠောန်သ္ပလဝ် ကောံဓရီုပညဳပညပ် ဂကောံပၠတရဴ ကမ္မတဳကမၠောန် ပရေင်ဗတိုက်သရိုဟ်ကၠေံ ကူသာန်သွံရာန် ဟွံလုပ်သၞောဝ်တံဂှ် သၞာဲဒါ ညးမလုပ်ကဵုမံင်ဇြဟတ်တံဂှ် ဒးကေတ်အာအရေဝ်ပိုတ်တ်ရောင် ဒုက္ဍိုပ်သ္ကိုပ်ပၞာန် ဟီုလဝ်ဂလာန်တုဲ ရပ်စပ်စၟဳစၟတ်ပရေင်ဏံဒှ်ကၠုင် သ္ဂးရ။
တုဲကၠုင်အပ္ဍဲဂျူလာင်တေံ ကပေါတ်ဗၞိက်ဍုင်သေံ ဖဍိုက်နင် နူတွဵုရးကရေင် ကွဳစက်လုပ်စိုပ်ကၠုင် တွဵုရးမန် ဗၞတ်ကၠမ်မပြင်င်တံဂှ်လေဝ် ဒးဒုင်ရပ်လဝ်တုဲ ကပေါတ်ဟွံလုပ်သၞောဝ်ဗွဲမဂၠိုင်တံကီု ဒးဒုင်သီဏာ သီုကဵုကွဳစက်ဂမၠိုင်ကီုရ။
ပရိုင်- သြင်လောန်တိုင်(မ်)
Photo – Social Media