ကျံက်ဖျူ- အဝ်ဂတ် ၃
ကဝ်မယှေန်ပၞာန် မကော်ခဴစ ကံင်သဳပရေင်စဵုစၞာကောန်ဂကူကဵု ဂီုကၠီု လလောင်တြးလဝ် အကာဲအရာကာမံက်တိုန်တုဲ ပ္ဍဲကဵုတွဵုရးရခေင် ၁၄ ပွိုင်ဍုင် ရပ်စပ်အာ နကဵုအမိင်ပရေင်အုပ်ဓုပ်ပၞာန်တံဂှ် ဗီုဂပ်ဝ် ကလေင်ပလန်အာတဲရောင် ညးအခေါင်ဟီုဂးနွံ ဒပ် AA ခိုင်သုခ ဟီုလဴကဵုလဝ် ဌာန်ပရုင်သြင်လောန်တိုင်(မ်) ရ။
ပ္ဍဲဂျူလာင် ၃၁ တေံဂှ် ပ္ဍဲရးဒေသဇၞော်ကဵု တွဵုရး ၉ ဒၞာဲ၊ ပွိုင်ဍုင်နွံမံင် ၆၃ ဒၞာဲတံဂှ် ကံင်သဳ ပရေင်စဵုစၞာကောန်ဂကူကဵုဂီုကၠီု လလောင်တြးလဝ် အကာဲအရာကာမံက်တိုန်တုဲ နကဵုအမိင် ပရေင်အုပ်ဓုပ်ပၞာန် ပအပ်ကဵုလဝ်တာလျိုင် ကုဇရေင် သ္ကိုပ်က္ဍိုက်ပၞာန် ဂအုပ်သ္ကိုပ်ပၞာန်ဇၞော် မေန်အံင်လှိုင်ရောင်။
နကဵုအမိင် ပရေင်အုပ်ဓုပ်ပၞာန် အပ္ဍဲကဵုပွိုင်ဍုင်လလောင်တြးလဝ်တံဂှ်တှ်ေ ဒၞာဲဒပ်အာရက္ခ AA မထိင်ချုက်လဝ် ပ္ဍဲကဵုတွဵုးရးရခေင် ပွိုင်ဍုင်သီုဖအိုတ်တံကီု သီုကဵု ဍုင်ပလက်ဝ တွဵုရးချေင်လေဝ် ပါလုပ်ရ၊ တုဲပၠန် သီုကဵု ရးဒေသဇၞော်ကဵု တွဵုရး ၇ ဒၞာဲတံကီုလေဝ် စုတ်လဝ်တုဲ အပံင်ဖအိုတ် ၆၃ ပွိုင်ဍုင်ပါလုပ်မံင်ရ။
ဒေသတံဏံဂှ်တှ်ေ ဒပ်ပၞာန်ဗၟာ ထိင်ဒဝ်လဝ်ပေင်င်ဟွံမာန်ကီု ဒၞာဲဒပ်ကောန်ဍုင်အရင်ညးကဵုညး၊ သီုကဵု ဒှ်မံင်ဒေသ ဂကောံဇြဟတ်ပၠန်ဂတးဂမၠိုင် ထိင်ကြာပ်လဝ်ပေင်င်မာန်တံ ဗွဲမဂၠိုင် ပါလုပ်မံင်ရ။
ညးအခေါင်ဟီုဂးနွံ ဒပ်ပၞာန်အာရက္ခ AA ဥူခိုင်သုခ ဂှ်တှ်ေ ဒၞာဲကံင်သဳပၞာန် ထိင်ဒဝ်ဟွံမာန်တံဏံ လလောင်တြးဏာ ပရေင်အုပ်ဓုပ်ပၞာန်ဟီုဂှ် သိက္ခာဍေံတံ ၜိုတ်လဵုစှ်ေမံင်ရောဟီုဂှ် ထမံက်ထၜးကဵုမံင်တုဲ ပရေင်ဘပလညးဍုင်ကွာန်တံအိုဿီုတံဂှ် မင်ရံင်အာမံင်ရောင် ဟီုရ။
ပြဟ်ဟ်ဏံ အပ္ဍဲတွဵုရးရခေင်ဂှ် ကဝ်မယှန်ပၞာန်တံ ဆၜိုတ်ဍုင် သေတ်တွိုယ်(စစ်တွေ) ကဵု တာန်တဲ (သံတွဲ) ဟေင် ထိင်ဒဝ်လဝ်မာန်လဝ်ဏီ၊ ဒၞာဲကိုန်အစဳဇန်ကြုက်နွံဂၠိုင်အိုတ် ပ္ဍဲပွိုင်ဍုင်ကျံက်ဖျူ ဒၞာဲဗွဲမဂၠိုင်တံဂှ် AA ထိင်ကြာပ်လဝ်တုဲ ဒပ်ပၞာန်ဗၟာ သွက်ဂွံကလေင်ထပက်ပၞာန် ထပ်ပပေင်မံင်ဇြဟတ်မာန်ရောင် ဌာန်ပရိုင်ဒေသတံ ချူမံင်ရ။
ကံင်သဳ ပရေင်စဵုစၞာကောန်ဂကူကဵုဂီုကၠီု ဂှ်တှ်ေ သွက်ဂွံဗတိုက်သရိုဟ်ကၠေံ ပရေင်ရပ်လွဟ်ပကီုပရာတ်တံကဵု ဒေသညံင်သ္ဂောံညိင်ဝပ်၊ ပရေင်အုပ်လဒမ်သၞောဝ်ဓရ် ညံင်ဂွံစိုပ်တရဴ ထၜးလဝ်ဟိုတ်တုဲ စၟတ်ပိုင်ခြာလဝ် ပွိုင် ၉၀ တ္ရဲ သ္ဂးရ။
ဟိုတ်ဂှ်ရ နူကဵုရုင်သ္ကိုပ်က္ဍိုက်ပ်ပရေင်စဵုဒၞာဒပ်ပၞာန် လလောင်တြးလဝ် ဒၞာဲပွိုင်ဍုင်ပရေင်အုပ်ဓုပ်ပၞာန် သီုဖအိုတ်တံဂှ် ဆက်ပအပ်ကဵုလဝ် အဝဵုအာဏာ ကုဇရေင် သ္ကိုပ်ရးဌာန်ဂအုပ်ပၞာန် မဆေင်စပ်တံပၠန် သာ်ဝွံ လလောင်တြးလဝ် ပ္ဍဲဂျူလာင် ၃၁ တေံရ။
မွဲလပါ်ပၠန် ဒက်ပတန်ဏာလဝ် ကဝ်မယှေန်ပၞာန် ညးမပါလုပ်ဂကောံ ၁၀ တၠ မကော်ခဴစ ကံင်သဳပရေင်စဵုစၞာကောန်ဂကူကဵု ဂီုကၠီုဂှ်လေဝ် နဒဒှ် သမ္မတယာယဳ ဂအုပ်သ္ကိုပ်ပၞာန်ဇၞော် မေန်အံင်လှိုင်ရ ဒှ်မံင်ဥက္ကဌ ပၠန်။
သွက်စဵုဒၞာပရေင်ဍုင်နိဂီု ပရင်ဂီုကၠီုကဵု ပရေင်ၜိုဟ်သြိုဟ်သာယာတံကီု သွက်ဂွံကၠောန်ဗဒှ်အာ ပေါဲရုဲမာဲ ဗွဲမအံင်ဇၞးမာန် တင်နင် မ္ဒးစၞောန်ပညုင်နာနာတံကဵု ပရေင်ကမၠောန် သွက်ဂွံပံင်ပစပ်ရေင်တၠုင်အာ ဒက်ပတန်လဝ် ကဝ်မယှေန်ပၞာန်ဏံရောင် သ္ဂးရ။
ယူနဳဖံင် ကယျိုင်ကောန်ပၞာန်ကဝက်၊ ကယျိုင်ကောန်ကွာန်ကဝက် ဆၜိုတ်ၜးသၠာဲဏာဂှ် မူဝါဒ ပွမကြာန်ဓဇန် ဒပ်ပၞာန်ဗၟာတံ ညိလေဝ်ပရေင် အပြံင်အသၠာဲဟၟဲလးလးရောင် ဥူးခိုင်သုခ ဟီုရ။
ပြဟ်ဟ်ဏံ အကာဲအရာကာမံက်တိုန် နိဂီုဍုင်ဂှ် ဒပ်ပၞာန်ပလီုထောံတုဲ စပ်ကဵုပရေင် ဒက်ပတန်သၞောဝ်ဥပဒေ၊ ပရေင်အုပ်ဓုပ်ကဵု ပရေင်ပြုပြေင်စဳရေင်သၞောဝ် မပ္တံကဵုအဝဵုတံဏံဂှ် ပလေင်ပအပ်ကဵုလဝ် ကံင်သဳပရေင်စဵုစၞာကောန်ဂကူကဵုဂီုကၠီု ပၠန်ရ။
ကာလမကၠုင်စိုပ် အပ္ဍဲကဵုဒဳဇြေမ်ပါ တတိယသတ္တဟ- အကြာဂျာန်နဝါရဳ ဒုတိယသတ္တဟ သၞာံဂတးတေံမ္ဂး ပ္ဍဲ ၂၆၀ ပွိုင်ဍုင်ပြင်င်ဂှ် စကာစက်ကဵုမာဲအဳလက်ထရဝ်ဏေတ်တံတုဲ ပေါဲရုဲမာဲ ဒေသသကုတ်ညးကဵုညး ကုတ်ပိုင်ခြာ ကၠောန်ဗဒှ်အာရောင် ကဝ်မယှေန်ပၞာန် လလောင်တြးလဝ်နွံရ။
ပရိုင်- သြင်လောန်တိုင်(မ်)
photo – AA