ဝါယှေန်တန်၊ အဝ်ဂတ် (၃)
သမ္မတရတ်ယှတြေံ ဒဳမဳထရဳ မက်ဗဳဒေံဗ် ပွမဟီုဂးဂၠာဲမံင်သၞဂှ်ရ နကဵုဗီုပြင်ကလေင်ပလန်ဏာ ၜင်ဗၠိုပ်ဍာ် နျူကလဳယာ ၂ မဂှ် ဒၞာဲဒေသဒးရ သွက်ဂွံပြံင်ပဆုဲဏာ သမ္မတအမေရိကာန် ဒဝ်နေဝ်ထရ ကဵုဏာစၞောန်ပၟိင်ရ။
ပွမဟီုဂးမံင် ကြာန်ကြအ်ဂၠုဓီု၊ ဂလာန်ဂၠာဲသၞ အရေဝ်လောန်ၜက်ကာဲမံင်တုဲ အကာဲအရာပဵုတိုန်ကၠုင်မာန်တံဂှ် တော်ဆကဵုဏာလဝ် စၞောန်ပၟိင်ရဂှ် သမ္မတ ထရ ဟီုရ။
“မအရေဝ်တံဂှ် ကိစ္စဇၞော်ကွေံကွေံဏောင်၊ လဆောဝ်လဆောဝ် ပွမဟွံရန်တၟံလဝ်တံ တောဲပါကၠုင်မာန်တုဲ ပတဝ်အာကဵု ပြဿနာတံမာန်ရောင်” သာ်ဝွံ ထရ သ္ဂးလဝ်ရ။
ဒၞာဲပြံင်ပဆုဲစွံလဝ် ၜင်ဗၠိုပ်ဍာ်အမေရိကာန် ၂ မဂှ် ဟွံဟီုလဴပတိတ်ကီုလေဝ် အတိုင်လၟေင်ကမၠောန်ဒပ်ပၞာန် ညံင်ဂွံရေင်တၠုင်အာ ကဵုလဝ်စၞောန်ပညုင်ရောင် ညးတေံဟီုရ။
အကြာပွိုင် ၁၀ တ္ရဲကဵု ၁၂ တ္ရဲဏံ ပေါဲပၞာန်ယူခရုင် ဟွံဒေါအ်ထောံမ္ဂး ဒးဆဵုဂဗကဵု ပရေင်ကေတ်အရေဝ် ဇၞော်ကဵုဇြဟတ်ဏောင် အတိုင်ထရ ကဵုလဝ် ရာဇာသာန်ဂှ် သမ္မတရတ်ယှတြေံ ဒဳမဳထရဳ မက်ဗဳဒေံဗ် ကလေင်ဟီုဘပဠဏာ အမေရိကာန်ရ။
ရတ်ယှကဵု အမေရိကာန်တံဂှ် ဒှ်ဍုင်မပိုင်ပြဳလဝ် လွဟ်လက်နက် နျူကလဳယာ အပ္ဍဲဂၠးကဝ်ဏံ ဂၠိုင်အိုတ်တုဲ ဂကောံၜင်ဗၠိုပ်ဍာ် နျူကလဳယာဂမၠိုင် နွံမံင်သီုၜါဍုင်ရောင်။
ဒုဥက္ကဌ ကံင်သဳပရေင်ဂီုကၠီု ရတ်ယှဖိတ်ဒရေယှေန် ဒဳမဳထရဳ မက်ဗဳဒေံဗ် ဟိုတ်နူဟီုဂးဂၠာဲမံင်သၞဂှ်ရ ၜင်ဗၠိုပ်ဍာ် ၂ မ ဗဂပ်လဝ်လွဟ်နျူကလဳယာတံဂှ် မ္ဒးဆုဲပြံင်စွံအာ ဒၞာဲဒေသဒးရ စၞောန်ပညုင်လဝ်ရောင် ထရ ချူပတိုန်လဝ် ပ္ဍဲမုက်လိက်မဳဒဳယာပရေင်မၞိဟ် ညးတေံရ။
ၜင်ဗၠိုပ်ဍာ် စကာဓါတ်လလဳ နျူကလဳယာ သာ်ဂှ်ဟွံသေင် ၜင်ဗၠိုပ်ဍာ် ဗဂပ်လွဟ် နျူကလဳယာ ပြံင်ပဆုဲစွံလဝ်ဒၞာဲလဵု ထရ ဟွံထမံက်လဝ်ရောင်။
စပ်ကဵုပရေင်ကိစ္စဏံတုဲ နူကဵုနန်ခရေင်မလေန် သမ္မတရတ်ယှ ဟွံဟီုမွဲသာ်ပတိတ်လဝ်ကီုလေဝ် အရေဝ်ထရ မံက်တိုန်ကၠုင်ဗီုဏံတုဲ ဂအာင်ဖျာ သတံက်ယှေဝ်ယာ ဍုင်မဝ်သကိုဝ် အနှေန်သြန်စှ်ေအာ ဗွဲမဂၠိုင်ရ။
ထရကဵု ဒဳမဳထရဳ မက်ဗဳဒေံဗ် အကြာဏံ ပေါဲဗတိုက်ပါ်ပါဲပရေင်ပူဂဵု လ္တူမဳဒဳယာပရေင်မၞိဟ် ပဵုတုဲဂၠိုင်တိုန်မံင် ဟဂှ်ရောင်။
ပေါဲပၞာန်ယူခရုင် ညံင်ဂွံပတုဲထောံ ထရကဵုလဝ်ရာဇာသာန်ကီုလေဝ် သမ္မတရတ်ယှ ပူတေန် လကျှ်န် ဗီုပြင်ဗက်ကၠောန်မံင် ဟွံဆဵုဏီတုဲ ထပ်သၠုင်အသိင် ဗတိုက်မံင် ဍုင်ယူခရုင်ဖိုအ်ရ။
Ref:BBC