သိမ်ဇရပ်၊ အဝ်ဂတ် ၁၀
ပ္ဍဲတွဵုရးမန် ပွိုင်ဍုင်ကျာ်ထဝ် လ္တူဍုင်သိမ်ဇရပ် ပ္ဍဲကဵုအဝ်ဂတ် ၈ ပွိုင်မွဲတ္ရဲဓဝ်ဂှ် မၞိဟ်ဗဒါဲ ၄၀ ဒးဒုင်ရပ်ဏာတုဲ အပ္ဍဲဏံ ညးဍုင်ကွာန် ပါဲဓလေတ်ဂြိပ်ဒဴမံင် ဘဲပၞာန်တံလေဝ် ပါလုပ်မံင်ရောင် ညးဒေသတံ ဟီုလဴကဵု ဌာန်ပရိုင်သြင်လောန်တိုမ်ရ။
ပ္ဍဲတ္ရဲဝွံ ၜိုတ်အခိင်နူဂယး ၁၀ နာဍဳဂှ် ကောန်ပၞာန်ကဵု ဒပ်ဗၠာဲသၟိင် ၂၀ ပြင်တံ ကၠုင်စိုပ်ဍုင်သိမ်ဇရပ် ဒၞာဲ “လိုရာပြည့်လူမှုကူညီရေးအသင်းရုံး” တုဲ အပ္ဍဲကဵု ညးဒဴပါဲပၞာန်ဂမၠိုင် တံဂှ် ကော်ရပ်ဏာ ညးတြုံ ၁၅ တၠတံနွံရ။ ဗွဲကြဴ ၜိုတ်ဒေါဝ်တ္ရဲ ၁၂ နာဍဳဂှ်ပၠန် လ္တူဂၠံင်ဍာန် လ္တုဍုင်သိမ်ဇရပ်ဂှ် ညးတြုံညးဗြဴ လတက်လဝ်ပလောအ် အရံင်လစံက် လၟိဟ်ဟွံအောန်နူကဵု ၂၂ တံဂှ်လေဝ် ထပ်ရပ်ကော်ဏာပၠန်ရ။
သၟတ်မ္ဒးဒုင်ရပ် ဗွဲမဂၠိုင်ဂှ်တှ်ေ ရဲအရာပ်ရွာမ ဍုင်သိမ်ဇရပ်တံဒှ်တုဲ ရဲဒဴပၞာန်တံဂှ် နူကဵုကွာန် ကွမ်းဆိပ်၊ ရှမ်းစု၊ ညောင်ခြေထောက်၊ ဝင်းကံ တံရဂှ် ညးဒေသတံ သ္ဂးရ။
ညးဒးဒုင်ရပ်တံဂှ် ထိင်စွံလဝ် ဒၞာဲကဵုဗဒိုပ်ဗၠာဲသၟိင် ၝောံဍုင် သိမ်ဇရပ်ကဵု တပ်ဒပ် ခမရ ၂၀၇ တံတုဲ ဟွံကဵုအခေါင်ဆဵုဂဗကဵု ရဲကၟိန်သ္ရိဌာန်ညးတံဂှ် ဂွံတီရ။
ဟိုတ်နူ နွံမံင်ပၟိက်ကဵု ကောန်ပၞာန်တၟိတံတုဲ ရပ်ဏာပဝ်တာဗီုဏံလေဝ် ဒှ်မာန်ရောင် ညးဒေသတံ ဟီုဂးပါ်ပါဲမံင်ရ။
တုဲကၠုင်ဂျူလိုင် ၃၀ တေံလေဝ် ပ္ဍဲပွိုင်ဍုင်သဓီု ရဲကွာန်ပုတိမ်ရိုးတံဂှ်လေဝ် သၟတ်တံကဵု ကောန်ကွာန်ညးတြုံ ၄၀ တၠပြင်င်တံ ဒပ်ပၞာန်ဗၟာ နကဵုဇြဟတ်ပေင်င် ကၠုင်စိုပ်ရပ်ကော်ဏာတုဲ ဗွဲမဂၠိုင်တံဂှ် ဒဵုကဵုတ္ရဲဏံ ဟွံကလေင်ဗလးကဵုဏီ ဂွံလဝ်ပရိုင်ရ။
ပရိုင်- သြင်လောန်တိုင်မ်
Photo – CJ