ဂၠုဲပၞာန် ၂၀ ပြင် KNU ကလေင်ပလံင်ဖျဴဇြဲပန်တၞံ- အဝ်ဂတ် ၅ 

အပ္ဍဲကဵုတိဍာ် KNU ခရိုင်ဇြဲပန်တၞံ (ညောင်လေးပင်) ရပ်ဂွံလဝ် ဂၠုဲပၞာန်တံဂှ် ကလေင်ပလံင်ဖျဴကဵု ဌာန်ဇာတိ မဆေင်စပ်တံတုဲ  ရဲဟွံမက်ကလေင်စဴတံဂှ် ဖန်ဂၠာဲကဵုကမၠောန် ဒးဆက်ထိင်စွံလဝ်ရဂှ် ဌာန်ဂအုပ်ဗဟဵု KNU လလောင်တြးလဝ်ရ။ 

လောန်ကၠုင် ဂျောန် ၂၅ တေံ ပ္ဍဲကဵုကွာန်တံင်သု (တောင်စုရွာ) ပွိုင်ဍုင်မုင် KNU ဂှ် ကရောင်ပၞာန် ကံင်သဳပၞာန် အဃောလုပ်ဖျေံလဝ်သ္ဇိုင် ပ္ဍဲကွာန်ဂှ် ဒပ်ပၞာန်ဗၠးၜးကောန်ဂကူကရေင် KNLA ကဵု ဒပ်ပံင်ကောံတံ လုပ်ဗတိုက်တုဲ ရပ်ဂွံလဝ် မကမ်လွဟ်ဗွဲမဂၠိုင်ကဵု ဂၠုဲပၞာန် ၂၃ တၠရ။ 

မွဲတ္ရဲဓဝ်ဂှ် ပ္ဍဲကဵု ပွိုင်ဍုင်ကျံက်ကျဳ (ကျောက်ကြီး) ကွာန်တဝ်ဝိ  (တော်ဝိကျေးရွာ) ၜါလပါ် ဒှ်ပေါဲဗတိုက်တုဲ ဒပ် KNLA ပံင်တောဲတံ ထပ်ရပ်သီဂွံဏာ လွဟ်မကမ်တံကဵု  ဂၠုဲပၞာန် ၃ တၠရ။ 

ဒဒှ်ရ ရပ်ဂွံလဝ်ဂၠုဲပၞာန် ရဲဒပ်ကံင်သဳပၞာန် ၂၆ တံဂှ် နကဵုစေဝ်ပၞောန် ဥပဒေပၞာန်ဟေင် ပအပ်စွံလဝ် ဒၞာဲတမ်ဒပ် KNLA ၉ ဂှ်ထိင်စွံလဝ်တုဲ ရဲမိက်ဂွံစဴဌာန်ညးတံမ္ဂး ကလေင်ပလံင်ဖျဴကဵုဏာ၊ နကဵုပရေင်ဂီုကၠီု လ္ရဵုစဴသ္ရိဟွံဂွံလေဝ်နွံ  သွက်ရဲဟွံမိက်ကလေင်စဴ ဌာန်ဇာတိညးတံဂှ် ဗက်ဂၠာဲဖန်ဇန်ကဵုကမၠောန် မင်မွဲရံင်စံင်ကဵုလဝ် ခိုဟ်ဟ်ရဂှ် ဗဟဵု KNU သ္ဂးရ။ 

ဂၠုဲပၞာန်ကံင်သဳပၞာန် ဒးဒုင်ရပ်လဝ်ဗွဲမဂၠိုင်တံဂှ် ရဲဒးဒုင်ကံက်စုတ်လဝ် ပရေင်လုပ်ယိုက်ဂၠေင်ဝန်ပၞာန် နနဲအဓ္ဓမ တံကီု၊ လ္ရဵုတံပၠန် အယုက်ပၞာန်ပေင်တုဲ ရဲဟွံမိက်ယိုက်ဂၠေင် ပရေင်ပၞာန်တံဂှ်လေဝ် ပါလုပ်မံင်ကီုရဂှ် အပ္ဍဲကဵု လိက်လလောင်တြး ဗဟဵု KNU ချူလဝ်ရ။   

နကဵု ဗော်သွးကောန်ဂကူကရေင် KNU ရပ်ဂွံလဝ် ဂၠုဲပၞာန်တံဏံဂှ် မင်မွဲရံင်စံင် စွံလဝ်ခိုဟ်ဟ်ကီုလေဝ် အပ္ဍဲကဵု ဇာဖိုင်ပရေင်မၞိဟ် ကံင်သဳပၞာန်တံ တြးမံင်ဝါဒပရိုင်ဗၠေတ်တ်နွံမံင်ဂှ်ရ ညံင်ဂွံစွံသတိမာန် KNU ဗဟဵု လလောင်တြးလဝ်ရ။  

ပရိုင်- သြင်လောန်တိုင်(မ်) 

photo – KNU