နေဗျဳတဝ်၊ အဝ်ဂတ်(၃)
အဝဵုပိတန် မဒုင်ပြာပ်သၠောဲပအပ်ကဵုလဝ် ကံင်သဳပရေင်စဵုစၞာကောန်ဂကူကဵု ဂီုကၠီုဂှ် ဆက်လလောင်တြး ဥပဒေပလေဝ်လဝ်တံဂှ်တုဲ ညးတန်တဴမံင် အပ္ဍဲနိဂီုဍုင်သီုဖအိုတ်တံ ညံင်ဂွံမင်မွဲအာသၞောဝ်ဥပဒေတံဂှ် သ္ကိုပ်ဝန်ဇၞော် ကဝ်မယှေန်ပၞာန် ကဵုဏာသတိရ။
ကံင်သဳပရေင်စဵုစၞာကောန်ဂကူကဵုဂီုကၠီုဂှ် ဆက်ဒက်ပတန်အာ ဂကောံအလဵုအသဳကၟိန်ဍုင်တုဲ ပ္ဍဲအဝ်ဂတ် ၁ ကာလကၠောန်ဗဒှ်ဏာ ကောံဓရီုအလန်ပထမဂှ် သ္ကိုပ်ဝန်ဇၞော် ဥူညိုဝ်သဝ် ဟီုဂးလဝ် သ္ဂးရ။
ညးမတန်တဴမံင်အပ္ဍဲ နိဂီုဍုင်သီုဖအိုတ်တံဝွံ ပရေင်ကမၠောန် ဗၠေတ်ဗၠေင်ဒစေင်ဝေင်အာ နူကဵုဂၠံင်တရဴ ဒဳမဝ်ကရေသဳတံဂှ် မဒးဝေင်ပါဲအာရောင်ဒှ်တုဲ နကဵုသ္ဇိုင်သၞောဝ်ဥပဒေ မတန်ကြန်မံင်ပကတိလၟုဟ်တံဂှ် စွံအဲပရဲတုဲ ညံင်ဂွံမင်မွဲဒဂေတ်ဗက်အိုတ်ညိဂှ် ဟီုဏာရ။
ကံင်သဳပၞာန်ဝွံ ပလီုကၠေံထောံ အကာဲအရာကာမံက်တိုန် အလုံကၟိုန်ဂှ်တုဲ စပ်ကဵု ပရေင်ချူခၞံသၞောဝ်ဥပဒေ၊ ပရေင်အုပ်ဓုပ်ကဵု ပရေင်ပြုပြေင်စဳရေင်သၞောဝ်ဓရ် မပ္တံအဝဵုပိတန်ဏံဂှ် ပ္ဍဲကဵုဂျူလိုင် ၃၁ တေံ ကလေင်သၠောဲပအပ်ကဵုဏာလဝ် ကံင်သဳပရေင်စဵုစၞာကောန်ဂကူကဵု ဂီုကၠီုပၠန်ရ။
ကံင်သဳပရေင်စဵုစၞာကောန်ဂကူကဵု ဂီုကၠီုပၠန်လေဝ် မွဲတုဲမွဲ ကလေင်ပလေဝ်သၞောဝ်ဥပဒေနာနာတုဲ ထပ်ဆက်လလောင် ပတိတ်ဏာလဝ်အမိင် အဝဵုအာဏာတန်ကြန် ညံင်ရဴသၞောဝ်ဥပဒေနာနာ ပ္ဍဲအဝ်ဂတ်(၁) ဂှ်ပၠန်ရ။
အပ္ဍဲဏံမ္ဂး နကဵုဘာသာဗၟာကော်ခဴစ “နိုင်လွတ်လုံ” သၞောဝ်ဥပဒေ စပ်ကဵုပရေင်စဵုဒၞာ ပွမသၠးပွး ကေုာံ ပရေင်စဵုဒၞာပူဂဵုတံဂှ်လေဝ် စကာသ္ဇိုင်သၞောဝ်ဥပဒေ ၝောံပိုဒ် ၄၂၇ တုဲ ကလေင်ချူပလေဝ်လဝ်နွံရ။ အပ္ဍဲကဵု ဥပဒေကလေင်ပလေဝ်လဝ်ဏံဂှ် သ္ပလဝ်အစာံကဵု ၝောံပိုဒ် ၃၈၂ တုဲ ၝောံပိုဒ် စဵုဒၞာကဵုလဝ် ပရေင်သၠးပွးကဵု ဂီုကၠီု သွက်ကောန်ညးဍုင်ကွာန်တံ မပ္တမ်ကဵု ၝောံပိုဒ် ၅၊ ၝောံပိုဒ် ၇ ကဵု ၝောံပိုဒ် ၈ တံဂှ် ကလေင်ပလှ်ပတိတ်ထောံလဝ်ရောင် ဂွံတီရ။
ဟိုတ်နူတင်နင်တံဏံဂှ်တုဲ ပ္ဍဲသ္ရိဌာန်၊ ခဒမ်၊ စမြိုင်ဒၞာဲ ယြဴပူဂဵုမွဲလဵုဟွံဟီု ညးတာလျိုင်တံ ဟွံဒးကေတ်သက်သဳမွဲသာ် နကဵုဥပဒေဏံ စကာအတိုင်ပၟိက်စိုတ်တုဲ လုပ်ဂၠိုက်ဂၠာဲ စၟဳစၟတ်မာန်ရောင် ဂွံတီရ။
တုဲပၠန် ဟွံဒးအာတ်အခေါင်နူရုင်သၞောဝ်ဓရ်ကီုလေဝ် အခေါင်ရပ်ထိင်ချုက်လဝ်မၞိဟ်မွဲမွဲ ၜက်အာပွိုင် ၂၄ နာဍဳဂွံကီု၊ လိက်ဝရာန်ဟၟဲကီုလေဝ် လ္တူကောန်ညးဍုင်ကွာန်မွဲမွဲ လုပ်ဂၠိုက်ဂၠာဲ စၟဳစၟတ်ရပ်စပ်မာန်၊ ထံင်ပရိုင်မာန်၊ ကြတ်ကလင်မာန်၊ အာတ်တင်နင်မာန်ကဵု သီကေတ်ကပေါတ်၊ ပလီုပလာ်ထောံမာန်တံဂှ် သဘဴညံင်ရဴပံက်ကဵုလဝ် အခေါင်နွံရ။
ဥပဒေတံဏံဝွံ နကဵုသ္ဇိုင်သၞောဝ်ဥပဒေပရေင်အုပ်ဓုပ်ဍုင် အခိင်ကၠတ်ထဝ်ဟၟဲဏီဗီုလၟုဟ်ဏံ ကံင်သဳပရေင်စဵုစၞာကောန်ဂကူကဵု ဂီုကၠီုတံ စကာရပ်စပ်အာ ပရေင်ချူခၞံသၞောဝ်ဥပဒေ၊ ပရေင်အုပ်ဓုပ်ကဵု ပရေင်ပြုပြေင်စဳရေင်သၞောဝ်ဓရ် အကြာကာလဏံပေင်င်ဂှ် ဒးသမ္တီစၟတ်လဝ်ရောင် သ္ဂးရ။
ညးဍုင်ကွာန် မတန်တဴမံင် အပ္ဍဲဍုင်ဗမာအခိင်ဏံဂှ် စပ်ကဵု ပရေင်သၠးၜးပူဂဵုကဵု ပရေင်ဂီုကၠီု ဆေင်စပ်ကဵု ပူဂဵုတံမ္ဂး အတိုင်သၞောဝ်ဥပဒေ ချူခၞံလဝ်တေံ ဟွံကေင်ဂွံလဝ် ပရေင်စဵုဒၞာဟီုဂှ် စိုပ်အခိင်လၟုဟ်မှ ဟွံသေင်ဏီ။
စနူဒပ်ပၞာန်ဗၟာ သီကေတ်လဝ်အဝဵုဍုင် သၞာံ ၂၀၂၁ ဂိတု ဖေဖဝ်ဝါရဳတေံဂှ်ရ နကဵုကံင်သဳပၞာန် ပလေဝ်ကၠုင်လဝ်သၞောဝ်ဥပဒေ ဗီုတံဏံရတုဲ အခိင်လၟုဟ်တှ်ေ ကံင်သဳပရေင်စဵုစၞာကောန်ဂကူကဵု ဂီုကၠီုဂှ် ဆက်ကၠောန်အာ တာလျိုင်ပၠန်။
အပ္ဍဲကၞောတ်ဂိတုဂျူလိုင်ဂှ်ရ ဥပဒေ သွက်ဂွံစဵုဒၞာ ပွမပလီုပလာ်ဘပဠ ပေါဲရုဲမာဲ သၞောတ်ဗော်ဇဳတံဂှ် ကံင်သဳပၞာန် ချူခၞံတုဲ ဥပဒေပရေင်ဂီုကၠီုသိုက်ဖာ(ဆိုက်ဘာ) ဂှ်လေဝ် ပ္ဍဲဂျူလိုင် ၃၀ ပၠုပ်လဝ်လမျီုနွံရ။
ဥပဒေခၞံဗဒှ်လဝ်တံဏံဂှ် ယဝ်ရ ပလီုပလာ်ထောံ ၝောံပိုဒ်ကီုဒှ် ဒဵုကဵုမၞိဟ်ချိုတ်အာကီုဒှ် ဗွဲမအောန်အိုတ်ဂှ် စၟတ်လဝ်ဒဏ်ထံင်နူမွဲဂိတု ဒဏ်သြန်ကီု၊ ဒဏ်ထံင်သၞာံဇမၠိင်ကီု အမိင်ကာဂစိုတ်ကီု ဖျေံအာဒဏ်မာန်ရောင်နွံမံင်တုဲ သွက်ညးတန်တဴမံင်အပ္ဍဲဍုင်နိဂီုတံ ပြဟ်ဟ်ဏံ မံင်စကြေပ်မံင်ရောင် ဂွံတီရ။
လ္တူဥပဒေဗီုဗီုဏံ နွံမံင်တံဂှ် ညးမပြံင်ကၠုင်နူဘဝကောန်ပၞာန် သ္ကိုပ်ဝန်ဇၞော်တၟိ ဥူညိုဝ်သဝ် ဟီုဂးကဵုဏာလဝ်သတိ ပရေင်ကမၠောန် ဗၠေတ်ဗၠေင်ဒစေင်ဝေင်အာ နူကဵုဂၠံင်တရဴ ဒဳမဝ်ကရေသဳတံဂှ် ညံင်ဂွံဝေင်ပါဲအာဂးတုဲ နကဵုသ္ဇိုင်သၞောဝ်ဥပဒေ တန်ကြန်မံင် ပကတိလၟုဟ်တံဏံ စွံအဲပရဲတုဲ ညံင်ဂွံမင်မွဲဒဂေတ်ဗက်အာညိဂှ် သ္ဂးလဝ်ရ။
ပရိုင်- သြင်လောန်တိုင်(မ်)
photo – MOI