မတ်မလီု အဝ်ဂတ် ၉
ပေါဲရုဲမာဲပတောအ် ပၞာန်သီလဝ်အဝဵု သ္ပသ္ကိုပ်သ္က သွက်ဂွံကၠောန်အာဂှ် ညးဍုင်ကွာန်မန်တံ လ္ပပါလုပ် ညံင်ဂွံဒစဵုးဒစးအာဂှ် ပ္ဍဲကဵုတ္ရဲပၠန်ဂတး ၇၈ ဝါဏံ ဇြဟတ်ပၠန်ဂတးမန်တံ ဖတိုက်ဖအောဝ်လဝ်ရ။
ဇြဟတ်ပၠန်ဂတးမန် မပ္တမ်ကု ဖိတ်ဒရေဝ်ကံင်သဳဍုင်မန် MSFC၊ ဗော်ဍုင်မန်တၟိ AD/ ဒပ်ပၞာန်မန်ရာမည ကဵု ဒပ်စဵုဒၞာဍုင်မန် MSDF တံ ပ္ဍဲကဵုအဝ်ဂတ် ၈ ဂှ် လိက်လလောင်တြး ညးကဵုညး လလောင်ပတိတ်လဝ်ရ။
ဒပ်ပၞာန်ဗၟာဝွံ နကဵုသၞောတ်တၠအဝဵုပၞာန် သွက်ဂွံဆက်အုပ်ဓုပ်အာ ကၟိန်ဍုင်မာန် ကၠောန်ဗ္ဒျ်ကဵု ပေါဲရုဲမာဲပတောအ်ဟီုဂှ် သွက်ဂွံဇမၠိင် အယုက်တၠအဝဵုပရမ်တံဂှ်ရ ဒှ်တုဲ ညးဍုင်ကွာန်မန်တံ ညံင်ဟွံဂွံပါလုပ်ပံင်တောဲအာဂှ် ဖိတ်ဒရေဝ်ကံင်သဳဍုင်မန် ဖတိုက်ဖအောဝ်လဝ်ရ။
ပေါဲရုဲမာဲ မကၠောန်လဝ် နကဵုသ္ဇိုင်သၞောဝ်ပရေင်အုပ်ဓုပ်ဍုင် ၂၀၀၈ တံဂှ်တှ်ေ နကဵုဒပ်ပၞာန် ဇၞော်ကဵုဇြဟတ် ညံင်ဂွံအုပ်ဓလီုလဝ် အဝဵုဍုင်မွဲဒှ်မံင်တုဲ ကဏ္ဍအခန် ဗော်ပရေင်ဍုင်ကွာန်ကဵု ညးဍုင်ကွာန်တံဂှ် မွဲသာ်မှ ဒှ်ကၠုင်ဟွံမာန်ပုဟ် သာ်ဝွံ ညးအခေါင်ဟီုဂးနွံ နာဲမန်သာင် MSFC ဟီုကဵုဌာန်ပရိုင် သြင်လောန်တိုင်မ်ရ။
“ပေါဲရုဲမာဲ ကၠောန်သၟဝ် သၞောဝ် ၂၀၀၈ တံဂှ် ဗွဲကြဴတှ်ေ ဒပ်ပၞာန် သွက်ဂွံအုပ်ဓလီု အဝဵုဍုင် ဇၞော်ကဵုဇြဟတ်ရောင်၊ အခန်ကဏ္ဍဗော်ပရေင်ဍုင်ကွာန်ကီု၊ အခန်ကဏ္ဍညးဍုင်ကွာန်မန်တံကီု မုလေဝ်ပါကၠုင် ဟွံသေင်၊ တုဲပၠန် နကဵုဗော်ပရေင်ဍုင်ကွာန်မန်ပိုဲ ကောန်ဂကူမန်ပိုဲ အတိုင်မရန်တၟံလဝ် အခေါင်မပိုင်ပြဳကုဇကု ကိစ္စအရာဂွံဒက်ပတန်ဍုင်မန်ပိုဲတံ ဒှ်ကၠုင်မွဲဝါမာန်ဏောင်ဂှ် ဆလအ်မှ ပိုဲတံ ဟွံပတေဟ်လဝ်ပုဟ်” သ္ဂးရ။
ပြဟ်ဟ်ဏံ ဒပ်ပၞာန်သီလဝ်အဝဵုတံ ဟိုတ်နူရပ်ကေတ်မံင်သၟတ်မန်တံ ဟၟဲကဵု ဗဗွဲသၞောဝ်တုဲ ပကောံကေတ်မံင် ကောန်ပၞာန်တၟိတံဂှ်ရ အလုံညးဍုင်ကွာန်မန်တံ သီုဖအိုတ် ဒးဆဵုဂဗမံင်ကဵု ဒဒိုက်ဘဲဒဏ်တံဏောင် ကံင်သဳဖိတ်ဒရေဝ်ဍုင်မန် သ္ဂးရ။
ပ္ဍဲကဵုတွဵုရးမန် ပွိုင်ဍုင်လ္ရဵုတံမ္ဂး နူကဵုဂကောံပရေင်အုပ်ဓုပ် အရာပ်၊ ကွာန် ကဝ်မယှေန်ပၞာန် မထိင်လဝ်တံ ကုသၟတ်အဝဲလုပ်အဝေါင် ယိုက်ဝန်ပၞာန်တံဂှ် စနူအဝ်ဂတ် ၁ စပလံင်ဗစိုပ်မံင် လိက်ရုင်ကော်ယျဂှ် ညးဒေသတံ ဟီုလဴကဵု ဌာန်ပရိုင်သြင်လောန်တိုင်မ်ရ။
နကဵု သၟတ်ညးမဂွံဒုင်လဝ်တဲ လိက်ရုင်ကော်တံဝွံ မ္ဒးအာပလံင်ပရိုင် ကုဇရေင် ရုင်ပွိုင်ဍုင် ဌာနသ္ကိုပ်သ္ကပရေင်အုပ်ဓုပ်နာနာ မဒှ်တုဲ ယဝ်ရဟွံပလံင်ပရိုင်မ္ဂး ဒးဒုင်ကေတ်အာအရေဝ် နကဵုသၞောဝ်ဥပဒေ အရာယိုက်ဂၠေင်ဝန်ပၞာန်ရောင် ပ္ဍဲလိက်ရုင်ကော်ဂှ် ချူလဝ်ရ။
မွဲလပါ်ဂှ်လေဝ် သွက်ဂွံထပက်အဇာ ယိုက်ဝန်ပၞာန်ဂးတုဲ ပ္ဍဲကဵုပွိုင်ဍုင်လ္ရဵုလ္ရဵု ဂကောံပရေင်အုပ်ဓုပ်အရာပ် ပွိုင်ဍုင်တံဂှ် ဗက်ကံက်ကေတ်မံင်သြန်လၟေင်ဂိတု မွဲသ္ရိဂၠိုင်နူကဵုမွဲဠက်ဒကေဝ် နွံမံင်ပၠန်ရောင်။
ဟိုတ်ဂှ်ရ နကဵုသၟတ်မန်တံဝွံ ညးမတာဒၞာလဝ်အနာဂတ်ပိုဲ ကုဂကောံပၞာန်ဏံဂှ် သွက်ဂွံဗတိုက်သရိုဟ် ဖါဲကၠေံပတိတ်ဏာမာန် ပံင်တောဲအာကဵု ဂကောံပၠန်ဂတး အပ္ဍဲဍုင်မန်တံတုဲ သွက်ဂွံတဝ်စၞေဟ်အာ ကုဒပ်ပၞာန်ဗၟာ မွဲကရောံဂှ် ကံင်သဳဖိတ်ဒရေဝ်ဍုင်မန် ဖတိုက်ဖအောဝ်လဝ်ရ။
လ္တူသၟတ်လုပ်ယိုက်ဂၠေင် ပရေင်ပၠန်ဂတး ဟွံမာန်တံဂှ်လေဝ် အပ္ဍဲကဵုဒၞာဲတိဍာ်ညးတံ ချဳဒရာင်မံင်ဂှ် အခေါင်အရာပရေင်ပညာ ညံင်ဟွံဂွံဆေင်လေင်အာ ၜိုတ်သ္ပမာန် ဘိုင်ရီုဗင်ကဵုလဝ်အထံက်ပင်နွံကီု ယဝ်ရမိက်ဂွံပါဲဓလေတ် ပရေင်ယိုက်ဂၠေင်ဝန်ပၞာန် မွဲချိုန်ခဏ မိက်ဂွံဗ္ဒဗ္ဒါဲတှ်ေလေဝ် ကေတ်အဆက်မာန်ရောင် နာဲမန်သာင် ဟီုရ။
“ယဝ်ရ လုပ်ကၠောန်ပ္ဍဲဂတးဟွံမာန်ပုဟ်၊ သၟတ်လ္ရဵုတံ အဝဲဍောတ်မံင်ဏီတှ်ေ သွက်အခေါင်အရာ ပရေင်ပညာဍေံဂှ်လေဝ် လပါ်တိဍာ်ပၠန်ဂတး ပိုဲနွံမံင်ဏံ မိက်ဂွံလုပ်ဗ္ဒဗ္ဒာဲတှ်ေ ၜိုတ်သ္ပမာန် ပိုဲတံဘိုင်ရီုဗင်ကဵုလဝ်နွံမံင်၊ သာ်ဂှ်ဟွံသေင် မိက်ဂွံပါဲအောပ် မံင်ဗ္ဒဗဒါဲမွဲချိန်ခဏ မွဲၜါသတ္တတှ်ေလေဝ် ကေတ်အဆက်ကဵု ဌာနဟံင်ပြာ်ကဵု ပရေင်ဓဝ်ဗစာမၞိဟ် ကံင်သဳဖိတ်ဒရေဝ်တုဲ သၟတ်တံ ကၠုင်ဗ္ဒဗ္ဒါဲမာန်မံင် အဲမိက်ဂွံ ဟီုလဴလဝ်” သာ်ဝွံ သ္ဂးရ။
ဗော်ဍုင်မန်တၟိ AD လေဝ် ပေါဲရုဲမာဲပတောအ်ကဵု ပရေင်ပကောံမံင်ကောန်ပၞာန် နနဲအဓ္ဓမတံဂှ် ညးဍုင်ကွာန်တံ နဲလဵုဒှ်ဒှ် ပံင်တောဲအာကဵု ဂကောံပၠန်ဂတးတံဒှ်ဒှ် ညံင်ဂွံဒစဵုဒစးအာ ဖတိုက်ဖအောဝ်လဝ်ရ။
ပေါဲရုဲမာဲပတောအ်ဂှ် သွက်ဂွံဟပၠုပ်အာလမျီု သၞောဝ်သ္ဇိုင်ဥပဒေ ၂၀၀၈ ကဵု သၞောတ်တၠအဝဵုပၞာန် ညံင်ဂွံလုပ်ဗဗွဲသၞောဝ်ရဒှ်တုဲ နကဵု ဗော်ဍုင်မန်တၟိ AD ဒစဵုးဒစး ဗတိုက်အာရောင် သ္ဂးရ။
လ္တူဗော်ပရေင်ဍုင်ကွာန် မလုပ်ပြိုင်ပေါဲရုဲမာဲတံဂှ်လေဝ် နဒဒှ် ဂကောံကလေင်ဆက်လမျီုကဵု သ္ဇိုင်သၞောဝ်ဥပဒေ ၂၀၀၈ တုဲ အယုက်တၠအဝဵုပၞာန်ဂွံဂၠိင် စၟတ်စွံအာရောင် ကဵုလဝ်သမ္ထီနွံရ။
ပြဿနာပရေင်ဍုင်ကွာန် က္တဵုဒှ်မံင်လၟုဟ်ဏံဂှ် ဟွံပသောင်မွဲသာ် သွက်ဂွံကၠောန်အာ ပေါဲရုဲမာဲဟေင် ဂစာန်ဖန်အာမ္ဂး ပဋိပက္ခဂမၠိုင်ရ ဘိုအ်ဂွံဂၠိုင်တိုန်ရောင် ဗော်ဍုင်မန်တၟိ AD ကဵုသတိထံက်ထၜးလဝ်ရ။
နကဵုဒပ်ပၞာန်စဵုဒၞာဍုင်မန် MSDF ဂှ်ပၠန် ပ္ဍဲပေါဲရုဲမာဲပတောအ်ဏံ နကဵုဗော်ပရေင်ဍုင်ကွာန်လ္ရဵုလ္ရဵုကဵု တၠအဝဵုပၞာန်တံ ပံင်တောဲမံင်ဂှ်တှ်ေ ပလီုပလာ်မံင် တင်ရန်တၟံပရေင်ဍုင်ကွာန် ပရေင်ပၠန်ဂတး ညးဍုင်ကွာန်တံဒှ်တုဲ ဒစဵုဒစးပျုတ်ဗဒေက်ဏာရ။
ဟိုတ်ဂှ်ရ နကဵုတၠအဝဵုပၞာန် ကၠောန်ကဵုပေါဲရုဲမာ ဗီုပြင်လဵုဒှ်ဒှ် နကဵု MSDF ဒုင်တဲဟွံမာန်တုဲ အတိုင်တင်ရန်တၟံ ပရေင်ပၠန်ဂတး၊ ပရေင်ဍုင်ကွာန်တံဂှ် ဆက်ဂစာန်လွဳပရာအာဏောင် ကဵုသမ္တီ လလောင်တြးလဝ်ရ။
ပရိုင်-သြင်လောန်တိုင်မ်
Photo – CJ