ကျာ်ထဝ်- အဝ်ဂတ် ၁၀
ပ္ဍဲတွဵုရးမန် ပွိုင်ဍုင်ကျာ်ထဝ် ဒၞာဲကွာန် ပိန္နဲကုန်းဂှ် ပေါဲဗတိုက်ဟွံဒှ်ကီုလေဝ် ဒပ်ပၞာန်ကျာ ကဝ်မယှေန်ပၞာန် ဟိုတ်နူကြဳဖျေံဗုမ်တုဲ ကောန်ညးဍုင်ကွာန် မွဲတၠချိုတ်တုဲ၊ မသုန်တၠဒးဝပ်ရဂှ် ညးဒေသတံ ဟီုလဴကဵု ဌာန်ပရိုင်သြင်လောန်တိုင်မ်ရ။
ပ္ဍဲအဝ်ဂတ် ၉ ၜိုတ်အခိင်နူဂယး ၉ နာဍဳဂှ် ၜင်ကျာဗတိုက် ဂျက်ဖိုက်တာ တိုန်ကၠုင်နူနေဗျဳတဝ်တေံမွဲမ ကၠုင်ကြဳဖျေံဏာ ပ္ဍဲကဵုဒၞာဲကွာန် ပိန္နဲကုန်း ဗုမ်လျိုင် ၃၀၀ ပံင်မွဲမ ဂွံပရိုင်ရ။
ဟိုတ်နူဒးဒုင်ကြဳဏာဗုမ် သာ်ဏံဂှ် ရဲကွာန် ပိန္နဲကုန်း ဦးကျော်သိန်း အယုက် ၆၂ သၞာံ ချိုတ်အာတုဲ သီုကဵု ကိုအောင်ဖြိုးဝေ၊ ကိုဖြိုးကြီး ညးဒေသ မသုန်တၠ ဒးအာဝပ်ဗုမ်ရ။
အပ္ဍဲအခိင်ကြဳမံင်ဗုမ်ဏံ ကွဳစက်ၜါမ သ္ရိဒၟံင် ဟွံအောန်နူပိမ ထပ်ဒးအာပၠန်တုဲ ညးဒေသဒးလဝ်ဝပ်တံဂှ် ပလံင်ဗစိုပ်ကဵုဏာ ဒၞာဲဌာန်ဝဳယဲ မကြပ်အိုတ်တံရ။
ပရေင်ကြဳထောံဏာဗုမ် ဗီုဗီုဏံဂှ်တှ်ေ ပ္ဍဲကဵုဒၞာဲ ကောန်ညးဍုင်ကွာန် ဂမၠိုင် တန်တဴမံင်စံင်မံင်ဒၟံင်တံဂှ် ဟိုတ်ပရူပရာ ဟၟဲမွဲသာ်ကီုလေဝ် ကၠောန်သ္ပဗတိုက်မံင်ကဵုပၞာန်ကျာ သာ်ဝွံညးဍုင်ကွာန်တံ သ္ဂးရ။
အတိုင်ညးဒေသတံ ဟီုမ္ဂး စနူအဝ်ဂတ် ၆ လောန်ကၠုင်တေံ နူကဵုဌာန်ဂအုပ် ၝောံဒပ် စၟတ် (၄၄) ဒပ်ကဝ်မယှန်ပၞာန် မဖျေံလဝ်သ္ဇိုင် အပ္ဍဲကဵု ဍုင်ကျာ်ထဝ်ဂှ် ပန်ကၠဟ်ဖျေံမံင်ကဵု လွဟ်ဇၞော် ကုဇရေင် ဒၞာဲကွာန် ညးဍုင်ကွာန်ဂမၠိုင် တန်တဴမံင်စံင်မံင်တံ ဇၟပ်ပ်တ္ရဲရဏောင် ဂွံတီလဝ်ရ။
မွဲဒမြိပ်ပၞာန်သီအဝဵုဏံ ပ္ဍဲကဵုပွိုင်ဍုင်ကျာ်ထဝ်ဏံဝွံ နူကဵုဒပ်ကဝ်မယှန်ပၞာန်တံ နကဵုဒရုင်၊ လွဟ်ဇၞော် သီုကဵုၜင်ကျာ ခြာဟွံလံဟွံလံ ဟိုတ်နူပန်ကၠဟ် ဗတိုက်ဖျေံကၠုင်မံင် လွဟ်ဇၞော်တံတုဲ ကောန်ညးဍုင်ကွာန်တံ ဒးဘဲချိုတ်အာလဝ် နွံဗွဲမဂၠိုင်ရ။
ပရိုင်-သြင်လောန်တိုင်မ်
Photo – KIC